ខេត្តបន្ទាយមានជ័យ៖ ថ្លែងនៅក្នុងពិធីបើកបុណ្យបុណ្យចំបើងលើកទី២និងស្រូវលើកទី១កាលពីល្ងាចថ្ងៃទី០៤ ខែមករា ឆ្នាំ២០១៥ ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា កសិ-ទេសចរណ៍ គឺជាផលិតផលទេសចរណ៍មួយដ៏មានសក្តានុពល
បន្ទាប់ពីអេកូទេសចរណ៍ ជាសេសសម្រាប់បណ្តាប្រទេសដែលសេដ្ឋកិច្ចពឹងផ្អែកលើវិស័យកសិកម្ម ដូចជាប្រទេសកម្ពុជាជាដើម។ ពីធីនេះមានការចូលរួមពីសំណាក់លោក ជំទាវ សម្តេចក្រឡាហោម សខេង លោក ជំទាវ ម៉ៅម៉ាឡៃ កែគឹមយ៉ាន ភ្ញៀវជាតិនិងអន្តរជាតិជាច្រើន។ឯកឧត្តម គោស៊ុំ សារឿត អភិបាលនៃគណៈអភិបាលខេត្តបន្ទាយមានជ័យបានលើកឡើងថា ពិធីបុណ្យចំបើងលើកទី២និងស្រូវលើកទី១ក្រោមប្រធានបទ «ស្រូវ ជីវិត វប្បធម៍ ទេសចរណ៍»មានភាពគគ្រឹកគគ្រេងជាងឆ្នាំមុនដោយមានការប្រគុំតន្ត្រីខ្នាត់ធំនិងអ្នកចម្រៀងការសម្តែងសិល្បះល្បីៗពីរាជធានីភ្នុំពេញរៀបរាប់ពីទេសភាពនានាតាមស្រុកក្រុងរបស់ខេត្តនិងការដាក់តាំងពិព័រមិនមែនគ្រាន់តែជាក្តីសប្បាយរីករាយដែលមិនធ្លាប់មានសម្រាប់កសិករ និងប្រជាពលរដ្ឋនោះទេ តែវាមានខ្លឹមសារ និងអត្ថប្រយោជន៍ជាច្រើនដូចជា សង់ជាផ្ទះ ជាគ្រឿងលំអ ជាវត្ថុធាតុដើមក្នុងរោងចក្រក្រដាស់ កិនជាជីធម្មជាតិ សម្រាប់ការបណ្តុះផ្សិត និង ជាចំណីសត្វជាដើម។ ឯកឧត្តមអោយដឹងទៀតថា ទន្ទឹមនោះ វិស័យកសិកម្មកំពុងត្រូវបានយកចិត្តទុកដាក់លើការកែលំអនូវប្រព័ន្ធធារាសាស្ត្រ ការស្តារ និងជួសជុលភ្លឺអាង ការប្រើប្រាស់បច្ចេកវិទ្យាទំនើប ការធ្វើស្រែតាមបែបប្រពលវប្បកម្មជាដើម ជាពិសេសពិធីបុណ្យស្រូវនេះ គឺជាឱកាសផ្សព្វផ្សាយពីផលិតផលសក្តានុពលកសិកម្មរបស់ខេត្តបន្ទាយមានជ័យ ទៅកាន់ទេសចរអន្តរជាតិ។
លោក Jon Miho អគ្គនាយកទីភ្នាក់ងារវិនិយោគពាណិជ្ជកម្មកូរ៉េ KOTRA បានអោយដឹងថា កិច្ចសហការក្នុងការគាំទ្ររៀបចំពិធីបុណ្យស្រូវនេះ ពីសំណាក់ទីភ្នាក់ងារវិនិយោគពាណិជ្ជកម្មកូរ៉េ KOTRA ក្នុងទ្រង់ទ្រាយតូចក៏ពិតមែន តែនៅពេលអនាគតយើងនឹងបង្កើននូវទំហំពិធីបុណ្យនេះដើម្បីបង្កើននូវការទាក់ទាញភ្ញៀវទេសចរណ៏តាមរយៈការបង្កើតនូវសួនវង្វែងដែលធ្វើពីចំបើង បរិវេនសិល្បៈរូបភាពធ្វើអំពីស្រូវ និងសួនរូបចំលាក់ ដើម្បីធ្វើអោយតំបន់នេះក្លាយជាតំបន់កសិ-ទេសចរណ៏ នៅក្នុងប្រទេសកម្ពុជា។ តាមរយៈកិច្ចសហប្រតិបត្តិការនេះ និងជួយទ្រទ្រង់ផងដែរ ក្នុងការទាក់ទាញអោយមានការទទួលស្គាល់កាន់តែច្រើននូវអង្កររបស់ប្រទេសកម្ពុជាដែលជាអង្ករមួយមានគុណភាព ដែលនេះជាកត្តាមួយក្នុងការទទួលបាននូវទីផ្សារបរទេសថ្មីៗសំរាប់អង្កររបស់កម្ពុជា។ លើសពីនេះវានឹងផ្តល់ប្រភពចំណូលដ៏ទៀងទាត់មួយពីការបង្កើតសួនវង្វេង កសិដ្ឋានស្ទូចត្រីទ្រង់ទ្រាយតូច សំរាប់ប្រជាជនដែលស្ថិតនៅក្នុងតំបន់គម្រោង