ភ្នំពេញ ៖ ហេតុការណ៍គ្រោះថ្នាក់ចរាចរណ៍មួយដែលបង្កឡើងដោយសារបុរសម្នាក់វ័យជាង៤០ ឆ្នាំ ជិះម៉ូតូ សង់កូរ៉េមួយគ្រឿងក្នុងល្បឿនលឿន ហើយរេចង្កូតដួលប្រាវទៅលើថ្នល់ផ្លូវបេតុងតែឯង សន្លប់ស្តុកស្តឹងនៅ នឹងកន្លែងកើតហេតុជាង ១០ នាទីត្រូវបានប្រជាពលរដ្ឋជួយធ្វើសរសៃដឹងខ្លួនវិញលើម៉ូតូជិះទៅបាត់ កាលពីវេលាម៉ោង ១២ នឹង ៣០ នាទីរំលងអាធ្រាត្រឈានចូលថ្ងៃទី ២៧ ខែកុម្ភៈ ឆ្នាំ២០១៤ នៅចំណុចផ្លូវបេតុង ភូមិចំរើនផល សង្កាត់បឹងទំពុន ខណ្ឌមានជ័យ ។
យោងតាមប្រភពព័ត៌មានពីសាក្សីដែលបានឃើញហេតុការណ៍គ្រោះថ្នាកចរាចរណ៍ខាងលើបានឲ្យដឹង មុនពេលកើតហេតុមានបុរសម្នាក់វ័យជាង ៤០ ឆ្នាំ បានជិះម៉ូតូសង់កូរ៉េ ពណ៌ក្រហមពាក់ស្លាកលេខ ឈ ៩៦១០ ភព១ ជិះធ្វើដំណើរតាមបណ្តោយផ្លូវលេខ ២៧១ ហើយជិះចុះចំណោតតាមច្រកផ្លូវបេតុង ក្នុងល្បឿនលឿន ល្មម តែចាប់ជាន់ហ្វ្រាំងមិនទាន់បណ្តាលឲ្យរអិលរេចង្កូតដួលខ្លួនប្រាវទៅលើថ្នល់ សន្លប់ស្តុកស្តឹងនៅនឹងកន្លែង កើតហេតុ ប៉ុន្តែមិនបណ្តាលឲ្យរងរបួសធ្ងន់ធ្ងរទេ ។
ពេលសន្លប់បានជាង ១០នាទី ក្រុមប្រជាពលរដ្ឋនឹងអ្នកដំណើរបាននាំគ្នាជួយធ្វើសរសៃឲ្យរហូតដឹងខ្លួនវិញ រូបគេបានលើកម៉ូតូជិះគេចខ្លួន បាត់ស្រមោលតែម្តងពុំរំខានដល់សមត្ថកិច្ចចុះវាស់វែងអូសយកម៉ូតូរបស់គេទៅរក្សាទុកឡើយ ។
សមត្ថកិច្ចបញ្ជាក់ថាគ្រោះថ្នាក់នេះបង្កឡើងដោយសារបុរសម្ចាស់ម៉ូតូសង់កូរ៉េស្រវឹងស្រា ហើយជិះម៉ូតូ ចូលតាមច្រកចំណោតខ្លាំងពេក ទល់ចង្កូតមិនទាន់ក៏បណ្តាលឲ្យដួលប្រាវតែម្នាក់ឯង តែម្តងទៅ៕
