ភ្នំពេញ ៖ មុខសញ្ញាចែកចាយថ្នាំញៀន ដ៏សកម្មម្នាក់ ស្ថិតនៅសំណង់មិនរៀបរយ ក្នុងភូមិទី៥ ក្រុម៣២ សង្កាត់ផ្សារដើមថ្កូវ ខណ្ឌចំការមន ត្រូវបានកម្លាំងនគរបាលមូលដ្ឋានឃាត់ខ្លួន និងដកហូតថ្នាំញៀនចំនួន២៥ កញ្ចប់ នៅវេលាម៉ោង ៤ និង៣០នាទី រសៀលថ្ងៃទី១៧ ខែកុម្ភៈ ឆ្នាំ២០១៤នេះ។ មន្ត្រីនគរបាល ប៉ុស្តិ៍ផ្សារដើមថ្កូវ ខណ្ឌ ចំការមន បាននិយាយថា ក្រោយពីទទួល បានសេចក្ដីរាយការណ៍ ពីប្រជាពលរដ្ឋនូវ សកម្មភាពចែកចាយ និងប្រើប្រាស់គ្រឿង ញៀននូវសំណង់មិនរៀបរយ ក្រោយក្រុម ហ៊ុនទូរស័ព្ទ ០១៣ និងក្បែរអធិការដ្ឋាន នគរបាល ខណ្ឌចំការមនរួចមកកម្លាំងសមត្ថ កិច្ចមូលដ្ឋានបានចុះទៅល្បាត ហើយឈាន ទៅដល់ការឃាត់ខ្លួនមុខសញ្ញាដ៏សកម្មខាងលើ រួចហើយដកហូតថ្នាំញៀនចំនួន ២៥ កញ្ចប់ ។
មន្ត្រីនគរបាលប៉ុស្តិ៍ផ្សារដើមថ្កូវបាន បញ្ជាក់ថា ជនសង្ស័យរូបនេះឈ្មោះ ហេង តារា អាយុ ១៧ឆ្នាំ រស់នៅចំណុចកើតហេតុ ខាងលើ និងមានមុខរបរមិនពិតប្រាកដ ។ ជាមួយគ្នានេះ ប្រជាពលរដ្ឋនៅក្បែរកន្លែង កើតហេតុ បានលួចខ្សឹបថា ទីតាំងខាងលើ នេះ ជាកន្លែងចែកចាយ និងប្រើប្រាស់ថ្នាំ ញៀនយ៉ាងសកម្ម ហើយការដាក់លក់ថ្នាំញៀនដូចដាក់លក់ត្រីតាមផ្សារ ។ ប្រជាពលរដ្ឋទាំងនេះ បានប្រាប់ភ្នាក់ងារយកព័ត៌មាននៅទីនោះថា “សូមពូជួយផ្សាយ ផងព្រោះដាក់តាំងលក់ថ្នាំញៀន ដូចដាក់ តាំងលក់ត្រីនៅតាមផ្សារ”។
ក្រោយចាប់ខ្លួន ជនសង្ស័យខាងលើត្រូវបាននាំទៅកាន់ប៉ុស្តិ៍នគរបាល ផ្សារដើមថ្កូវ ដើម្បីសាកសួរ និង ចាត់វិធានការតាមផ្លូវច្បាប់បន្តទៀត ៕
