ភ្នំពេញ៖ ហេតុការណ៍គ្រោះថ្នាក់ចរារណ៍មួយបង្កឡើងដោយសារថយន្តរ៉េងរ៉ូវ័មួយគ្រឿងបើកបុកម៉ូតូកង់បីពីក្រោយក្រឡាប់ផ្ងារជើង និងធ្វើឲ្យរបួសធ្ងន់ធ្ងរម្នាក់ ហើយរថយន្តបានបើករត់គេចខ្លួនបាត់ស្រមោល កាលពីវេលាម៉ោង៣និង៤០ នាទីយប់ឈានចូលថ្ងៃទី២៦ ខែកុម្ភៈ ឆ្នាំ ២០១៤ ត្រង់ចំណុចមុខ ចែតដី តាមបណ្ដោយផ្លូវមុនីវង្ស កែងនិងផ្លូវ១០៦ ស្ថិតក្នុងសង្កាត់ស្រះចក ខណ្ឌដូនពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ជិះម៉ូតូកង់បីមួយគ្រឿង ពណ៌ក្រហមលាយត្រូយចេក ពាក់ស្លាកលេខភ្នំពេញ1AZ-0885 ធ្វើដំណើរតាមបណ្ដោយផ្លូវមុនីវង្ស ក្នុងទិសដៅពីជើងទៅត្បូង ខណៈដល់ចំណុចកើតហេតុស្រាប់តែមានរថយន្តរ៉េងរ៉ូវ័រមួយគ្រឿង ពណ៌ស មិនចាំស្លាកលេខ បានធ្វើដំណើរស្របទិសគ្នាជាម៉ូតូកង់បីនេះក៏ជ្រុលចង្កួតមកបុក ម៉ូតូ ពីក្រោយយ៉ាងពេញ ទំហឹងបណ្ដាលឲ្យអ្នកបើកម៉ូតូកង់បី របួសធ្ងន់សន្លប់ស្តូកស្តឹង និងម៉ូតូកង់បីក្រឡាប់ផ្ងារជើងឡើងលើ ហើយក៏រថយន្តបង្កហេតុនេះបើករត់គេចខ្លួនបាត់ស្រមោលភ្លាមៗតែម្តង។
ក្រោយពេលកើតហេតុជនរងគ្រោះត្រូវបានរថយន្តអ្នកធ្វើដំណើរឃើញ អាណិត ក៏បានដឹកទៅសង្គ្រោះនៅមន្ទីរពេទ្យកាលម៉ែត្រ ហើយចំណែកម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌដូនពេញ ដើម្បីរងចាំក្រុមគ្រួសារមកទទួលយកទៅវិញ៕
