ដើម្បីអនុវត្តឲ្យកាន់តែមានប្រសិទ្ធភាព នូវបទបញ្ជាលេខ០១បប របស់រាជរដ្ឋាភិបាលកម្ពុជា និង ដោយការយកចិត្តទុកដាក់ខ្ពស់ជាប្រចាំពីរបស់ ឯ.ឧ ឃឹម ប៊ុនសុង អភិបាលនៃគណៈអភិបាលខេត្ត និង ជាប្រធានគណៈបញ្ជាការឯកភាពរដ្ឋបាលខេត្ត និង លោកឧត្តមសេនីយ៌ត្រី ម៉ន សាម៉ុន
មេបញ្ជាការកងរាជអាវុធហត្ថខេត្តសៀមផងនោះ នៅពេលរាត្រីថ្ងៃទី១៦និង១៧ ខែសីហា ឆ្នាំ២០១៤ម្សិលមិញនេះក្រោមការសម្របសម្រួលដឹកនាំដោយលោក សំរឹទ្ធ សុខុន ព្រះរាជអាជ្ញារងសាលាដំបូងខេត្តសៀមរាបលោកវរសេនីយ៌ឯក ស្រី យូរ៉ា មេបញ្ជាការរងនៃទីបញ្ជាការដ្ឋានកងរាជអាវុធហត្ថខេត្តសៀមរាប និងជាប្រធានមន្ទីរស្រាវជ្រាវនិងយុត្តិធម៌ បានបញ្ជាដឹកនាំកម្លាំងកងរាជអាវុធហត្ថខេត្ត ចុះធ្វើប្រតិបត្តិការ បង្ក្រាបបទល្មើសនេសាទ នៅរដូវបិទនេសាទ នៅតំបន់បឹងទន្លេសាប ក្នុងភូមិសាស្ត្រ តំបន់មាត់ខ្លា ក្នុង ឃុំអន្លង់សំណ ស្រុកជីក្រែង ខេត្តសៀមរាប ក្នុងនោះដោយបានប្រើប្រាស់នូវមធ្យោបាយ ជាកាណូតចំនួន ០៣គ្រឿង កម្លាំង១៥នាក់ ។
ក្នុងសកម្មភាពការចុះបង្ក្រាបបទល្មើសនេសាទនេះកម្លាំងសមត្ថកិច្ចកងរាជអាវុធហត្ថយើង បានធ្វើការបង្ក្រាប នូវឧបករណ៍ឆ្នុក ដែលប្រជានេសាទបានប្រើប្រាស់នូវអំពូលភ្លើងព័ណ៌ដើម្បីទាក់ទាញត្រីគ្រប់ប្រភេទ ទាំងតូចទាំងធំ ហើយដែលជាឧបករណ៍ត្រូវរដ្ឋបានហាមឃាត់ ដែលធ្វើឲ្យភ្លឺពេញផ្ទៃទឹកបឹងទន្លេសាបប្រៀបបានជាទីក្រុងទៅហើយ នៅតំបន់មាត់ខ្លា ។ នៅក្នុងរាត្រីថ្ងៃទី១៦ ខែសីហា នេះ កម្លាំងកងរាជអាវុធហត្ថខេត្តបានធ្វើការបំផ្លាញនូវឧបករណ៍ ឆ្នុក ចំនួន១៦ឆ្នុក នឹង ដកហូតបាននូវ អាគុយ ចំនួន ០៨គ្រឿងអំពូលភ្លើងម៉ែត្រព័ណ៌ ចំនួន១៦ដើម កាណូតសម្រាប់ធ្វើសកម្មភាពបទល្មើស ចំនួន ០៥គ្រឿង ព្រមទាំងបានឃាត់ខ្លួនជនល្មើសកំពុងធ្វើសកម្មភាពបានចំនួន០៧នាក់ភេទប្រុស ក្នុងនោះមានជនជាតិវៀតណាម ០៣នាក់ និង ជនជាតិខ្មែរ ០៤នាក់ដែលជាកម្មករនេសាទ។
