ខណ្ឌមានជ័យ រងការរិះគន់ ពីការអនុវត្ត រដ្ឋបាលតាមច្រកចេញចូលតែមួយ ព្រោះប្រជាពលរដ្ឋសុំប្រថាប់ត្រាពីអាជ្ញាធរខណ្ឌ ត្រូវចំណាយសេវាកម្មផ្សេងៗអស់ច្រើន ខុសពីអាជ្ញាធរខណ្ឌមានជ័យចាស់

ភ្នំពេញ៖ ខណ្ឌមានជ័យជាឈ្មោះខណ្ឌចាស់ តែត្រូវផ្លាស់ប្តូរទីតាំងចេញពីទីកន្លែងចាស់មកទីតាំងថ្មីនៅ ក្នុងភូមិសាស្រ្តតំបន់អភិវឌ្ឍន៍លើផ្ទៃដីបឹងទំពុន និងបឹងជើងឯក ស្ថិតក្នុងភូមិសាស្រ្តសង្កាត់៣ រួមមាន សង្កាត់បឹងទំពុន សង្កាត់ចាក់អង្រែលើ សង្កាត់ចាក់អង្រែក្រោម បានដំណើរការសេវាសាធារណៈជូន

ប្រជាពលរដ្ឋរយៈពេលជាងមួយខែកន្លងមកហើយ ក្នុងនោះក៏មានមន្រ្តីរាជការក្នុងសាលាខណ្ឌ មួយចំនួន ក៏ដូចជាប្រជាពលរដ្ឋផងដែរ បានរិះគន់អាជ្ញាធរខណ្ឌមានជ័យថា មិនបានអនុវត្តកិច្ចការ​រដ្ឋបាលផ្សេងៗ តាមច្រកចេញចូលតែមួយ ។

ប្រភពដែលបែកធ្លាយបានបន្តថា បន្ទាប់ពីលោក ពេជ្រ កែវមុនី ត្រូវចូលកាន់ជា​តំណែង​អភិបាលខណ្ឌមានជ័យ មក គេបានសង្កេតឃើញ មន្រ្តីចាស់ៗ មួយក្រុមនិងមន្រ្តីថ្មី​ដែលចូល​កាន់ភារកិច្ច ជាមួយគ្នានឹងលោក ពេជ្រ កែវមុនី បានកំពុងបែកចែកជាក្រុម និងជាបក្ស ជាពួក បំពេញកិច្ចការងាររដ្ឋបាលជូនប្រជាពលរដ្ឋ ក្នុងគោលបំណងរកផលប្រយោជន៍រៀងៗខ្លួន ជាហេតុធ្វើឲ្យការសុំបញ្ជាក់លិខិតស្នាមរដ្ឋបាលផ្សេងៗ ដែលប្រជាពលរដ្ឋសុំប្រថាប់ត្រាពីអាជ្ញាធរខណ្ឌ ត្រូវចំណាយសេវាកម្មផ្សេងៗអស់ច្រើន ខុសពីអាជ្ញាធរខណ្ឌមានជ័យចាស់ ។ ផ្តើមចេញពីបាតុ​ភាព​បែបនេះ ត្រូវបានប្រជាពលរដ្ឋរិះគន់ថា អាជ្ញាធរខណ្ឌមានជ័យ កំពុងបង្កើតអំពើពុករលួយ នៅផ្ទៃក្នុង និងមិនបានអនុវត្តតាមគោលការណ៍ច្រកចេញចូលតែមួយ របស់រាជរដ្ឋាភិបាល ។

ជុំវិញបាតុភាពខាងលើនេះ លោក ពេជ្រ កែវមុនី អភិបាលខណ្ឌមានជ័យ បានបកស្រាយ​ប្រាប់​អ្នកយកព័ត៌មានតាមទូរស័ព្ទថា ខណ្ឌមានជ័យ ជាឈ្មោះខណ្ឌចាស់ តែត្រូវ​រើផ្លាស់ពីទីតាំងចាស់ មកតែខ្លួនតែប៉ុណ្ណោះ ដូច្នេះបញ្ហាច្រកចេញចូលតែមួយ លោក​ទទួលស្គាល់ថា មិនទាន់​បាន​អនុវត្តត្រឹមត្រូវមែន ព្រោះមិនទាន់មានទីតាំងបំពេញការងារច្បាស់លាស់ ។ ហើយបញ្ហានេះ​លោកក៏បានធ្វើរបាយការណ៍ជម្រាបទៅក្រសួងមហាផ្ទៃរួចរាល់ដែរ ដូច្នេះរង់ចាំពេលសាងសង់អាគារថ្មី នៅដើមឆ្នាំ២០១៥ យើងនឹងមានច្រកចេញចូល ជាមួយគ្នានោះតែម្តង ។ ទោះជាយ៉ាងណាក៏ដោយ ប្រជាពលរដ្ឋក៏ដូចជាមន្រ្តីក្នុងសាលាខណ្ឌមានជ័យ មួយចំនួន បានខ្សឹបប្រាប់ឲ្យដឹងថា នេះជា​ឱ​កាស​មួយដែលមន្រ្តីខិលខូចកំពុងខ្វែងដៃ ខ្វែងជើង ប្រមូលរកផលប្រយោជន៍ ខុសច្បាប់ ៕