ខេត្តសៀមរាប៖ កាលពីថ្ងៃទី៣ ខែកញ្ញា ឆ្នាំ២០១៥នេះ លោក ស៊ុំ ម៉ាប់ អគ្គនាយកអាជ្ញាធរជាតិអប្សរា និងសហប្រធាន JASA (Japan-APSARA team for Safeguarding Angkor) គឺ លោក Takahashi Nakagawa នជួបពិភាក្សា អំពីគម្រោងជួសជុលប្រាសាទបាយ័នក្នុង
ដំណាក់កាលទី៤ និងគម្រោងសម្រាបាប់ដំណាក់កាលទី៥នាពេលខាងមុខនេះ។
បើតាមរបាយការណ៍របស់លោក Nakagawa មានគម្រោងជួសជុលប្រាសាទបាយ័ន ដំណាក់កាលទី៤ នឹងត្រូវបញ្ចប់នៅខែ១០ ឆ្នាំ២០១៦ខាងមុខ ដែលដំណាក់កាល ទី៤នេះ JASA បានធ្វើការជួសជុលប្រាសាទបាយ័ន ទៅលើថែវខាងកើតផ្នែកខាងក្រៅ និងខ្លោងទ្វារខាងកើត ព្រមទាំងការស្រាវជ្រាវបុរាណវិទ្យា។ សម្រាប់ដំណាក់កាលទី៥ JASA គ្រោងនឹងធ្វើការជួសជុលទៅលើប្រាង្គកណ្តាលនៃប្រាសាទ បាយ័ន។ លោកបន្តថា ដោយសារគម្រោងសម្រាប់ដំណាក់កាលទី៥នេះ មិនទាន់បានទទួលការអនុម័តពីរដ្ឋាភិបាលនៃប្រទេសជប៉ុននៅឡើយ សហប្រធានជប៉ុនរូបនេះ បានស្នើឱ្យអាជ្ញាធរជាតិអប្សរាជួយជំរុញយ៉ាងណាឱ្យរដ្ឋាភិបាលជប៉ុន គាំទ្រគម្រោងនេះតទៅទៀត។
មានប្រសាសន៍ក្នុងកិច្ចពិភាក្សានោះដែរលោក ស៊ុំ ម៉ាប់ អគ្គនាយកនៃអាជ្ញាធរជាតិអប្សរា ក៏បានសន្យាចាត់តាំងអ្នកសម្របសម្រួលការងារបច្ចេកទេស ដើម្បីជំរុញឱ្យមានការពិភាក្សារវាងអាជ្ញាធរជាតិអប្សរា ជាមួយ អង្គការយូណេស្កូ JASA និងតំណាងស្ថានទូតជប៉ុនប្រចាំកម្ពុជា អំពីការរៀបចំគម្រោងសម្រាប់ដំណាក់កាលទី៥ ក្នុងពេលឆាប់ៗខាងមុខនេះ។ លើសពីនេះទៅទៀត លោក ក៏បានសាទរ និងថ្លែងអំណរគុណចំពោះក្រុម JASA ដែលបានបណ្តុះបណ្តាលអ្នកបច្ចេកទេស និងកម្មករជំនាញ ព្រមទាំងការងារជួសជុល អភិរក្សកន្លងមក។ ជាពិសេស តាមរយៈការបណ្តុះបណ្តាលនេះ ធ្វើឱ្យអ្នកបច្ចេកទេស និងកម្មករជំនាញទាំងនោះមានសមត្ថភាពពេញលេញ ក្នុងការបំពេញភារកិច្ចប្រកបដោយប្រសិទ្ធភាពខ្ពស់។
ក្នុងជំនួបពិភាក្សានេះដែរ លោកអគ្គនាយកក៏បានស្នើឱ្យ JASA សហការជិតស្និទ្ធផ្នែកផ្សព្វផ្សាយ ជាពិសេសសមិទ្ធផលទាំងឡាយដូចជាការងារអភិរក្ស ការជួសជុល និងការស្រាវជ្រាវបុរាណវិទ្យារបស់ JASA ក្នុងរមណីយដ្ឋានអង្គរ។ ពិសេសគឺការផ្សព្វផ្សាយតាមប្រព័ន្ធគេហទំព័រផ្លូវការរបស់អាជ្ញាធរជាតិអប្សរា ធ្វើយ៉ាងណាឱ្យគេហទំព័រនេះក្លាយជាទីស្រាវជ្រាវនៃសិស្ស និស្សិត អ្នកស្រាវជ្រាវ និងសាធារណជនទាំងអស់។
គួររំលឹកផងថា ក្រុមអភិរក្សអង្គររបស់ប្រទេសជប៉ុន ហៅកាត់ថា JSA បានចូលមកប្រទេសកម្ពុជាតាំងពីឆ្នាំ១៩៩៤ ធ្វើការជួសជុលប្រាសាទផ្សេងៗក្នុងរមណីយដ្ឋានអង្គរ។ លុះនៅឆ្នាំ២០០៥ ក្រុម JSA បានសហការជាមួយអាជ្ញាធរជាតិអប្សរា បង្កើតស្ថាប័ន JASA នេះឡើង ដើម្បីធ្វើការជួសជុលប្រាសាទបាយ័នជាបន្តបន្ទាប់ ដោយចែកជាដំណាក់កាលៗ៕ 
ដោយ ខេង ឧត្តម
