សៀមរាប : ដើម្បីចូលរួមកាត់បន្ថយគ្រោះថ្នាក់ចរាចរណ៍នៅកម្ពុជា មួកសុវត្ថិភាពចំនួន ១៦០មួក ដែលបានការឧបត្ថមពីអង្គការសុខភាពពិភពលោក និង អង្គការដៃគូសុវត្ថិភាពចរាចរណ៍សកល បានរៀបចំធ្វើសិក្ខាសាលា ស្តីពីការលើកកម្ពស់ការយល់ដឹងអំពីការពាក់មួកសុវត្ថិភាព និងមិនបើកបរក្រោមឥទ្ធិពលគ្រឿងស្រវឹងនៅក្នុងខេត្តសៀមរាប កាលពីព្រឹកថ្ងៃទី ២៧ ខែ ឧសភា ឆ្នាំ ២០១៤ ក្រោមអធិបតីភាពលោកជំទាវ គួយ ណាលីន អនុប្រធានគណៈកម្មាធិ ការសាខា
កាកបាទក្រហមកម្ពុជាខេត្តសៀមរាប លោក ស្ទីវិន អ៊ីឌីន តំណាងអង្គការសុខភាពពិភពលោក បានចូលរួមផងដែរ។ ក្នុងបទបង្ហាញរបស់លោក ខឹម សុផល ប្រធានគម្រោងសុវត្ថិភាពចរាចរណ៍កាកបាទក្រហមកម្ពុជា បានឲ្យដឹងថា សិក្ខាសាលានេះមានការដង្ហើរក្បូននៅតាមដងផ្លូវទីសាធារណៈ ដោយយុវជន និងអ្នកស្ម័គ្រចិត្តនៃសាខាកាកបាទក្រហម ក្នុងគោលបំណងបង្កើនការយល់ដឹងអំពីការគោរពច្បាប់ចរាចរណ៍ សុវត្ថិភាពចរាចរណ៍ ដោយផ្តោតលើសារៈ ប្រយោជន៍ នៃការពាក់មួកសុវត្ថិភាពចំពោះអ្នកបើកបរម៉ូតូ និងអ្នករួមដំណើរ ហើយនិងការបើកបរមិនក្រោមឥទ្ធិពលគ្រឿងស្រវឹងចំពោះអ្នកប្រើប្រាស់យានយន្តគ្រប់រូប។
ក្នុងចំណាប់អារម្មណ៍របស់លោក ស្ទីវិន អ៊ីឌីន តំណាងអង្គការសុខភាពពិភពលោក បានឲ្យដឹងថា ការរងរបួស ពិការភាព និងការស្លាប់ ដោយសារគ្រោះថ្នាក់ចរាចរណ៍ គឺជាបញ្ហាសុខភាពសាធារណៈដែលកំពុងតែកើនឡើងគួរឲ្យចាប់អារម្មណ៍។ យោងតាមរបាយការណ៍បឋមនៃប្រព័ន្ធព័ត៍មានជនរងគ្រោះ និងគ្រោះថ្នាក់ចរាចរណ៍ក្នុងឆ្នាំ២០១៣ គឹមានអ្នកស្លាប់ដោយសារគ្រោះថ្នាក់ចរាចរណ៍មាន១៩៥០នាក់ ហើយក្នុងនោះអ្នកស្លាប់ចំនួន១៣៧២នាក់ ស្មើនឹង៧០% នៃអ្នកស្លាប់សរុបគឺជាអ្នកប្រើប្រាស់ម៉ូតូ ដោយមិនមានពាក់មួកសុវត្ថិភាព។
ហើយខេត្តសៀមរាប ក្នុងឆ្នាំ២០១៣ អ្នកស្លាប់ដោយសារគ្រោះថ្នាក់ចរាចរណ៍មាន៩២នាក់ ក្នុងនោះ៥៧នាក់ ជាអ្នកធ្វើដំណើរតាមម៉ូតូ។ មានប្រសាសន៍ក្នុងសិក្ខាសាលានេះលោកជំទាវ គួយ ណាលីន ជាអនុប្រធានគណៈកម្មាធិការកាកបាទក្រហមកម្ពុជាខេត្តសៀមរាប បានគូសបញ្ជាក់ថា ច្បាប់ចរាចរណ៍ផ្លូវគោកថ្មី ដែលដាក់បញ្ផូលមាត្រាតម្រូវឲ្យអ្នករួមដំណើរជាមួយ ត្រូវពាក់មួកសុវត្ថិភាព ហើយនឹងការបង្កើនការផាកពិន័យ ការដាក់ទោសទណ្ឌចំពោះអ្នកបើកបរក្រោមឥទ្ធិពលគ្រឿងស្រវឹង ត្រូវបានរំពឹងថា និងត្រូវបានអនុម័តក្នុងពេលឆាប់ៗនេះ។
ការអនុវត្តច្បាប់ ការផ្សព្វផ្សាយអប់រំសាធារណៈរួមផ្សំជាមួយនិងការចុះប្រតិបត្តិការរឹតបន្តឹងច្បាប់ជាប្រចាំ ដែលធ្វើឡើងដោយកំលាំងនគរបាលចរាចរណ៍ផ្លូវគោក និងចូលរួមចំណែកក្នុងការការពារ និងសង្គ្រោះអាយុជីវិតរបស់ប្រជាជនពីសោកនាដកម្មដែលអាចការពារបាននេះ។ លោកជំទាវ បានបញ្ផាក់ថា ជាលទ្ធផលចំពោះការខិតខំប្រឹងប្រែងរួមគ្នានេះ
ហើយជាពិសេសដោយមានការចូលរួមយ៉ាងសកម្មពីយុវជន និងអ្នកស្ម័គ្រចិត្តកាកបាទក្រហមកម្ពុជា និងពីដៃគូរពាក់ព័ន្ធនានា យើងនឹងអាចឈានទៅសំរេចបាននូវគោលបំណងទសវត្សរ៍សុវត្ថិភាពចរាចរណ៍ផ្លូវគោកក្នុងការកាត់បន្ថយការស្លាប់នៅក្នុងប្រទេសកម្ពុជា ឲ្យបាន៥០%នៅឆ្នាំ២០២០ខាងមុខនេះ ស្របតាមទស្សនវិស័យដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន (ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍)។
បន្ទាប់ពីការប្រគល់មួកសុវត្ថិភាព និង បង្ហាញនូវរបៀបការពាក់មួកសុវត្ថិភាពរួចមក ក្បួនដង្ហែ ដោយប្រើប្រាស់ម៉ូតូ បានដង្ហែទៅតាមដងវិថីនានាក្នុងក្រុងសៀមរាប ព្រមទាំងមានការឃោសនាផ្សព្វផ្សាយ អប់រំ នូវខ្លឹមសារ អត្ថន័យ និង ចែកខិតប័ណ្ណអប់រំ ផ្សព្វផ្សាយ ពីការប្រើប្រាស់មួកសុវត្ថិភាព និង ពេលបើក បរយានយន្ត គ្មានជាតិស្រវឹងទៀតផង ៕ ដោយ លោក ខេង ខេមរា
