ខេត្តកំពង់ចាម៖ ព្រះឧត្តមប្រិយ៍ជា អន ធាងអាន ព្រះរាជាគណៈថ្នាក់កិតិ្តយស និងជាព្រះមេគុណស្តីទី ខេត្តកំពង់ចាម អមដំណើរដោយព្រះឃោសវិសុទ្ធិ ស៊ឹម សយ៉ុង រាជាគណៈថ្នាក់កិតិ្តយស និងជាព្រះចៅអធិការវត្តសារាវន្ត តេជោភ្នំពេញព្រះឃោសបាល យក់កុយ រាជាគណៈថ្នាក់
![Snapshot[2]](https://i0.wp.com/khemaradaily.com/wp-content/uploads/2014/07/Snapshot2.jpg?resize=420%2C336&ssl=1)
កិត្តិយស ព្រះធម្មធរអនុគណខ័ណ្ឌដូនពេញ និងជាចៅអធិការស្តីទីវត្តកោះព្រះញានឧត្តម គង់ សារី រាជាថ្នាក់កិត្តិយស ព្រះវិន័យធរអនុគណខ័ណ្ឌសែនសុខ និងជាព្រះចៅអធិការវត្តទឹកថ្លា ភ្នំពេញ ព្រះគ្រូ ស ឡាំង អនុគណស្រុកបាធាយព្រមទាំង ព្រះមន្ត្រីសង្ឃ និងអាជ្ញាធរស្រុកបាធាយ កាលពីថ្ងៃទី២៣ ខែកក្កដា ឆ្នាំ២០១៤ បាននាំយកអំណោយមនុស្សធម៌ ទៅចែកជូនប្រជាពលរដ្ឋរងគ្រោះដោយខ្យល់ព្យុះ ចំនួន ១១គ្រួសារនៅភូមិអកទៀងឃុំតាំងក្រាំងស្រុកបាធាយ ខេត្តកំពង់ចាម ។ 
តាមការបញ្ជាក់ របស់លោក ឡោ ចាន់លី អភិបាលស្រុកបាធាយ បានឲ្យដឹងថាកាលពីថៃ្ងទី២០ ខែកក្កដា ឆ្នាំ២០១៤ វេលាម៉ោង៣.៣០នាទីល្ងាច នៅក្នុងភូមិអកទៀង ឃុំតាំងក្រាំង ស្រុកបាធាយ ខេត្តកំពង់ចាម មានខ្យល់ព្យុះបណ្តាលឲ្យរលំផ្ទះប្រជាពលរដ្ឋ ចំនួន ៨ខ្នង បាក់ទាំងស្រុង និងផ្ទះ៣ខ្នង ទៀតបានខូចខាតតិចតួចដោយពុំមានគ្រោះថ្នាក់ដល់អាយុជីវិត របស់ប្រជាពលរដ្ឋឡើយ ។ ព្រះឧត្តមប្រិយ៍ជា អន ធាងអាន មានថេរដីកាថា ៖ អំណោយសម្បុសធម៌ទាំងនេះ បានមកពីការសហការគ្នារវាងព្រះសង្ឃ និងពុទ្ធបរិស័ទគ្រប់ទិសទី ដើម្បីជួយដល់ប្រជាពលរដ្ឋ ឬពុទ្ធបរិស័ទ ទីទ័លក្រ និងជាជនងាយរងគ្រោះ ដោយសារកត្តាហានិភ័យផ្សេងៗ ។
មួយចំណែកទៀត ទានទាំងអស់នេះដែរ គឺជាបុណ្យកុសលរបស់ម្ចាស់ទានជាសប្បុរសជនានាដើម្បីរួមចំណែក នៅក្នុងវិស័យព្រះពុទ្ធសាសនា ផងដែរ ។ព្រះឧត្តមប្រិយ៍ជា អន ធាងអាន មានថេរដីកាបន្តថា ការបរិច្ចាកនូវទានទាំងអស់នេះដែរ គឺមិនប្រកាន់នូវពូជសាសន៍សាសនាពណ៌សម្បុរ និង និន្នាការនយោបាយឡើយដើម្បីរួមចំណែកនូវភាពខ្វះខាត សម្រាប់ដោះស្រាយជីវភាពបានមួយរយៈពេល ផងដែរ។ ព្រះឧត្តមប្រិយ៌ជា អន ធាងអាន បានមានថេរដីកាផ្តាំផើ្ញ ចំពោះប្រជាពលរដ្ឋរងគ្រោះទាំងអស់ មិនត្រូវអស់សង្ឃឹមក្នុងជីវិតឡើយ គឺត្រូវពុះពារ តស៊ូថែរក្សាសុខភាពឲ្យបានល្អ ដើម្បីរស់រានមានជីវិត ចិញ្ចឹមបីបាច់កូនចៅតទៅមុខទៀត ។![Snapshot[3]](https://i0.wp.com/khemaradaily.com/wp-content/uploads/2014/07/Snapshot3.jpg?resize=420%2C336&ssl=1)
សូមបញ្ជាក់ផងដែរថា អំណោយដែលចែកជូនប្រជាពលរដ្ឋរងគ្រោះទាំង១១គ្រួសារក្នុង ១គ្រួសារៗទទួលបានអង្ករ ១ប៊េ ស្មើនឹង ៥០គីឡូក្រាមមី ១កេសទឹកត្រី១យួរនិងថវិកា២០ម៉ឺនរៀលសរុបអំណោយទាំងអស់មាន ៖ អង្ករ១១ប៊េ ស្មើនឹង ៥៥០គ.ក្រ មី ២៩កេស ទឹកត្រី ១២យួរ ទឹកស៊ីអ៊ីវ ១យួរ និងបច្ច័យ ២.៤៧០.០០០រៀល ។ ដោយឡែកឯកឧត្តម លន់ លឹមថៃ អភិបាលនៃគណៈអភិបាលខេត្តកំពង់ចាម និងលោកជំទាវ បានឧបត្ថម្ភបន្ថែមដល់រងគ្រោះធ្ងន់ចំនួន ៨គ្រួសារក្នុង ១គ្រួសារៗ នូវសង្កសីចំនួន ១៥សន្លឹកផងដែរ។ ក្រៅអំពីអំណោយចែកជូនជនរងគ្រោះទាំង ១១គ្រួសារនេះដែរព្រះសង្ឃ និងសហការី ក៏បានយកអំណោយជាទានទៅចែកជូនកុមារាកុមារី និងជនក្រីក្រមួយចំនួនទៀត ផងដែរ៕