ដែលប្រភពចំណូលនេះក៏ទាក់ទងផងដែរទៅនឹងគម្រោងការពារទឹកជំនន់ឧស្សាហ កម្មទេសចរណ៏ និងអាជីវកម្មគ្រឿងយន្តកសិកម្ម ដែលទាំងនេះគឺជាវិភាគទានមួយ ក្នុងការអភិវឌ្ឍន៏នៅក្នុងខេត្ត។ នៅក្នុងន័យនេះមានបំណងចង់ធ្វើអោយប្រសើរឡើងនូវការទាក់ទាញទេសចរណ៏ តាមរយៈការធ្វើអោយសម្បូរបែបនូវប្រភពទេសចរណ៏នៅក្នុងខេត្តដែលស្ថិតនៅក្បែរអង្គរវត្តមួយនេះក៏ដូចជាការទ្រទ្រង់នូវការអភិវឌ្ឍន៏តាមរយៈការបង្កើននូវចំណូលរបស់ប្រជាជនក្នុងខេត្ត។
ឯកឧត្តម បណ្ឌិត ថោង ខុន មានប្រសាសន៍ថា ការរៀបចំព្រឹត្តិការណ៍បុណ្យស្រូវ និងបុណ្យចំបើងនេះមិនត្រឹមតែអាចជួយផ្សព្វផ្សាយសក្ដានុពលកសិ-ទេសចរណ៍នៅកម្ពុជា និងជំរុញការអភិវឌ្ឍហេដ្ឋារចនាសម្ព័ន្ធនានាប៉ុណ្ណោះទេ ប៉ុន្តែព្រឹត្តិការណ៍នេះក៏អាចទាក់ទាញចំណាប់អារម្មណ៍ពីក្រសួង-ស្ថាប័នពាក់ព័ន្ធផ្សេងៗ វិស័យឯកជន និងប្រជាពលរដ្ឋក្នុងមូលដ្ឋានឱ្យយកចិត្តទុកដាក់កាន់តែខ្ពស់ថែមទៀតក្នុងការថែរក្សាអភិរក្សធនធានធម្មជាតិនិងវប្បធម៌នៅកម្ពុជា។ ឯកឧត្តមបានបន្ថែមទៀតថា ផលិតផលទេសចរណ៍អាចត្រូវបានបែងចែកជា២ប្រភេទគឺ ទេសចរណ៍មហាជន (Mass Tourism) និងទេសចរណ៍ពិសេស (Niche Tourismor Alternative tourism) ដែលរួមមានដូចជា អេកូទេសចរណ៍ ទេសចរណ៍ផ្សងព្រេង ទេសចរណ៍ទីក្រុង និងកសិ-ទេសចរណ៍ ជាដើម។ ក្នុងន័យនេះ កសិ-ទេសចរណ៍ (Agritourism or Agrotourism) សំដៅដល់ការប្រើប្រាស់សកម្មភាពកសិកម្មដើម្បីបម្រើជូនភ្ញៀវទេសចរ ដែលមានដូចជាការស្នាក់នៅតាមកសិដ្ឋាន (Farm Stay) ការរស់នៅដោយផ្ទាល់ជាមួយប្រជាកសិករក្នុងរយៈពេលខ្លី (Field Stay) តាមរយៈការរៀបចំឲ្យមានជាផ្ទះស្នាក់ (Homestay ឬ Chambre d’Hôtes) ការទិញប្រើប្រាស់នូវកសិផល ឬផលិតផលដោយផ្ទាល់ពីកសិករ ការចុះកម្មសិក្សាស្វែងយល់ពីបច្ចេកទេសដាំដំណាំជាដើម ដែលគោលបំណងសំខាន់គឺផ្តល់ប្រាក់ចំណូលដោយផ្ទាល់ទៅដល់ដៃប្រជាកសិករ។ លើសពីនេះទៀត ការអភិវឌ្ឍកសិ-ទេសចរណ៍នឹងជម្រុញទាក់ទាញអោយមានសកម្មភាពទេសចរណ៍ដូចជា ទេសចរណ៍យុវជន ទេសចរណ៍ស្មគ្រចិត្ត និងទេសចរណ៍ផ្សងព្រេងជាដើម។
ឯកឧត្តមបានបញ្ជាក់ទៀតថា ព្រឹត្តិការណ៍នេះក៏រួមចំណែកយ៉ាងសំខាន់ដល់ការពង្រឹងសមត្ថភាពការកែលម្អគុណភាពសេវាកម្មក្នុងឧស្សាហកម្មទេសចរណ៍ និងការលើកកម្ពស់ការយល់ដឹងជាសាធារណៈអំពីអច្ឆរិយៈភាពនៃវប្បធម៌ដ៏ចំណាស់នៃការដាំដំណាំស្រូវរបស់បុព្វបុរសខ្មែរ ដែលជាការចូលរួមបង្កើននូវកិត្យានុភាពនិងភាពទាក់ទាញបន្ថែមទៀតសម្រាប់វិស័យទេសចរណ៍កម្ពុជា។គួរបញ្ជាក់ថា សម្រាប់ខេត្តបន្ទាយមានជ័យឆ្នាំ២០១៥ មានបរិមាណស្រូវនាំចេញប្រហាក់ប្រហែលឆ្នាំ២០១៤ ទោះបីជាប្រឈមនិងបញ្ហាគ្រោះរាំងស្ងួតតំបន់មួយចំនួនក៏ដោយ៕
