ភ្នំពេញ៖ នារីម្នាក់ត្រូវរងរបួសធ្ងន់ធ្ងរនិងម្នាក់ទៀតរងរបួសស្រាលខណៈពួកគេទាំងបីនាក់ជិះម៉ូតូមួយគ្រឿងម៉ាក ហ្វីណូ ពណ៌ក្រហមលាយស ពាក់ស្លាកលេខភ្នំពេញ 1AY-7262 ហើយត្រូវរថយន្តមួយគ្រឿងម៉ាកបាហ្សេរ៉ូ ពណ៌ទឹកប្រាក់ ពាក់ស្លាកលេខភ្នំពេញ2B-5338 ដែលបើកបរដោយបុរសចំណាស់ម្នាក់ស្ថិតក្នុងស្ថានភាពស្រវឹង បានជ្រុលល្បឿនបុកពីក្រោយពេញទំហឹង កាលពីវេលាម៉ោង ២១និង០០នាទីយប់ថ្ងៃទី២៤ កុម្ភះ ឆ្នាំ២០១៤ ស្ថិតតាមបណ្តោយផ្លូវ៤៣២ កែងផ្លូវលេខ២៧១ ក្នុងសង្កាត់ទួលទំពូងទី២ ខណ្ឌចំការមន។
យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេសង្កេតឃើញនារីរងគ្រោះ ទាំងបីនាក់ខាងលើជិះម៉ូតូមួយគ្រឿងម៉ាកហ្វីណូ ឌុបគ្នាតាមបណ្តោយផ្លូវ៤៣២ ក្នុងទិសដៅពីជើងទៅត្បូងបំណងឆ្ពោះ លើផ្លូវ២៧១ ខណៈនោះស្រាប់តែរថយន្តបង្កខាងលើបានបើកមកបុកពីក្រោយពេញទំហឹងបណ្តាលឲ្យនារីដែលរួមដំណើរ ពីខាងក្រោយត្រូវរងរបួសធ្ងន់ធ្ងរ និងនារីពីរនាក់ផ្សេងទៀតរងរបួសស្រាល។
រីឯរថយន្តបង្កក្រោយកើតហេតុត្រូវបាន ប្រជាពលរដ្ឋដែលរស់នៅជិតកន្លែងកើតហេតុចាប់ឃាត់បានភ្លាមៗតែម្តង។ ក្រោយកើតហេតុសមត្ថកិច្ចមូលដ្ឋានបានចុះអន្តរាគមន៍ធ្វើការសម្របសម្រួលភាគីទាំងសងខាងដោយតម្រូវឲ្យ ភាគីខាងម្ចាស់រថយន្តសងថ្លៃការខូចខាតទាំងអស់ដល់ជនរងគ្រោះដើម្បីបញ្ចប់រឿង៕
