កំពង់ចាម៖ អាជ្ញាធរជាតិដោះស្រាយដីធ្លី និងអាជ្ញាធរខេត្តកំពង់ចាម បានបើកកិច្ចប្រជុំនៅសាសាខេត្តកំពង់ចាម ដើម្បីពិនិត្យស្ថានភាព និងប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច តាមបទបញ្ជាលេខ ០១ បប ចុះថ្ងៃទី ០៧ ខែឧសភា ឆ្នាំ២០១៤ របស់រាជរដ្ឋាភិបាល នៅ
សាលាខេត្តកំពង់ចាម ។ របាយការណ៍បានបញ្ជាក់ ខេត្តកំពង់ចាមមុនការបំបែកខេត្ត មានក្រុមហ៊ុនវិនិយោគសម្បទានដីសេដ្ឋកិច្ចចំនួន៨ ក្រុមហ៊ុន ប៉ុន្តែក្រោយការបំបែកខេត្តថ្ងៃទី២ ខែមិថុនា ឆ្នាំ២០១៤ ក្រុមហ៊ុនវិនិយោគសម្បទានដីសេដ្ឋកិច្ចនៅសល់ ចំនួនតែ ១ ក្រុមហ៊ុនតែប៉ុណ្ណោះ គឺក្រុមហ៊ុន អាហ្គ្រោស្តារ វិនិយោគ ដែលមានទីតាំងនៅ ឃុំស្រម៉ ស្រុកជើងព្រៃ ខេត្តកំពង់ចាម ។![Snapshot[4]](https://i0.wp.com/khemaradaily.com/wp-content/uploads//2014/11/Snapshot4.jpg?ssl=1)
ទំហំផ្ទៃដីកិច្ចសន្យាមានចំនួន ១.៩៩២.៥៦ ហិកតា ទំហំផ្ទៃដីក្រោយ ចុះបញ្ជីមានចំនួន១.៩៩៣.៤៨ ហិកតា ប្រភេទដំណាំស្វាយចន្ទី និងឈើហូបផ្លែផ្សេងៗ រយៈពេលវិនិយោគ ៧០ឆ្នាំ ស្ថិតក្រោមការគ្រប់គ្រងរបស់ក្រសួងកសិកម្ម រក្ខាប្រមាញ់ និងនេសាទ ទីតាំង និងទំហំផ្ទៃដីដែលបានឈូសឆាយដាំដុះ និងលទ្ធផលអនុវត្តសម្រេចបានចំនួន ១.៧០០ហិកតា ។ ឯ.ឧ ឧបរដ្ឋមន្ត្រី ប៊ិន ឈិន បានផ្តល់អនុសាសន៍មួយចំនួនដល់សមាជិកអនុគណៈកម្មាការខេត្ត ត្រូវសហការគ្នា ដើម្បីដោះស្រាយនូវរាល់បញ្ហាទំនាស់ ដែលកើតមានឡើងនៅក្នុងភូមិសាស្ត្រខេត្តកំពង់ចាម និងស្នើសុំឲ្យមន្ត្រីជំនាញសមត្ថកិច្ចគ្រប់ជាន់ថ្នាក់សហការគ្នា ដើម្បីកាត់បន្ថយបញ្ហាទមនាស់ដីធ្លីក្នុងខេត្តរបស់ខ្លួន ពិសេសការគ្រប់គ្រងផ្ទៃដីសម្បទានសេដ្ឋកិច្ច ។ អង្គប្រជុំបានពិភាក្សាឯកភាពកាត់បន្ថយទំនាស់ដីធ្លី និងបានឯកភាពកែលំអរចំណុចខ្វះខាតក្នុងការអនុវត្តនាពេលកន្លងមក ដោយបន្តសហការដោះស្រាយឲ្យបានល្អដើម្បីបង្កើននូវជំនឿរបស់ប្រជាជនមកលើ ការដឹកនាំរបស់រាជរដ្ឋាភិបាល ។![Snapshot[2]](https://i0.wp.com/khemaradaily.com/wp-content/uploads//2014/11/Snapshot21.jpg?ssl=1)
ឯ.ឧ ឧបនាយករដ្ឋមន្ត្រី បានរំលឹកអំពីការអនុវត្តបទបញ្ចាលេខ ០១ បប ចុះថ្ងៃទី១០ខែឧសភា ឆ្នាំ២០០៦ ស្តីពីការទប់ស្កាត់ការកាប់រានដីព្រៃឈើយកមកធ្វើជាដីកម្មសិទ្ធ ដោយបានបញ្ជាក់ថា ដោយសារស្ថានភាពប្រជាពលរដ្ឋមានការកើនឡើងឥតឈប់ឈរ ខេត្តកំពង់ចាម នៅពេលនេះហាក់ពុំមានសល់ដីព្រៃឈើទៀតទេ ។![Snapshot[3]](https://i0.wp.com/khemaradaily.com/wp-content/uploads//2014/11/Snapshot31.jpg?ssl=1)
ទោះជាយ៉ាងនេះក៏ដោយការគ្រប់គ្រងដីសហគមន៍ដែលនៅតែមានសុពលភាព ត្រូវបន្តគ្រប់គ្រងឲ្យបានហ្មត់ចត់តទៅទៀត ។ ចំពោះអនុគណៈកម្មាការត្រួតពិនិត្យ វាស់វែង និងវាយតម្លៃសម្បទានដីសេដ្ឋកិច្ច ឯ.ឧ ឧបនាយករដ្ឋមន្ត្រី បានណែនាំឲ្យមន្ត្រីទាំងអស់ដែលខេត្តសម្រេចចាត់តាំងហើយនោះត្រូវចុះទៅដល់ទីវាល ឬដីព្រៃដែលបានផ្តល់សម្បទានសេដ្ឋកិច្ច ដើម្បីត្រួតពិនិត្យស្ថានភាពជាក់ស្តែងនសការអនុវត្តរបស់ក្រុមហ៊ុននីមួយៗ បញ្ហាប្រឈមនានារបស់ក្រុមហ៊ុន ដែលផលប៉ះពាល់ជាមួយប្រជាពលរដ្ឋ ដំណោះស្រាយកន្លងមកការអនុវត្តផែនការរបស់ក្រុមហ៊ុនដើម្បីលើកយោបល់ជូនគណៈកម្មាការអន្តរក្រសួងសម្រាប់ជាមូលដ្ឋានក្នុងការវាយតម្លៃក្រុមហ៊ុនសម្បទានដីសេដ្ឋកិច្ច ៕
