កំពង់ឆ្នាំង៖ប្រជាពលរដ្ឋក្នុងភូមិកោះតាម៉ូវជាង២០នាក់នៅព្រឹកថ្ងៃទី០៤ ខែធ្នូ ឆ្នាំ២០១៤ បានមានប្រតិកម្មយ៉ាងខ្លាំងតវ៉ាគ្នាយ៉ាងតឹងសរសៃក ជាមួយលោក ថាន់ សារុំ អភិបាលរងស្រុកបរិបូណ៌ និងជាមួយសមាជិកសហគមន៍នេសាទរបស់លោកប្រធានសហគមន៍នេសាទអសមត្ថភាព ទាក់ទងនិងការរាយការណ៍អំពីបទល្មើសនេសានៅក្នុងតំបន់អភិរក្សខុសរឿងពិតជូនលោកអភិបាលខេត្ត។
ភាពប្រតិកម្មចំរូងចម្រាស់ និងថែមទាំងមានការចង់វាយតប់គ្នាផងនោះ បានកើតឡើងនៅវេលាម៉ោង១០និង៤៥នាទីព្រឹកថ្ងៃទី០៤ ខែធ្នូ ឆ្នាំ២០១៤ នៅក្នុងវត្តកំពង់ព្រះគគីរ ក្នុងភូមិកោះតាម៉ូវ ឃុំកំពង់ព្រះគគីរ ស្រុកបរិបូណ៌ ក្រោយកិច្ចប្រជុំរបស់ ក្រុមការងារស្រុកបរិបូណ៌ និងមន្ត្រីខណ្ឌ័រដ្ឋបាលជលផលកំពង់ឆ្នាំង មកហៅប្រជុំប្រជាពលរដ្ឋត្រួតពិនិត្យស្នាមមេដៃលើលិខិតអន្តរាគមន៍។
ដើមរឿងនៃការប្រតិកម្មខាងលើនេះ ដំបូងឡើយគឺប្រជាពលរដ្ឋបានសួរអ្នកយកព័ត៌មានយើងថា៖ហេតុដូចម្តេចបានជាមានបទល្មើសនេសាទពេញតំបន់អភិរក្សឃុំកំពង់ព្រះគគីរហើយ សមត្ថកិច្ចនិងអាជ្ញាធរមិននាំគ្នាបង្ក្រាប បែរជានាំគ្នាមកត្រួតពិនិត្យស្នាមមេដៃប្រជាពលរដ្ឋជាអ្នកប្តឹងនិងបង្ហាញពីបទល្មើសទៅវិញ។ពេលនោះ លោក ហុង វាស្នា ភ្នាក់ងារទូរទស្សន៍បាយ័ន បានឆ្លើយប្រាប់ប្រជាពលរដ្ឋថា៖ មកពីសមត្ថកិច្ចចំនាញនិងអាជ្ញាធរស្រុកមើលឃើញបទល្មើសដាក់សម្រាស់ក្នុងឡូត៍អភិរក្សហើយ បែរជារាយការណ៍ភូតភរលោអភិបាលខេត្តទៅវិញថា សម្រាស់ទាំងនោះនៅលើខ្នងកោះចំការ មិនមែននៅក្នុងព្រែកអភិរក្សដូចអ្នកកាសែតរាយការនោះទេ។
ពេលលោក ហុង វាស្នា និយាយបានត្រឹមនេះ លោក ថាន់ សារុំ ក៏មកទាន់ហើយនិយាយថា តើខ្ញុំរាយការភរចៅហ្វាយខេត្តនោះ ភរយ៉ាងមិចខ្លះ របាយការណ៍នោះគឺលោកនិងសមត្ថកិច្ចជំនាញ បានឯកភាពគ្នារាយការ ខណៈនោះប្រជាពលរដ្ឋជាច្រើននាក់បានផ្ទុះកំហឹងឡើង…!ថាសម្រាស់ទាំងអស់នោះគឺពួកគាត់បានចុះមុជទឹកយកដោយផ្ទាល់ដៃនៅក្នុងព្រែកអភិរក្សមិនមែននៅលើខ្នងចំការនោះទេ អាជ្ញាធរនិងសមត្ថកិច្ចធ្វើការងារតែបែបនេះ ពួកគាត់លែងមានជំនឿហើយ ពេលបោះឆ្នោតលើកក្រោយពួកគាត់ឈប់បោះឆ្នោតអោយហើយ។
