ខេត្តសៀមរាប៖ ខណៈដែលរាជរដ្ឋាភិបាលកំពុងដាក់ចេញនូវវិធានការណ៍ក្តៅក្នុងការបង្ក្រាបល្បែងស៊ីសងខុសច្បាប់នៅទូទាំងប្រទេស ប៉ុន្តែនៅទឹកដីសៀមរាបអង្គរឯណេះវិញ គេសង្កេតឃើញថា ល្បែងស៊ីសងគ្រប់ប្រភេទនៅតែបន្តរីកដុះដាលដូចផ្សិត ដែលបង្កឱ្យមានការរិះគន់យ៉ាងខ្លាំងពីសំណាក់មហាជនទៅលើសមត្ថកិច្ចជំនាញ។
មន្តអាគមន៍ «សន្លឹកដុល្លារ» ឬជាការអសមត្ថភាព?
មហាជនកំពុងដាក់ការសង្ស័យ និងលើកឡើងជាសំណួរចំៗថា តើលោក កង សុទ្ធី ដែលគេស្គាល់ច្បាស់ថាជា «មេខ្លា» ស្ដេចល្បែងប្រចាំខេត្តសៀមរាប មានមន្តអាគមន៍គាថាអ្វីខ្លះ? ទើបអាចបើកដំណើរការល្បែងស៊ីសងខុសច្បាប់ ជាពិសេសល្បែងមាន់ជល់តាមអនឡាញ និងល្បែងស៊ីសងរាប់មិនអស់ទៀត បានយ៉ាងរលូនរាប់សិបឆ្នាំមកហើយ។
សំណួរនេះបានចាក់ដោតទៅលើការទទួលខុសត្រូវរបស់៖
លោក ដា ចំរើន អធិការនគរបាលក្រុងសៀមរាប
លោក ហួត សុធី ស្នងការនគរបាលខេត្តសៀមរាប
តើលោកទាំងពីរពិតជា «មើលមិនឃើញ» ឬក៏ធ្វើជា «ធ្មេចភ្នែក» មិនដឹងមិនឮចំពោះសកម្មភាពល្បែងស៊ីសងទាំងនេះ ដែលកំពុងបំផ្លាញសន្តិសុខសណ្តាប់ធ្នាប់សង្គម?
ផលប៉ះពាល់ដល់ជីវភាព និងសន្តិសុខ
ការបណ្តោយឱ្យល្បែងស៊ីសងបន្តមានវត្តមានក្នុងក្រុងទេសចរណ៍ដ៏សំខាន់នេះ មិនត្រឹមតែល្មើសនឹងបទបញ្ជារបស់ថ្នាក់ដឹកនាំប៉ុណ្ណោះទេ ប៉ុន្តែវាក៏ជាដើមចមនៃ៖
អំពើចោរកម្ម៖ លួច ឆក់ ប្លន់ ដែលកើតចេញពីការចាញ់ល្បែង។
អំពើហិង្សាក្នុងគ្រួសារ៖ ការបែកបាក់គ្រួសារ និងការលក់ទ្រព្យសម្បត្តិដោយសារតែល្បែង។
ការបាត់បង់ជំនឿទុកចិត្ត៖ ប្រជាពលរដ្ឋបាត់បង់ទំនុកចិត្តលើអាជ្ញាធរមូលដ្ឋាន ដែលហាក់ដូចជាមានទំនាក់ទំនងស្អិតរមួតជាមួយមេល្បែង។
សំណូមពរពីមហាជន
ប្រជាពលរដ្ឋក្នុងខេត្តសៀមរាប បានទទូចស្នើសុំដល់លោកអភិបាលខេត្ត និងថ្នាក់ដឹកនាំក្រសួងមហាផ្ទៃ មេត្តាពិនិត្យមើលភាពអសកម្មរបស់មន្ត្រីក្រោមឱវាទ។ ប្រសិនបើ «ស្ដេចល្បែង» មេខ្លា នៅតែអាចបន្តសកម្មភាពបាន នោះមានន័យថា ច្បាប់គឺត្រូវបានអនុវត្តលើតែអ្នកក្រីក្រ ចំណែកអ្នកមានអំណាចទឹកប្រាក់ក្នុងដៃ ហាក់ដូចជានៅលើច្បាប់ទៅវិញ។
តើសមត្ថកិច្ចនឹងមានវិធានការណ៍ក្តៅ ឬក៏បន្តរក្សាភាពស្ងៀមស្ងាត់ក្រោមមន្តអាគមន៍ «សន្លឹកដុល្លារ» ទៀត? យើងនឹងរង់ចាំមើលទាំងអស់គ្នា។
ដោយប៊ុនរដ្ឋា
