ក្រុងដាមប័រៈ អ្នកាស្លាប់បានកើនឡើងនៅក្នុងការប្រយុទ្ធវាយឆ្មក់នៅក្រុងមួយនាភាគឧត្តរក្រុងនីហ្សេរីយ៉ា ដោយបានបណ្តាលឲ្យពួកសកម្មប្រយុទ្ធបូកូហារ៉ាមស្លាប់យ៉ាងហោចណាស់៥០នាក់ ទាហាន៦នាក់ និងជនស៊ីវិលជាច្រើននាក់។ នេះបើតាមវេបសាយបរទេសផ្សាយកាលពីថ្ងៃសៅរ៍។សាក្សីឃើញហេតុការណ៍ផ្ទាល់ភ្នែកបានរាយការណ៍ប្រាប់ភ្នាក់ងារព័ត៌មានអេភីថា ក្រុមសកម្មប្រយុទ្ធបូកូហារ៉ាម បានឆ្មក់វាយប្រហារចូលក្រុងដាមប័រនាពេលរៀបភ្លឺថ្ងៃសុក្រ (បច្ចូសសម័យ) ដោយបានដុតផ្ទះ និងបាញ់ប្រហារលើជនស៊ីវិលបណ្តាលឲ្យស្លាប់យ៉ាងច្រើន។
ពួកបូកូហារ៉ាមជាក្រុមប្រដាប់អាវុធ ដែលធ្វើសកម្មភាពវាយប្រហារដូចជារដ្ឋអ៊ីស្លាមដែលពួកគេបានប្រកាសពីមុនមកនៅភាគខាងជើងនីហ្សេរីយ៉ា។ មន្ត្រីអាជ្ញាធរមូលដ្ឋានបាននិយាយថា ជនស៊ីវិលដែលមិនព្រមចុះចាញ់ និងចុះចូលជាមួយពួក គេត្រូវបានពួកសកម្មប្រយុទ្ធបូកូហារ៉ាមបាញ់សម្លាប់។ ពួកគេបានសម្លាប់ប្រជាជន ចាប់ពង្រត់ ស្ត្រី និងកុមារយកទៅលាក់ទុក។ ក្រសួងការពារជាតិនីហ្សេរីយ៉ាបានបញ្ជាក់ថា ពួកសកម្មប្រយុទ្ធបូកូហារ៉ាមស្លាប់យ៉ាងហោចណាស់៥០នាក់ ទាហាន៦នាក់ និងជនស៊ីវិលជាច្រើននាក់។
មិនមានការបញ្ជាក់ពីចំនួន ជនស៊ីវិលដែលស្លាប់នោះទេ តែសាក្សីថា ស្លាប់ច្រើន។ ក្រុងដាមប័រ ត្រូវបានឡោមព័ទ្ធពីរសប្តាហ៍មកហើយ បន្ទាប់ពីពួកសកម្មប្រយុទ្ធបូកូហារ៉ាម វាយប្រហារលើកងរថក្រោះនៃកងវរសេនាតូច ដែលមានមូលដ្ឋាននៅជាយក្រុងទីនោះ កាលពីថ្ងៃទី៤ កក្កដា ២០១៤។ ជាបន្តបន្ទាប់ពួកគេវាយប្រហារលើស្ថានីយប៉ូលិស កាលពីថ្ងៃទី៦ កក្កដា និងការប្រយុទ្ធគ្នា រប៉េះរប៉ោះចេះតែបន្តកើតមានឡើង។ 
សូមបញ្ជាក់ថា ដាមប័រត្រូវបានចាត់ទុកថាជាតំបន់គ្មានសុវត្ថិភាព និងជាតំបន់អសន្តិសុខមួយ ចាប់តាំងពីការប្រយុទ្ធគ្នាលើកទី១មកម្ល៉េះ។ តំបន់ភាគឧត្តរប្រទេសនីហ្សេរីយ៉ានេះតែងតែ ទទួលការរុកកួនពីពួកសកម្មប្រយុទ្ធបូកូហារ៉ាម ហើយទីនោះត្រូវបានដាក់ជាតំបន់អាសន្ន តាំងពីខែឧសភា ឆ្នាំ២០១៣។ អាជ្ញាធររដ្ឋាភិបាលបានប្រឹងប្រែងប្រយុទ្ធនឹងពួកឧទ្ទាមនេះដែរ ប៉ុន្តែមិនទទួលបានជោគជ័យនោះទេ រហូតដល់មានការស្វះស្វែងរកជំនួយពីមហាអំណាចពិភពលោកដូចជា សហរដ្ឋអមេរិក អង់គ្លេស បារាំង ចិន ដើម្បីរំដោះស្ត្រី និងកុមារសិស្សសាលាដែលចាប់ពង្រត់ជាង២០០នាក់ កាលពីខែមេសា ឆ្នាំ២០១៤ ៕
