សៀមរាប ៖ ក្រោមការបញ្ជា របស់ ឯ.ឩ ឃឹម ប៊ុនសុង អភិបាលខេត្តសៀមរាប និង ជាប្រធានគណ:បញ្ជាការឯកភាពខេត្ត ក៏ដូចជាក្រោមការចង្អុលបង្ហាញពីសំណាក់លោកឩត្តមសេនីយ៍ទោ សត ណាឌី ស្នងការនគរបាលខេត្តសៀមរាបក្នុងការយកចិត្តទុកដាក់ខ្ពស់ លើការ ការពារថែរក្សាសន្តិសុខ សុវត្ថិភាព និង សណ្តាប់សង្គមពោលគឺជូនបងប្អូនប្រជាពលរដ្ឋនិងភ្ញៀវទេសចរណ៍ឲ្យកាន់តែមានសុវត្ថិភាពក៏ដូចជាអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ផងនោះ។
ជាក់ស្តែងនៅយប់ថ្ងៃទី២៥ខែកុម្ភះឆ្នាំ២០១៤នេះកម្លាំងនគរបាលចំរុះចំណុះស្នងការដ្ឋាននគរបាលខេត្តសៀមរាបដែលដឹកនាំដោយលោកវរសេនីយ៍ឯក អ៊ុំ អមរា ស្នងការរងនិងជាប្រធានការិយាល័យកណ្តាលនគរបាលប្រឆាំងបទល្មើសនៃស្នងការដ្ឋាននគរបាលខេត្តសៀមរាបនិងកម្លាំងកងរាជអាវុធហត្ថខេត្តសៀមរាបដែលដឹកនាំដោយលោកវរសេនីយ៍ឯក ស្រី យូរ៉ា មេបញ្ជាការរងនិងជាប្រធានមន្ទីរស្រាវជ្រាវនិងយុត្តិធម៌បានចុះប្រតិបត្តិការណ៍រួមគ្នាធ្វើការបង្ក្រាបនិងបានធ្វើការបិទទីតាំងចំនួន៤កន្លែងដែលបានបើកបំរើសេវាកម្មលក់ស៊ី ហ្សាក្នុងក្រុងសៀមរាប។
លោកវរសេនីយ៍ត្រី ទិត្យ ណារ៉ុង អធិការនគរបាលក្រុងសៀមរាបនៅនិងកន្លែងកើតហេតុបានឲ្យដឹងថាក្នុងកិច្ចចុះប្រតិបត្តិការណ៍នេះកម្លាំងសមត្ថកិច្ចយើងបានធ្វើការដកហូតបាននូវវត្ថុតាងបំពង់ស៊ីហ្សាចំនួន៥២ដើមនិងបានធ្វើការប្រមូលយុវជនចំនួន២៩នាក់និងយុវនារីបានចំនួន៣នាក់ដើម្បីធ្វើការសួរនាំនិងបានធ្វើការអប់រំរួចធ្វើកិច្ចសន្យាឲ្យវិលប្រឡប់ទៅផ្ទះវិញ។ដោយឡែកចំពោះម្ចាស់អាជីវកម្មទាំងអស់ត្រូវបានសមត្ថកិច្ចឲ្យមកធ្វើកិច្ចសន្យានិងបញ្ឈប់ជាបន្ទាន់នៅការបើកអាជីវកម្មបំរើសេវាកម្មលក់ស៊ីហ្សានេះដែលខុសពីច្បាប់បានកំណត់ ។
លោកវរសេនីយ៍ត្រី ទិត្យ ណារ៉ុង បានបន្តឲ្យដឹងទៀតថាបើក្នុងករណីដែលមានម្ចាស់ទីតាំងណាមួយលួចលាក់ក្នុងការបើកធ្វើអាជីវកម្មបំរើលក់ស៊ីហ្សាដែលច្បាប់បានហាមឃាត់នេះសមត្ថកិច្ចនិងចំណាត់ការទៅតាមនិតិវិធីជាបន្ត ។គួរបញ្ជាថាតាមការបញ្ជាក់នៅតាមគេហទំព័រនៃសារព័ត៌មានមួយចំនួនបានឲ្យដឹងថា សារធាតុនៃការជក់ស៊ីហ្សានេះ នឹង ធ្វើឲ្យប៉ះពាល់យ៉ាងខ្លាំងដល់កោសិការបស់អ្នកប្រើប្រាស់ ធ្វើឲ្យមានដំបៅតាមជើងឆ្មេញ សារពាង្គកាយ និង ធ្វើឲ្យ ចុះខ្សោយកម្លាំង រហូតដល់បាត់បង់ជីវិតទៀតផង ៕
ដោយ លោក ខេង ខេមរា