ខណៈនោះដែរមានប្រជាពលរដ្ឋ៣គូរ ៦នាក់ដែល៣នាក់កាន់ជើងលោក ផាន់ ផល្លា ប្រធានសហគមន៍អសមត្ថភាព និង៣នាក់ទៀតជាប្រជាពលរដ្ឋប្តឹងសុំដកលោក ផាន់ ផល្លា ពីប្រធានសហគមន៍ដែលបានធ្វើបាបពួកគាត់ បានឈ្លោះប្រកែកគ្នាយ៉ាងតឹងសរសៃក ចង់វាយតប់គ្នាទៀតផងកុំតែបានសមត្ថកិច្ចជួយឃាត់ទាន់។ បន្ទាប់មកនៅរសៀលថ្ងៃទី០៤ ខែធ្នូ ឆ្នាំ២០១៤ លោក ថាន់ សារុំ អភិបាលរងស្រុកបរិបូណ៌ បានរាយការណ៍បំភ្លើសការពិតទៅប្រធានការិយាល័យទូរទស្សន៍បាយ័នថា លោក ហុង វាស្នា ជាអ្នកញុះញុងអោយប្រជាពលរដ្ឋប្រឆាំងជាមួយអាជ្ញាធរទៅវិញ។
ចំណែក លោក ផាន់ ផល្លា ឆ្លើយក្នុងកិច្ចសម្ភាសន៍ជាមួយទូរទស្សន៍បាយ័នថា ភ្នាក់ងារទូរទស្សន៍បាយ័ន និងទូរទស្សន៍ហង្សមាស ប្រចាំខេត្តកំពង់ឆ្នាំងជាអ្នកញុះញុងអោយប្រជាពលរដ្ឋប្រឆាំងជាមួយលោកជាប្រធាសហគមន៍នេសាទ ដោយរយះពេល២ខែនេះលោកត្រូវបានភ្នាក់ងារទូរទស្សន៍ទាង២រំខានធ្វើការងារអ្វីមិនកើត ទើបកើតមានបទល្មើសជាច្រើនក្នុងឡូត៍អភិរក្សពេលនេះ។
នៅព្រឹកថ្ងៃទី០៥ ខែធ្នូ ឆ្នាំ២០១៤នេះ ភ្នាក់ងារទូរទស្សន៍ទាំង២ខាងលើបានរាយការណ៍រឿងខាងលើនេះជូនលោក ឈួរ ចន្ទ័ឌឿន អភិបាលខេត្តកំពង់ឆ្នាំង និងបានសំណូមពរ ដល់លោកអភិបាលខេត្តកោះហៅអ្នកពាក់ពន្ធ័ទាំងអស់(លោកអភិបាលខេត្តថា លោកនិងពិចារណាដោះស្រាយរឿងនេះ)រួមមាន៖ប្រធានសហគមន៍នេសាទ តំណាងប្រជាពលរដ្ឋប្តឹងប្រធានសហគមន៍នេសាទ លោកមេឃុំកំពង់ព្រះគគីរ លោកអភិបាលរងស្រុកបរិបូណ៌ លោកនាយសង្កាត់ នាយផ្នែក នាយខណ្ឌ័រដ្ឋបាលជលផល មកប្រជុំតុមូលមួយនៅក្នុងសាលាខេត្ត ដើម្បីសំដែងនូវការពិតរៀងៗខ្លួន និងដើម្បីដោះស្រាយរឿងហេតុខាងលើនេះ ថាតើអ្នកកាសែតនិងប្រជាពលរដ្ឋខិតខំការពារតំបន់អភិរក្ស និងប្រធានសហគមន៍នេសាទ សមត្ថិច្ចជំនាញ អាជ្ញាធរដែលឃើញមានបទល្មើសនេសាទហើយមិនព្រមបង្ក្រាប អ្នកណាខុសអ្នកណាត្រូវ….!៕
