កំពង់ចាម : ឯកឧត្ដម បណ្ឌិត ហ៊ុន ម៉ាណែត តំណាងសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានថ្លែងថា ក្រោមការដឹកនាំរបស់រាជរដ្ឋាភិបាលបច្ចុប្បន្ន ដែលមានចក្ខុវិស័យវែងឆ្ងាយ និងគោលនយោបាយច្បាស់លាស់ រួមជាមួយនឹងការតម្កល់ផលប្រយោជន៍ជាតិជាធំ, សមិទ្ធផល និងគម្រោង
អភិវឌ្ឍជាច្រើនបានកកើតឡើងនៅទូទាំងប្រទេស ហើយក៏នឹងបន្តរីកដុះដាលបន្ថែមទៀតឥតឈប់ឈរបន្តទៅអនាគត។ ជាក់ស្តែងគម្រោងអភិវឌ្ឍសំខាន់ៗចំនួន ៣ ដែលអាចនឹងផ្តល់ផលប្រយោជន៍ដោយផ្ទាល់សម្រាប់អ្នកខេត្តកំពង់ចាម និងប្រជាជននៅទូទាំងប្រទេស ក្នុងនោះរួមមាន៖ ១. គម្រោងពង្រីកផ្លូវជាតិលេខ ៧, ២. គម្រោងស្ពានតភ្ជាប់កំពង់ធំ-កំពង់ឆ្នាំង និង ៣. គម្រោងជាប្រវត្តិសាស្ត្រតភ្ជាប់ទន្លេទៅសមុទ្រ “ព្រែកជីកហ្វូណនតេជោ” ដែលជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនតាមផ្លូវទឹករបស់កម្ពុជា ដើម្បីកាត់បន្ថយថ្លៃដឹកជញ្ជូនទំនិញ និងទេសចរណ៍ ដោយនឹងផ្តល់ផលប្រយោជន៍យ៉ាងច្រើនសម្រាប់សេដ្ឋកិច្ចជាតិ ។ ការ ថ្លែង បែប នេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សា អគារទីចាត់ការ និងបណ្ណាល័យ នៅសាលាបឋមសិក្សាព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម នាព្រឹកថ្ងៃទី១២ ខែមិថុនា ឆ្នាំ២០២៣ ។
ក្នុង ឱកាស នោះ ដែរ ឯកឧត្តម បណ្ឌិត ហ៊ុន ម៉ាណែត បានថ្លែងថា បច្ចុប្បន្ននេះ ប្រទេសជាតិយើងបានឆ្លងរួចផុតពីវិនាសកម្មសង្គ្រាមរ៉ាំរ៉ៃ និងទុក្ខលំបាកវេទនាទាំងឡាយទាំងពួង ហើយក៏កំពុងស្ថិតនៅលើមាគ៌ាអភិវឌ្ឍន៍រីកចម្រើនទៅមុខ ដោយបានគុណបំណាច់របស់គណបក្សប្រជាជនកម្ពុជា ដែលបានរំដោះប្រទេសឱ្យរួចផុតពីរបបប៉ុលពត និងនាំមកនូវសន្តិភាពពេញលេញ និងឯកភាពទឹកដីតាមរយៈនយោបាយឈ្នះ-ឈ្នះ ដែលអាចប្រសិទ្ធនាមបានថាជា “សម័យតេជោសន្តិភាព”។
បេីតាម សេចក្តី រាយការណ៍ របស់ឯកឧត្ដម អ៊ុន ចាន់ដា អភិបាលខេត្តកំពង់ចាម បានថ្លែងថា បន្ទាប់ ពីទទួលបានសមិទ្ធផលជាច្រើនពីសម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ក៏ដូចជា ការយកចិត្តទុកដាក់ពីសំណាក់រាជរដ្ឋាភិបាលកម្ពុជា ក្នុងការអភិវឌ្ឍន៍ធនធានមនុស្ស វិស័យអប់រំនៅក្នុងខេត្តកំពង់ចាមបច្ចុប្បន្ន មានការរីកចម្រើនគួរឱ្យកត់សម្គាល់ ដោយ មានគ្រឹះស្ថានសិក្សា ចំនួន ៥៣៧កន្លែង ឃុំ–សង្កាត់មួយមានអនុវិទ្យាល័យ ១កន្លែង មានចំនួន ១០៨ឃុំ–សង្កាត់ លើក១០៩ឃុំសង្កាត់ ស្មើនឹង ៩៩ភាគរយ។ ក្នុងនោះ មត្តេយ្យសិក្សា ចំនួន ២៨៣កន្លែង បឋមសិក្សា ចំនួន ៤០៧កន្លែង, អនុវិទ្យាល័យ ចំនួន ៨១កន្លែង និងវិទ្យាល័យ ចំនួន ៤៣កន្លែង។ គ្រឹះស្ថានឧត្តមសិក្សា ចំនួន ១០កន្លែង គ្រឹះស្ថានឧត្តមសិក្សារដ្ឋ ចំនួន ៣កន្លែង និងឯកជនចំនួន ៦កន្លែង និងសាលាបណ្តុះបណ្តាលវិជ្ជាជីវៈ សរុប ៨២កន្លែង ក្នុងនោះ សាលារដ្ឋ ចំនួន ៨កន្លែង និងសាលាឯកជន ចំនួន ៧៤កន្លែង ផងដែរ ៕
