ព្រះវិហារ ប្រតិបត្តិការចុះបង្ក្រាបបទល្មើសព្រៃឈើដឹកនាំដោយលោក ឯកឧត្តម ហ៊ុន អៀង នាយអធិការរដ្ឋបាលព្រៃឈើខាងជើងបឹងទន្លេសាប សហការជាមួយខណ្ឌរដ្ឋបាលព្រៃឈើព្រះវិហារ ដឹកនាំដោយលោក អ៊ិត ភូម្រា ។ ឈើលេខ១ និង ឈើប្រណិតចំនួន ១៥៩ម៉ែត្រគូប ត្រូវបានសមត្ថកិច្ចរដ្ឋបាលព្រៃឈើ
បង្ក្រាបនិង រឹបអូសដកទុកជាសម្បត្តិរដ្ឋ ។ ប្រតិបត្តិការនេះបានប្រព្រឹត្តទៅថ្ងៃទី ២៨តុលា រហូតដល់ថ្ងៃទី៣១តុលា ឆ្នាំ ២០១៤ កន្លងទៅទើបបានបញ្ចប់ កន្លែងស្តុកឈើ និង សិប្បកម្មកែច្នៃ ចំនួន ១២ទីតាំង នៅក្នុងក្រុងព្រះវិហារ ត្រូវបានបង្ក្រាប។ លោក អ៊ិត ភូម្រា នាយខណ្ឌរដ្ឋបាលព្រៃឈើព្រះវិហារ បានឱ្យដឹងថា សមត្ថកិច្ចរដ្ឋបាលព្រៃឈើ គ្រាន់តែជាអ្នកទទួលបញ្ជា និង អនុវត្តច្បាប់ស្តីពីព្រៃឈើតែប៉ុណ្ណោះ មិនបានធ្វើអ្វីឱ្យលើស ពីច្បាប់ដែលបានចែងនោះឡើយ ។
លោកនាយខណ្ឌបានអានបទបញ្ជារបស់ឯកឧត្តម ឆេង គឹមស៊ុន ប្រតិភូរាជរដ្ឋាភិបាលទទួលបន្ទុកផ្នែករដ្ឋបាលព្រៃឈើ ឱ្យតំណាងម្ចាស់សិប្បកម្មស្តាប់ ការអនុវត្តចុះចាប់បង្ក្រាបសិប្បកម្មរយៈពេល ៤ថ្ងៃ រហូតដល់ថ្ងៃទី១ ខែវិច្ចិការនេះប្រជាពលរដ្ឋ និង ម្ចាស់អាជីវកម្មសិប្បកម្ម បានផ្ទុះធ្វើការតវ៉ាសុំឱ្យសមត្ថកិច្ចរដ្ឋបាលព្រៃឈើ បញ្ឈប់ជាបន្ទាន់ ដោយពួកគេ សម្អាងថា សិប្បកម្មរបស់ពួកគាត់មានច្បាប់ ម្យ៉ាងវិញទៀត ប្រជាពលរដ្ឋខ្លះពួកគាត់មានលុយតិចតួច យកទៅទិញឈើទុក សម្រាប់ប្រើប្រាស់ ក៏ត្រូវបានសមត្ថកិច្ចរឹបអូសយកទៅដែរ ។
មូលហេតុសមត្ថកិច្ចចុះបង្ក្រាបបទល្មើសព្រៃឈើ គឺដោយសារតែ ឈើដែលពួកគាត់កំពុងចរាចរណ៍ប្រើប្រាស់នៅក្នុងសិប្បកម្មនិមួយៗ ពុំមានប្រភពច្បាស់លាស់ និង ពុំមានច្បាប់អនុញ្ញាតិ ពីសមត្ថកិច្ចជំនាញឡើយ ។ គួរបញ្ចាក់ផងដែរថា សិប្បកម្មកែច្នៃឈើទាំង១២ទីតាំង មានច្បាប់អនុញ្ញាតិទាំងអស់ តែឈើពុំមានច្បាប់អនុញ្ញាតិឡើយ ហេតុដូចច្នេះហើយ សមត្ថកិច្ចរឹបអូស ចាប់យកតែឈើទេ ចំណែកសម្ភារៈមានដូចជាម៉ាស៊ីន តាបឈូស ម៉ូទ័រ និង សម្ភារៈផ្សេងៗ គឺសមត្ថកិច្ចមិនបានដកហូតយកឡើយ ។
