សៀមរាប៖ (ដោយប៊ុតវិចិត្រ)ល្បែងកន្ទុយលេខ(ឆ្នោត)នៅខេត្តសៀមរាបបានកំពុងក្លាយជាទីផ្សារសេរីទាំងកូនទាំងមេលក់ទិញមិនចាំបាច់លាក់លាមដោយគ្រាន់តែដាក់តាំងទូរធ្វើដូចប្តូរប្រាក់ គឺលក់ឆ្នោតបានដោយសេរី។ ជាមួយគ្នានោះក៏ ធ្លាយរឿងមេឆ្នោតបោកបន្តគ្នា ចំនួនទឹកប្រាក់ជាង៤១លានរៀល ទើត្រឹមអធិការ។
ទីផ្សារល្បែងកន្ទុយលេខដែលកំពុងហក់ឡើងខ្លាំងជាងគេ គឺគេសង្កេតឃើញនៅផ្សារដើមក្រឡាញ់ និង នៅផ្សារលើធំថ្មី។ ចំណែកឯផ្សារផ្សេងៗទៀត លក់ទិញក្នុងសភាពលាក់លាម ។ នៅផ្សារដើមក្រឡាញ់គេលក់ ទិញនៅតាមផ្ទះល្វែង ដែលមានបើកលក់ទូរសព្ទ័ដៃនិងប្តូរប្រាក់។ ដោយនៅទីនោះមានការអះអាងថា មេធំ ជាងគេឈ្មោះសុខ ខេង មានស្លាកយីហោ សុខ ខេង ប្តូរប្រាក់។
ចំណែកនៅឯផ្សារលើធំថ្មីវិញ ផ្នែកខាងលិចនិងខាងត្បូង លក់នៅតាមផ្ទះល្វែង រីឯខាងកើតនិងក្នុងផ្សារ គឺដាក់តំរៀបទូរលក់ជារបៀបប្តូរប្រាក់។ ករណីនេះកើតមានជិត១ឆ្នាំមកហើយ ចាប់តាំងពីអធិការប៉ូលិសថ្មី ឡើង មកកាន់តំណែង។ រហូតមានមេឆ្នោតខ្លះ ហ៊ាននិយាយថា ស្រុកគេចាយលុយ មិនមែនពិបាកស្ពាយអង្ករទៅ ដោះដូរ ដូចកាលឆ្នាំ១៩៧៩ឯណា។
កាលពីថ្ងៃទី១ខែកុម្ភៈ ត្រូវនឹងថ្ងៃចេញឆ្នោតសៀម នៅផ្សារដើមក្រឡាញ់ និងនៅផ្សារលើធំថ្មី គេឃើញ មនុស្សច្រើនកកកុញ សម្រុះទៅចាក់កន្ទុយលេខ មើលទៅហាក់បីដូចជារោមទិញត្រីអីចឹង តែសមត្ថកិច្ច ស្ងាត់ឲ្យ ឈឹង។ ជារៀងរាល់ថ្ងៃ ពីថ្ងៃទី១ដល់ថ្ងៃទី៣១ បើទោះបីមិនមែនថ្ងៃចេញឆ្នោតសៀម ក៏នៅសៀមរាប អូរអទៅ ដោយល្បែងកន្ទុយលេខយ៉ាងខ្លាំង ដោយពួកគេលេងចាញ់ឈ្នះ រហូតដល់ម៉ឺនដុល្លារ។
ថ្មីៗនេះធ្លាយរឿងមេកន្ទុយលេខ នៅក្នុងផ្សារេលើធំថ្មីបោកលុយគ្នាបន្ត រហូតចំនួនទឹកប្រាក់ ជាង៤១ លានរៀល ហើយរឿងនេះ បានកំពុងប្តឹងផ្តល់ទៅដល់អធិការនគរបាលក្រុងសៀមរាប។
បុរសម្នាក់ឈ្មោះសេង បានបង្ហើបថា ប្រពន្ធគាត់ជាមេលក់កន្ទុយលេខក្នុងផ្សារលើធំថ្មី ឡើងឲ្យមេធំ យកកម្រៃទឹកតែ។ កាលទី២៤មករា ក្រុមកូនឆ្នោត៤ទៅ៥នាក់ បានចាក់ជាមួយប្រពន្ធគាត់ត្រូវ គិតជាទឹកប្រាក់ ជាង៤១លានរៀល ដោយប្រពន្ធគាត់បានយកលេខទាំងនោះ ឡើងបន្តឲ្យមេធំឈ្មោះ ត្រា ស្រីអាយុប្រហែល ជាង៣០ឆ្នាំ លក់ក្នុងផ្សារលើ ម្តុំក្បែរលក់ត្រី។ លុះពេលឆ្នោតចេញដឹងថាត្រូវ ជាង៤១លានរៀល ក៏ឆ្លើយថាភ្លេច ឡើង លេខទាំងនោះបន្តឲ្យមេធំនៅឯភ្នំពេញ ដូច្នេះអត់មានលុយសងភ្លាមទេ ចាំ២ឬ៣ថ្ងៃទៀតចាំសង ។