លុះនៅព្រឹកថ្ងៃទី១៧ ខែឆ្នាំដដែលកម្លាំងសមត្ថកិច្ចយើង បានបន្តបេសកកម្មរបស់ខ្លួន ក្នុងការបង្ក្រាបបទល្មើស ជលផល នៅក្នុងតំបន់មាត់ខ្លាដដែលដោយបានធ្វើការចុះរុះរើបំផ្លាញនូវឧបករណ៍ បរ នឹងបានដកហូតយកនូវក្បាល បរ បានចំនួន ០៨មាត់និងបានប្រលែងកូនត្រីគ្រប់ប្រភេទចូលទៅក្នុងបឹងធម្មជាតិវិញ ប្រមាណ ៥០០គីឡូក្រាម ព្រមទាំងបានធ្វើការឃាត់ខ្លួនម្ចាស់បរ បាន០១នាក់ ភេទប្រុស ជាជនជាតិខ្មែរ និង កាណូតដែលជាមធ្យោបាយធ្វើសកម្មភាពបាន០១គ្រឿងផងដែរ ។
ក្នុងថ្ងៃដដែលនោះដែរកម្លាំងសមត្ថកិច្ចកងរាជអាវុធហត្ថខេត្តក៏បាននាំយកជនល្មើសទាំង៨នាក់ និង ឧបករណ៍ សម្ភារៈដែលជាវត្ថុតាងមានកាណូត មាត់បរ និងសាច់មង ទៅប្រគល់ជូនដល់កម្លាំងសមត្ថកិច្ចរដ្ឋបាលជលផល សង្កាត់ កំពង់ឃ្លាំង មាននីតិវិធីបន្តដើម្បីកសាងសំណុំរឿងបញ្ជូនទៅកាន់សាលាដំបូងខេត្តសៀមរាប ចាត់ការបន្តទៅតាម នីតិវិធីច្បាប់បន្ត។
សូមបញ្ជាក់ផងដែរថា កាលពីថ្ងៃទី១២ខែសីហា នេះដែរ កម្លាំងសមត្ថកិច្ចកងរាជអាវុធហត្ថខេត្តសៀមរាប ក៏បាន ចុះធ្វើការបង្ក្រាបបទល្មើសនេសាទនៅតំបន់មេជ្រៃ ក្នុងភូមិសាស្ត្រឃុំកែវព័ណ៌ ស្រុកពួក ខេត្តសៀមរាប ដោយបាន ដក ហូតនូវ ក្បាលបរចំនួន ០៥មាត់សាច់មង ប្រវែង ៥០០ម៉ែត្រផងដែរ។ដូច្នេះរាល់សកម្មភាពការបង្ក្រាប់បទល្មើសនេសាទនេះ កម្លាំងកងរាជអាវុធហត្ថខេត្ត បានអនុវត្តដូចភ្លៀងរលឹម ក្នុងការថែរក្សា អភិរក្សនូវធនធានពូជមច្ឆាជាតិនៅ បឹងទន្លេសាប ឲ្យមានការកើនឡើង ដើម្បីបំពេញនូវតម្រូវការប្រចាំថ្ងៃរបស់ប្រជាជនកម្ពុជា។
ម្យ៉ាងទៀតនៅពេលកន្លងមក រដ្ឋបាលជលផលក៏បានបើកយុទ្ធនាការចុះបង្ក្រាបបទល្មើសនេសាទ នៅតាម បណ្តាខេត្តជាប់បឹងទន្លេសាប ហាក់បីដូចគ្មានប្រសិទ្ធភាព។ដូច្នេះសូមឲ្យឯកឧត្តមប្រតិភូរាជរដ្ឋាភិបាលទទួលបន្ទុក នាយកដ្ឋានរដ្ឋបាលជលផល សូមជួយពិនិត្យមើលចំពោះមន្ត្រីក្រោមឱវាទរបស់ខ្លួន ដែលមានការឃុបឃិតជាមួយជនល្មើស ដើម្បីបម្រើនូវផលប្រយោជន៍របស់ខ្លួនទៀតផង ៕
