ខេត្តសៀមរាប កិច្ចប្រជុំរបស់សហព័ន្ធផែនការគ្រួសារអន្តរជាតិ ដែលបានដំណើរការទៅពេញមួយថ្ងៃ ដោយ ទទួលបាន លទ្ធផលជាផ្លែផ្កាទៅតាមការរំពឹងទុក ក្រោមកិច្ចដឹកនាំប្រជុំរបស់ ឯ.ឧ ឈិត គឹមយាត អនុប្រធានគណៈកម្មការ កិច្ចការបរទេស សហប្រតិបត្តិការអន្តរជាតិ ឃោលនាការ
និង ព័ត៌មាន នៃព្រឹទ្ធសភាក្នុងនាមជាម្ចាស់ផ្ទះ ក្រោមការសម្រប សម្រួលរបស់អង្គការសមាគមផែនការ គ្រួសារ អន្តរ ជាតិ នៃតំបន់ភាគខាងកើតអាស៊ីអាគ្នេយ៍ និងតំបន់សមុទ្រខាងក្រោម និង អង្គការ AFPPD ដែលមាន០៧ប្រទេស និងអង្គការសង្គមស៊ីវិលចូលរួមនិងត្រូវបានបិទ នៅសណ្ឋាគារសោម៉ាទេវី ខេត្តសៀមរាប ។
កិច្ចប្រជុំនេះធ្វើឡើងក្នុងគោលបំណង ដើម្បីពិភាក្សាផ្លាស់មតិយោបល់ពីអ្នកជំនាញ បច្ចេក ទេសរបស់បណ្តា ប្រទេសនៅក្នុងតំបន់ ក្នុងការទប់ស្កាត់នូវរាល់បញ្ហានានាដែលកើតមានឡើង លើ ពលករចំណាកស្រុក សំខាន់ស្ត្រី និង នារី ។
មានប្រសាសន៍នោះដែរលោកស្រីណូរ៉ា មូរ៉ាត់ប្រធានអង្គការសមាគមផែនការគ្រួសារអន្តរជាតិ នៃតំបន់ភាគខាងកើតអាស៊ីអាគ្នេយ៍ និង តំបន់សមុទ្រខាងក្រោម ដោយបានបញ្ជាក់ថា កិច្ច ប្រជុំ នេះ បានធ្វើឲ្យយើងបានជួបជុំ គ្នាពិភាក្សា ពីបញ្ហាការធ្វើចំណាកស្រុកដោយប្រថុយប្រឋាន គ្មានច្បាប់ត្រឹម ត្រូវពិសេសចំពោះមនុស្សវ័យក្មេងៗ និង និស្សិតហើយកិច្ចប្រជុំនេះដែលជាការងាររបស់សមាជិករដ្ឋសភាដែលបានអញ្ជើញចូលរួម ក្នុងកិច្ចប្រជុំ និង អ្នកពាក់ ព័ន្ធទាំងអស់ ដែលបានកំពុងបំពេញការងារទាំងនេះឲ្យកាន់តែបានយល់ដឹង អំពីតួនាទី ភារកិច្ច និង ការងារចាំបាច់ ដែលត្រូវឆ្លើយតបទៅលើរាល់បញ្ហាដែលកើតឡើងដល់ពលករ។
លោកស្រីបានបន្តទៀតថា កិច្ចប្រជុំនេះ ក៏បានបញ្ហា ពីការទំនាក់ទំនងរបៀបណា រវាងសមាជិករដ្ឋសភានិង អ្នកដែលពាក់ព័ន្ធ ព្រមទាំងអង្គការសង្គមស៊ីវិល ។ ជាសំខាន់ នោះលើការឆ្លុះបញ្ចាំងឲ្យឃើញអំពីរាល់បញ្ហាការខ្វះចន្លោះ ក្នុងការលើកកម្ពស់នូវសុខភាពបន្តពូជផ្លូវភេទ សម្រាប់អ្នកដែលធ្វើការចំណាកស្រុក ។ ម្យ៉ាងទៀត កិច្ចប្រជុំនាពេលនេះ ក៏យើងទទួលបានលទ្ធផលជាផ្លែផ្កាតាមកិច្ចពិភាក្សា ផ្លាស់ប្តូរមតិយោបល់ និង ទទួលបាននូវបទពិសោធន៍ល្អៗ ពីកិច្ចប្រជុំនេះផងដែរ។
មានប្រសាសន៍បិទកិច្ចប្រជុំនេះដែរឯ.ឧឈិត គឹមយាតក៏បានគូសបញ្ជាក់ថា កិច្ចប្រជុំនេះគឺជាគោលដៅ ការពារស្ត្រី និង នារី ជាអ្នកបញ្ចេញពលកម្ម ដែលជាពលករ ធ្វើចំណាកស្រុក ទៅធ្វើការងារនៅក្រៅប្រទេសដែល ទទួលរងនូវបញ្ហាជាច្រើនមកលើពលករយើង ដែលបានធ្វើការនៅក្រៅប្រទេសសំខាន់ស្ត្រី និង នារី ហើយក៏មិនមែន តែពលករកម្ពុជាប៉ុណ្ណោះទេ គឺមានបងប្អូនពលករនៅគ្រប់ប្រទេសដែលបានធ្វើចំណាកស្រុក ក៏មានកើតបញ្ហាដូចគ្នា ។
ឯ.ឧឈិត គឹមយាតក៏បានលើកផងដែរថា ដោយបញ្ហានេះហើយទើបអង្គការសមាគមផែនការគ្រួសារអន្តរជាតិ នៃតំបន់ភាគខាងកើតអាស៊ីអាគ្នេយ៍ និងតំបន់សមុទ្រខាងក្រោម និង អង្គការ AFPPD បានរៀបចំកម្មវិធីប្រជុំនេះឡើង ក្នុង ការផ្លាស់ប្តូរ មតិយោបល់គ្នាទៅវិញទៅមក អំពីប្រទេសជាសមាជិកក្នុងតំបន់ ពិសេសប្រទេសដែលមានពលករ បានធ្វើ ចំណាកស្រុកទៅធ្វើពលកម្មនៅក្រៅប្រទេស រួមមានប្រទេសកម្ពុជា ឡាវ វៀតណាម ថៃ មីយ៉ាម៉ា ហ្វីលីពីន និងប្រទេស ឥណ្ឌូនេស៊ី ដែលបានចូលរួម បញ្ចេញនូវមតិយោបល់នូវរាល់បញ្ហាដែលកើតឡើង ទៅលើពលកររបស់ខ្លួន ដែលបាន ធ្វើចំណាកស្រុកទៅក្រៅប្រទេស ដើម្បីចងក្រងនូវឯកសាររួមមួយ សម្រាប់នៅក្នុងតំបន់ ។
ក្នុងនោះដែរឯកឧត្តមក៏មាន សង្ឃឹមជឿជាក់ផងដែរថា ក្រោយពីកិច្ចប្រជុំនេះទៅ គ្រប់បណ្តាប្រទេសដែលបានចូលរួម និងយកនូវលទ្ធផលដែល ទទួលបានពីកិច្ចប្រជុំនាថ្ងៃនេះ យកទៅអនុវត្តនៅតាមបណ្តាប្រទេសរបស់ខ្លួន ឲ្យទទួលបានជោគជ័យផងដែរ ៕