៣ថ្ងៃ ក្រោយ ពេលទារម្តងទៀត មេឈ្មោះត្រា ឆ្លើយថាអត់សងចង់ប្តឹងក៏ប្តឹងចុះ។ លោកសេងបន្តថា ពេលនេះអ្នក ចាក់ត្រូវទាមទារពីប្រពន្ធគាត់ ហើយប្រពន្ធគាត់កំពុងប្តឹងទៅអធិការ ដោយមានសាក្សី៥ទៅ៦នាក់ទៅផ្តិតមេដៃ។ ប៉ុន្តែនៅថ្ងៃដែលទៅដោះស្រាយគ្នា ពេលចេញមកដល់មាត់ទ្វារបន្ទប់អធិការ មេឆ្នោតឈ្មោះត្រា ឆ្លើយថា គាត់មិនបាន លក់ឆ្នោតទេ ហើយក៏មិនបានធ្វើមេឆ្នោតអីដែរ។ លោកសេងនិយាយថា មកទល់ពេលនេះនៅ មិនទាន់មានដំណោះស្រាយទេ តែខាងប៉ូលិសប្រាប់ថា នៅឲ្យស្ងៀមសិន ចូលឆ្នាំចិនហើយ នឹងដោះស្រាយ។
ទាក់ទងនិងល្បែងកន្ទុយលេខ ដែលកំពុងពេញនិយម សម្រាប់ពលរដ្ឋក្នុងខេត្តសៀមរាប ដោយសមត្ថ កិច្ចមិនបង្ក្រាប រហូតមានការបោកលុយបន្តគ្នា អធិការក្រុងសៀមរាប លោកវរសេនីយ៏ទោ ទិត ណារ៉ុង បាន និយាយប្រាប់អ្នកកាសែតតាមទូរសព្ទ័ថា តើមានកន្លែងណាលេខធំខ្លះ លោកនឹងឲ្យកម្លាំងទៅចាប់។ ផ្សារដើមក្រឡាញ់ ឈ្មោះសុខ ខេង នេះឮប៉ុន្មានដងហើយ តែឲ្យប៉ូលិសទៅមើល វាមិនដែលឃើញ។ លោកបន្តថា អាល្បែងឆ្នោត នេះខ្ញុំធ្លាប់បង្ក្រាបតើ មេចក៏មានទៀត។
លោកអធិការ បន្តថា ចំពោះការបោកលុយគ្នាដោយសាល្បែងឆ្នោតនេះ ខ្ញុំមិនបានដឹងអ្នកណា មកប្តឹង អីទេ បើមកប្តឹងមានតែចាប់ទាំងពីរ ។ តែបើមកប្តឹងមែន មានតែកូនចៅអត់រាយការណ៏។
សូមបញ្ជាក់ថា នៅខេត្តសៀមរាប ក្រៅពីល្បែងកន្ទុយលេខ នៅមានល្បែងប្រជល់មាន់ដ៏ធំ ពីរកន្លែង ទៀត១កន្លែងនៅទំនប់អញ្ចា្ ក្នុងសង្កាត់នគរធំ និង១កន្លែងទៀត នៅក្នុងអតីតភូមិភាគទី៤។ ល្បែងប្រជល់មាន់ ដែលមាន បំពាក់ផ្លែខ្នាយដែក នេះ គឺប្រៀបបានលូកហោប៉ាវយកលុយអីចឹង ត្រឹមតែ៥ទៅ១០នាទីអ្នកឈ្នះ ប្រមូលលុយបានរាប់ពាន់ដុល្លារ ឯអ្នកចាញ់ក៏អស់រាប់ពាន់ដុល្លារដូចគ្នា។ អាល្បែង អារកយកលុយខាងលើនេះ វាពិតជាបង្ខំឲ្យមនុស្ស ហ៊ានប្រព្រឹត្តនូវអំពើអាក្រក់គ្រប់បែបយ៉ាង។
មានការសំណូមពរពីពលរដ្ឋ ជាបន្តបន្ទាប់ សុំឲ្យសមត្ថកិច្ចពាក់ពន្ធ័ បង្ក្រាបល្បែងស៊ីសងទាំងនេះ។ព្រោះ ថា អំពើលួច ឆក់ ប្លន់ និងអសន្តិសុខសង្គម គឺពិតជាកើតចេញ ពីល្បែងស៊ីសង់ជាញឹកញាប់។
ប្រជាពលរដ្ឋបាននិយាយថាចាប់តាំងពីមានការផ្លាស់ប្ដូរអធិការនគរបាលក្រុងសៀមរាបរួចមកឃើញថាមានអំពើចោលួចចោប្លន់និងល្បែងស៊ីសង់យ៉ាងគគ្រឹកគគ្រេងខុសពីពេលមុនៗ។
