ខេត្តព្រះវិហារ
ប្រជាកសិករនៅស្រុកគូលែនជិតបញ្ចប់ការប្រមូលផលសណ្ដែកសៀងហើយគិតមកដល់ថ្ងៃទី១៧វិច្ឆិការ២០១៤នេះហើយបានលក់ចេញទៅអោយឈ្មួញកណ្តាលមកពីស្រុកសំពៅលូនខេត្តបាត់ដំបងនិងពីបណ្តាខេត្តផ្សេងទៀតដើម្បីរកចំណូលផ្គត់ផ្គង់ជីវភាពគ្រួសារអោយមានការរីកចំរើន។
ឈ្មួញកណ្តាលមកពីខេត្តបាត់ដំបងម្នាក់បានអោយដឹងថាគាត់ទិញសណ្ដែកសៀងពីប្រជាកសិកររស់នៅភូមិស្រយង់ត្បូងឃុំស្រយង់ស្រុកគូលែនខេត្តព្រះវិហារតំលៃ១៧០០រៀលក្នុង១គីទ្បូក្រាម។សណ្តែកសៀងដែលទិញពីស្រុកគូលែនគឺដឹកយកទៅលក់បន្តអោយឈ្មួញថៃនៅជាប់ព្រំដែនខេត្តបាត់ដំបង។
ឈ្មួញកណ្តាលម្នាក់ទៀតឈ្មោះឈានហេងអាយុ៥១ឆ្នាំរស់នៅភូមិទ្បឥដ្ឋសង្កាត់កំពង់ប្រណាកក្រុងព្រះវិហារបានអោយដឹងថាគាត់បានប្រមូលទិញសណ្ដែកសៀងពីប្រជាកសិកររស់នៅភូមិហ្មសែតសង្កាត់ប៉ាលហាលក្រុងព្រះវិហារសរុបបានចំនួន៦០០តោនក្នុងរយះពេល១ខែនេះ។គាត់និយាយថាតំលៃសណ្ដែកសៀងគាត់ទិញចាប់ពីតំលៃ១៥០០ដល់១៨០០រៀលក្នុង១គីទ្បូក្រាមទៅតាមសណ្តែកសៀងប្រភេទល្អនិងមិនល្អ។
លោកឈានហេងបានបញ្ជាក់អោយដឹងថាផលសណ្តែកសៀងដែលគាត់ទិញបានពីប្រជាកសិករហើយលក់ចេញវិញទៅអោយឈ្មួញធំមកពីស្រុកជ្រៃធំខេត្តកណ្តាលជាប់ព្រំដែនវៀតណាមក្នុងតំលៃ២០០០រៀលក្នុង១គីទ្បូក្រាម។គាត់និយាយថាតំលៃសណ្តែកសៀងឆ្នាំនេះបើគិតតំលៃ១៨០០រៀលក្នុង១គីទ្បូក្រាមធ្លាក់ថ្លៃ៥០០រៀលធៀបកាលពីឆ្នាំ២០១៣រយះពេលដូចគ្នាវាមានតំលៃ២៣០០រៀលក្នុង១គីទ្បូក្រាម។
លោកប៉ាងយៀតអភិបាលស្រុកគូលែនបានអោយអ្នកសារព័ត៌មានដឹងថាក្នុងរបាយការណ៍កសិកម្មស្រុកប្រជាកសិករលក់ចេញសណ្ដែកសៀងទៅអោយឈ្មួញកណ្តាលចុះមកទិញផ្ទាល់ជាទូទៅបានតំលៃ១៨០០រៀលក្នុង១គីទ្បូក្រាម។ផ្ទៃដីចំការដាំសណ្ដែកសៀងនៅទូទាំងស្រុកគូលែនឆ្នាំនេះសរុបមានចំនួន២៩០០ហិកតា។
លោកអភិបាលស្រុកបន្តទៀតថាប្រជាកសិករប្រមូលផលសណ្ដែកសៀងគិតមកដល់ថ្ងៃទី១៧វិច្ឆិការនេះបានចំនួន១០០០ហិកតាហើយទទួលបានផលសរុបចំនួន៣០០០តោន។ពេលនេះប្រជាកសិករកំពុងសំរុកប្រមូលផលសណ្តែកសៀងជាបន្តបន្ទាប់អាចនឹងបញ្ចប់រយះពេលដ៍ខ្លីខាងមុខនេះ៕
មង្គល
Ads
