ឯកឧត្ដម លន់ លឹមថៃ អភិបាលខេត្ត និងជាប្រធានសាខាកាកបាទក្រហមកម្ពុជា ខេត្តកំពង់ចាម រួមដំណើរជាមួយសមាជិក មាជិកកា សាខាកាកបាទក្រហម គ្រប់លំដាប់ថ្នាក់ និងសប្បុរសជន បានពាំនាំ អំណោយកាកបាទក្រហមកម្ពុជា និងអំណោយរបស់សប្បុរសជន ទៅចែកជូន
ដល់គ្រួសាររងគ្រោះទាំង៣ គ្រួសារ ក្នុង១គ្រួសារៗ ទទួលបានអង្ករ១២២គ.ក្រ សម្ភារៈប្រើប្រាស់
គ្រឿងឧបភោគបរិភោគ ព្រមទាំង ថវិកាចំនួន១លាន ១សែន ៧ម៉ឺនរៀល និងប្រាក់ដុល្លារ១៦០ដុល្លារផងដែរ ។ ឯកឧត្តម លន់ លឹមថៃ បានមានប្រសាសន៍ថា អំណោយទាំងអស់នេះ គឺបានមកពីកាកបាទក្រហមកម្ពុជា ដែលមានសម្ដេចកិត្តិព្រឹត្តបណ្ឌិត ប៊ុនរ៉ានី ហ៊ុន សែន ក្នុងការរួមចំណែកទុក្ខលំបាក ជាពិសេស បងប្អូនដែលរងគ្រោះដោយសារអគ្គិសភ័យនាពេលនេះ ពោលគឺទីណាមានការលំបាក ទីនោះមានកាកបាទក្រហម ។
ឯកឧត្តម លន់ លឹមថៃ មានប្រសាសន៍ដែរថា ក្រៅពីអំណោយមនុស្សធម៌ ជាគ្រឿងបភោគបរិភោគ ក៏ដូចជាសំណូមពរ និងតម្រូវការចាំបាច់ ក្នុងស្ថានភាពជាក់ស្ដែង កាកបាទក្រហមកម្ពុជា បានផ្ដល់អំណោយជាលំនៅដ្ឋាន ចំនួន៣ខ្នង មានទំហំ៤ម គុណ៥ម សាងសង់អំពីឈើ ប្រក់ស័ង្កសី និងជញ្ជាំងស័ង្កសី សម្រាប់បងប្អូនរងគ្រោះទាំង៣គ្រួសារផងដែរ ។ គួរបញ្ជាក់ដែរថា កាលពីវេលាម៉ោង១២យប់ ថ្ងៃទី២១ ខែមិថុនា ឆ្នាំ២០១៤ ត្រូវអគ្គីភ័យលេបត្របាក់ផ្ទះប្រជាពលរដ្ឋ ចំនួន៣ខ្នង ដោយបន្សល់នូវតែគ្រោងឆ្អឹង និងផេះផង់ នៅក្នុងភូមិបឹងកុក១ សង្កាត់បឹងកុក ក្រុងកំពង់ចាម ។
ក្នុងការយកចិត្តទុកដាក់ ពីអាជ្ញាធរគ្រប់លំដាប់ថ្នាក់ និងស្នងការរដ្ឋាននគរបាលខេត្ត បានបញ្ជូនរថយន្តអគ្គីភ័យ៤គ្រឿង បានធ្វើអន្តរាគមន៍បាញ់ទឹកពន្លត់ មិនឲ្យរាលដាលឆ្លងដល់ផ្ទះផ្សេងៗទៀត។ តាមប្រភពប្រជាពលរដ្ឋ បានបញ្ជាក់ថា មូលហេតុបណ្តាលមកពីឆ្លងប្រព័ន្ធអគ្គីសនី ឬគេហៅថា ទូសេខ្សែភ្លើង ពីផ្ទះអ្នកស្រី សុខ សុម៉ន់ថុន ហៅណែត ជាអតីតអ្នកគ្រូបង្រៀន ។
បណ្ដាលឲ្យខូចខាតសម្ភារៈផ្ទះឈើ ប្រកសង្កសីចំនួន៣ខ្នង ៖ ១.ជាផ្ទះអ្នកស្រី សុខ សុម៉ន់ថុន ចំនួន១ខ្នង ម៉ូតូ១គ្រឿង កង់ចំនួន២គ្រឿង និងថវិកាមួយចំនួន ២.ផ្ទះរបស់អ្នកស្រី សុខ សុផារី ហៅពៅ មន្ត្រីនគរបាលខេត្ត ឆេះអស់ ផ្ទះ១ខ្នង ម៉ូតូ២គ្រឿង កំព្យូទ័រ១គ្រឿង និង៣.ផ្ទះឈ្មោះ សុ ភ័ក្រ ផ្ទះ១ខ្នង ចាក់សោចោលទៅរកស៊ី ៕
