កំពង់ចាម: ឯកឧត្តមបណ្ឌិតសភាចារ្យហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាតំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញប្រគល់សញ្ញាបត្រជូននិស្សិតជ័យលាភីកម្រិតបរិញ្ញាបត្ររង បរិញ្ញាបត្រ និងបរិញ្ញាបត្រ
ជាន់ខ្ពស់ ចំនួន ២,២២៣ អង្គ/នាក់ នៃសាខាសាកលវិទ្យាល័យគ្រប់គ្រង និងសេដ្ឋកិច្ច (UME) ខេត្តកំពង់ចាម នាព្រឹកថ្ងៃទី២៥ ខែកញ្ញា ឆ្នាំ២០២៥ ដោយមានការអញ្ជើញចូលរួមពីអ្នកតំណាងរាស្ត្រមណ្ឌលកំពង់ចាម ឯកឧត្តម អ៊ុន ចាន់ដា អភិបាលខេត្តកំពង់ចាម និងថ្នាក់ដឹកនាំក្រសួងអប់រំ យុវជន និងកីឡា ព្រមទាំងថ្នាក់ដឹកនាំនៃសាកលវិទ្យាល័យគ្រប់គ្រង និងសេដ្ឋកិច្ច។
ថ្លែងក្នុងឱកាសនោះ ឯកឧត្តមបណ្ឌិតសភាចារ្យហង់ជួន ណារ៉ុន មានប្រសាសន៍ថា ការអប់រំបណ្តុះបណ្តាលរបស់សាខាសាកលវិទ្យាល័យគ្រប់គ្រង និងសេដ្ឋកិច្ច (UME) ខេត្តកំពង់ចាម គឺជាការចូលរួមគាំទ្រ ដល់ការអនុវត្តនូវយុទ្ធសាស្ត្រកំណើនសេដ្ឋកិច្ចថ្មី ក្នុងក្របខ័ណ្ឌនៃគោលនយោបាយអភិវឌ្ឍ វិស័យឧស្សាហកម្មកម្ពុជា ២០១៥-២០២៥ តាមរយៈការបង្កើនទាំងបរិមាណ និងគុណភាពនិស្សិត លើជំនាញនានា ប្រកបដោយបច្ចេកទេសច្បាស់លាស់ និងជំនាញទន់ ដោយបង្កលក្ខណៈដល់និស្សិតក្នុងការអនុវត្ត ការប្រកួតប្រជែង និងការផ្សារភ្ជាប់ ការសិក្សាទ្រឹស្តីទៅនឹងសកម្មភាព សហគ្រិនភាព ដោយបង្កើន សមត្ថភាព ក្នុងការដោះស្រាយបញ្ហា ការគោរពវិន័យនៅកន្លែងការងារ ។ល។
ជាមួយគ្នានោះឯកឧត្ដមរដ្ឋមន្ត្រីក្រសួងអប់រំ បានក្រេីនរំលឹកថា ការសិក្សាជាកត្តាចាំបាច់សម្រាប់ជីវិតមនុស្សម្នាក់ៗ បើមិនមានការសិក្សាស្រាវជ្រាវជាប្រចាំនោះទេ យើងមិនអាចតាមទាន់ភាពទំនើបនៃភាវូបនីយកម្មបច្ចេកវិទ្យា ដែលកំពុងវិវត្តន៍រីកចម្រើនយ៉ាងខ្លាំងក្លានេះបានឡេីយ ដូច្នេះក្មួយៗត្រូវបន្តការសិក្សាស្រាវជ្រាវ និងបន្តការសិក្សាពង្រីក ចំណេះដឹងរបស់ខ្លួនឱ្យកាន់តែទូលំទូលាយបន្ថែមទៀត ដើម្បីបង្កើនកម្រិត គុណវុឌ្ឍតាមជំនាញរបស់ខ្លួន សំដៅតាមឱ្យទាន់ការរីកចម្រើននៃសង្គម និងវិទ្យាសាស្ត្រ ពីព្រោះការសិក្សាអប់រំ គឺគ្មានទីបញ្ចប់នោះទេ។
ក្នុងឱកាសនោះដែរ ឯកឧត្តម មួន វាសនា សាកលវិទ្យាធិការរង និង ជានាយកសាខាសាកលវិទ្យាល័យគ្រប់គ្រង និងសេដ្ឋកិច្ច (UME) ខេត្តកំពង់ចាម បានឱ្យដឹងថា និស្សិតដែលត្រូវទទួលសញ្ញាបត្រថ្ងៃនេះមាន ចំនួន ២,២២៣ អង្គ/នាក់ ក្នុងនោះ និស្សិត ថ្នាក់បរិញ្ញាបត្ររង ចំនួន ៣៧៦នាក់ ថ្នាក់បរិញ្ញាបត្រ ចំនួន ១,៥៥៧នាក់ និងថ្នាក់បរិញ្ញាបត្រជាន់ខ្ពស់ ចំនួន ២៩០នាក់ ៕
