ភ្នំពេញ ៖ ក្រុមចោរមួយគ្រឿងមានគ្នាជិត៦នាក់បានធ្វើសកម្មភាពវាយប្លន់យកម៉ូតូពីបុរស២នាក់ ដែលកំពុងឈប់ម៉ូតូ និយាយទូរស័ព្ទនៅក្បែរសួនច្បាររង្វង់មូលកួចកាណុង បានដោយសុវត្តិភាព ហើយខណៈនោះក៏មានយុវជន២នាក់ ទៀតត្រូវក្រុមចោរនេះព្រួតវាយប្លន់យកម៉ូតូស្កូបពីមួយគ្រឿងផងដែរ តែមិនបានសម្រេច កាលពីវេលាម៉ោង ១២និង២០នាទីយប់ឈានចូលថ្ងៃទី២៤ខែកុម្ភៈឆ្នាំ២០១៤ តាមបណ្ដោយផ្លូវព្រះមុនីវង្ស ក្នុងសង្កាត់ស្រះចក ខណ្ឌដូនពេញ។
យោងតាមសម្ដីរបស់ជនរងគ្រោះដែលត្រូវគេវាយប្លន់យកម៉ូតូខាងលើនេះបានឱ្យដឹងថាគាត់ឈ្មោះ សេង ប៊ុនរិទ្ធ អាយុ៣២ឆ្នាំមុខរបរធ្វើការឯកជន ស្នាក់នៅភូមិស្ពានខ្ពស់ សង្កាត់គីឡូម៉ែតលេខ៦ ខណ្ឌឫស្សីកែវ ហើយនិងម្នាក់ទៀត ដែលអង្គុយពីក្រោយគាត់ឈ្មោះ គន្ធា អាយុ៣១ឆ្នាំមុខរបរធ្វើការឯកជន មានស្នាក់នៅ ជាមួយគ្នាគាត់ទើបតែចេញ ពីកន្លែងញ៉ាំអីជាមួយមិត្តភ័ក្តិដ៏ទៃទៀតខណៈនោះពេលដែលពួកគាត់ជិះមកដល់ក្បែរនិងស្ថានទូតបារាំងគាត់ក៏បានទៅឈប់ក្បែរសួនច្បាររង្វង់មូលកួចកាណុង ហើយក៏លើទូរស័ព្ទនិយាយ ស្រាប់តែពេលនោះមាន
មនុស្ស៦នាក់ បានដើរសំដៅមករកពួកគាត់រួចក៏បានស្រែកដាក់ពួកគាត់ថា ហ្អែងមើលមុខអញធ្វើអី? រួមមនុស្សទាំង៦នាក់ នោះធ្វើសកម្មភាពព្រួតវាយទៅលើពួកគាត់ ធ្វើអោយពួកគាត់ភ័យខ្លាំងពេកក៏រត់ចូលម៉ូតូរបស់ខ្លួនមួយគ្រឿង ម៉ាកឌ្រីមសង់C125 ពណ៌ខ្មៅ ស៊េរី២០០៥ ពាក់ស្លាកលេខ ភ្នំពេញ 1B-2319 នៅកន្លែងកើតហេតុនោះ រួចក៏មនុស្សមួយក្រុមនោះបានឡើងជិះម៉ូតូរបស់គាត់តែម្ដង។
ទាក់ទិននិងករណីខាងលើនេះក៏មានយុវជន២នាក់ផងដែរត្រូវក្រុមចោរប្លន់ខាងលើនេះចង់វាយប្លន់យកម៉ូតូស្កូបពីមួយគ្រឿងដែរតែមិនបានសម្រេចព្រោះបានប្រជាពលរដ្ឋជួយនាំគ្នាស្រែកនិងអន្តរាគមន៍កុំអីក្រុមចោរនោះយកបានម៉ូតូមួយគ្រឿងទៀតទៅបាត់ដែរ។
ក្រោយពេលកើតហេតុជនរងគ្រោះបានត្រឹមតែមកដាក់ពាក្យបណ្ដឹងនៅប៉ុស្តិ៍នគរបាលស្រះចកតែប៉ុណ្ណោះគ្មានឃើញ សមត្ថកិច្ចទៅអន្តរាគមន៍នៅកន្លែងកើតហេតុនោះទេទាល់តែជនរងគ្រោះមកដល់ពាក្យបណ្ដឹងដោយខ្លួនឯង។
ចំពោះករណីខាងលើនេះផងដែរជាករណីមិនមែនត្រឹមតែកើតម្ដងនោះទេតែសមត្ថកិច្ចហាក់បីដូចជាគ្មានវិធានការចាប់ក្រុមចោរដែលតែងតែវាយប្លន់ដល់ប្រជាពលរដ្ឋដែលមកកំសាន្តលេងនៅសួនច្បារគួចកាណុងនេះបាននៅឡើយទេទោះជាមានការរិះគន់យ៉ាងណាក៏ដោយ៕
