កំពង់ឆ្នាំងៈបច្ចុប្បន្នអ្នកស្មូនកំពុងតែកែឆ្នៃវត្ថុប្រើប្រាស់ដែលធ្វើពីដីឥដ្ឋ អោយប្រែក្លាយទៅ ជាវត្ថុប្រើប្រាស់សេរ៉ាមិចវិញ ដោយមានការបង្ហាត់បង្រៀនពីអង្គការ នីបផុន ហ្វោនដេសិន របស់ប្រទេស ជប៉ុន ដើម្បីអោយអ្នកស្មូនវត្ថុប្រើប្រាស់មានបច្ចេកទេសនិងសមត្ថភាពច្បាស់លាស់ក្នុងការផលិត។ លោក សួង សម្បត្តិ ជំនួយការបច្ចេកទេសរបស់អង្គការនិងជាអ្នកគ្រប់គ្រងសិប្បកម្ម កូលាបភាជកំពង់ឆ្នាំងបានថ្លែងនៅព្រឹកថ្ងៃទី០៩ ខែកុម្ភៈនេះថា៖សិប្បកម្មកូលាបភាជផលិតវត្ថុប្រើប្រាស់អំពីសេរ៉ាមិចមានទីតាំងនៅក្នុងភូមិអណ្តូងឬស្សី ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ដែលមានកម្មករកម្មការនីចំនួន១០នាក់បំរើការងារ។អង្គការនីបផុន ហ្វោនដេសិន នៅខេត្តម៉ាស៊ីកុប្រទេសជប៉ុនបានធ្វើកិច្ចសហការជាមួយខេត្តកំពង់ឆ្នាំង ដើម្បីផ្លាស់ប្តូរបទពិសោធន៍ក្នុងការផលិតវត្ថុប្រើប្រាស់គ្រប់ប្រភេទអំពីសេរ៉ាមិច។
គំរោងទី១ ពីឆ្នាំ២០០៩ដល់ឆ្នាំ២០១១ អង្គការបានបើកសិប្បកម្មកូលាបភាជនៅក្នុងខេត្តកំពង់ឆ្នាំងដោយបានផ្តល់អ្នកបច្ចេកទេសមកបង្រៀនជាក់ស្តែងដល់កម្មករកម្មការនីក្នុងសិប្បកម្ម និងបានយកកម្មករកម្មការនីចំនួន១០នាក់ទៅរៀនសូត្រជាក់ស្តែងពីការផលិតវត្ថុសេរ៉ាមិចពីប្រជាពលរដ្ឋជប៉ុននៅខេត្តម៉ាស៊ីកុ។គំរោងទី២ ពីឆ្នាំ២០១២ដល់ឆ្នាំ២០១៥នេះអង្គការជួយរកទីផ្សារក្នុងការលក់ផលិតផលសេរ៉ាមិចដែលមានទីតាំង២កន្លែងនៅក្រុងភ្នំពេញ។
លោក សួង សម្បត្តិ បាននិយាយអោយដឹងទៀតថា៖កម្មករកម្មការនីដែលធ្វើការងារក្នុងសិប្បកម្ម នេះបានប្រាក់ឈ្នួលក្នុង១ថ្ងៃចំនួន៦ដុល្លានឹងត្រូវធ្វើការ១ថ្ងៃ៦ម៉ោង។វត្ថុធាតុដើមនៃការផលិតវត្ថុប្រើប្រាស់ទាំងអស់នេះគឺមាននៅក្នុងខេត្តកំពង់ឆ្នាំងទាំងអស់ ដូចជាលាយពណ៌សេរ៉ាមិច ត្រូវយកពីដី ថ្ម សំបកលៀស ផេះអង្កាម។
ការផលិតវត្ថុទាំងនោះគឺប្រើដោយដៃទាំងអស់ដោយត្រូវយកវត្ថុធាតុដើមទាំងនោះមកបុក រែង ច្រោះអោយក្លាយទៅម្សៅដើម្បីទុកលាយធ្វើជាពណ៌តាមតំរូវការ និងភាគច្រើនធ្វើតាមរចនាបទ ដែលជាក្បាច់ចម្លាក់បូរាណរបស់ខ្មែរ ប៉ុន្តែវត្ថុប្រើប្រាស់មួយចំនួនក៍ធ្វើតាមចំណូលចិត្តដែលភ្ញៀវត្រូវការផងដែរ។
លោកបានបន្តថា៖ក្រោយពីស្មូនដីឥដ្ឋក្លាយជារបស់ប្រើប្រាស់ហើយនោះ គេត្រូវយកវាទៅដុតអោយឆ្អិនមួយលើកសិន បន្ទាប់មកទើបយកមកជ្រលក់ពណ៌តាមតំរូវការ ក្រោយមកទើបយកទៅដុតក្នុង តាមបច្ចេកទេសដែលមានរយៈពេលពី២០ទៅ២៤ម៉ោង ដោយប្រើកំដៅរហូតដល់១២០០អង្សារ ទើបពណ៌ដែលគេលាបពីក្រៅក្លាយជាសេរ៉ាមិច។វត្ថុប្រើប្រាស់ដែលសិប្បកម្មផលិតបានមានប្រមាណជាង៣០ប្រភេទ មានតូច មានធំ។
ដោយឡែកតម្លៃវិញ ថ្លៃចាប់ពី២ដុល្លាដល់៨ដុល្លា និងវត្ថុធំៗអាចមានតម្លៃរាប់សិបឬរាប់រយដុល្លា បើប្រៀបធៀបនឹងវត្ថុប្រើប្រាស់អំពីដីឥដ្ឋធម្មតាដែលមានតម្លៃខុសគ្នាជាច្រើនដង។ លោក សួង សម្បត្តិ បានបញ្ជាក់ជាចុងក្រោយថា៖សិប្បកម្មកូលាបភាជកំពង់ឆ្នាំងអាចនឹងទទួលយកប្រជាពលរដ្ឋមួយចំនួនទៀតដែលមានបំណងចាប់យកអាជីពនេះមកបណ្តុះបណ្តាលអោយមានសមត្ថភាពគ្រប់គ្រាន់ក្នុងការផលិតវត្ថុប្រើប្រាស់អំពីសេរ៉ាមិច ប៉ុន្តែអង្គការមិនផ្តល់ប្រាក់ឈ្នួល និងក៍មិនយកកំ រៃពីការបណ្តុះបណ្តាលនេះដែរ។
នេះគឺជាឳកាសមួយសំរាប់ប្រជាពលរដ្ឋក្នុងខេត្តកំពង់ឆ្នាំងដែលកំពុងប្រ កបមុខរបរស្មូនដីធ្វើក្អមឆ្នាំង ចង្ក្រាន វត្ថុអនុស្សាវរីយ៍ និងរបស់ប្រើប្រាស់ផ្សេងៗ ពីដីឥដ្ឋ អោយក្លាយ ទៅ ជាសេរ៉ាមិចដែលមានតម្លៃខ្ពស់ ដើម្បីផ្គត់ផ្គង់ជីវភាពកាត់បន្ថយភាពក្រីក្រ៕ 
