[ខេត្តកំពង់ធំ] — កំពុងមានការរិះគន់យ៉ាងចាស់ដៃពីសំណាក់មហាជន ពាក់ព័ន្ធនឹងសកម្មភាពដឹកជញ្ជូនផលអនុផលព្រៃឈើខុសច្បាប់តាមរថយន្តសាំយ៉ុងចំនួន ៥ គ្រឿងជារៀងរាល់យប់ ដែលដឹកចេញពីទឹកដីខេត្តព្រះវិហារ ឆ្ពោះមកកាន់ស្រុកបារាយណ៍ ខេត្តកំពង់ធំ ដោយគ្មានការរំខានពីសមត្ថកិច្ចជំនាញឡើយ។
សកម្មភាពដឹកជញ្ជូនមិនរើសមុខ
តាមប្រភពព័ត៌មានពីប្រជាពលរដ្ឋ និងអ្នកអង្កេតការណ៍នៅតាមដងផ្លូវបានឱ្យដឹងថា ឈ្មួញឈើដុះស្លែដែលគេស្គាល់ឈ្មោះថា “ផល្លា” (ភេទស្រី) បានធ្វើសកម្មភាពដឹកជញ្ជូនឈើយ៉ាងអនាធិបតេយ្យតាម ផ្លូវជាតិលេខ ៦២។ កាលពីវេលាម៉ោង ៣:៤៨ នាទីទៀបភ្លឺ ថ្ងៃទី ៤ ខែកុម្ភៈ ឆ្នាំ ២០២៦ គេបានឃើញក្បួនរថយន្តសាំយ៉ុងទាំងនោះ បន្តកន្ទុយគ្នាសម្រុកចេញពីខេត្តព្រះវិហារ ឆ្លងកាត់ខេត្តកំពង់ធំ ក្នុងទិសដៅទៅកាន់ស្រុកបារាយណ៍។
សំណួរសួរទៅកាន់មន្ត្រីជំនាញមេព្រៃ
អ្វីដែលធ្វើឱ្យមហាជនដាក់ការសង្ស័យបំផុតនោះគឺ៖
ភាពរលូននៃការធ្វើដំណើរ៖ ហេតុអ្វីបានជាក្បួនរថយន្តដឹកឈើខុសច្បាប់ដ៏ធំនេះ អាចឆ្លងកាត់គោលដៅត្រួតពិនិត្យជាច្រើនកន្លែងបានដោយសុវត្ថិភាព?
ការឃុបឃិតជាប្រព័ន្ធ៖ តើមានការបើកដៃ ឬត្រូវរ៉ូវគ្នាជារៀងរាល់យប់រវាងមន្ត្រីជំនាញមេព្រៃ និងឈ្មួញឈ្មោះ ផល្លា នេះមែនដែរឬទេ?
“ឡានមានស្លាប”៖ អ្នកភូមិលួចចំអកថា រថយន្តទាំងនោះប្រហែលជាមានស្លាបហោះ ទើបមន្ត្រីជំនាញមើលមិនឃើញ ឬមួយក៏មន្ត្រីទាំងនោះសម្រាន្តលក់មិនដឹងខ្លួនរាល់ពេលឡានដឹកឈើឆ្លងកាត់?
ផលប៉ះពាល់ និងការទាមទារ
សកម្មភាពនេះមិនត្រឹមតែបំផ្លាញធនធានធម្មជាតិយ៉ាងធ្ងន់ធ្ងរប៉ុណ្ណោះទេ ប៉ុន្តែវាក៏បានបង្ហាញពីភាពទន់ជ្រាយនៃច្បាប់ និងការអនុវត្តរបស់មន្ត្រីមូលដ្ឋាន។ ប្រជាពលរដ្ឋសំណូមពរយ៉ាងទទូចដល់ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ក៏ដូចជាអភិបាលខេត្តទាំងពីរ (ព្រះវិហារ-កំពង់ធំ) មេត្តាពិនិត្យមើលភាពអសកម្មរបស់មន្ត្រីក្រោមឱវាទ និងចាត់វិធានការចំពោះឈ្មួញឈ្មោះ ផល្លា នេះជាបន្ទាន់។
រហូតមកដល់ពេលនេះ អង្គភាពយើងនៅមិនទាន់អាចសុំការបំភ្លឺពីភាគីពាក់ព័ន្ធ ឬសាមីខ្លួនឈ្មោះ ផល្លា បាននៅឡើយទេ។ យើងនឹងបន្តតាមដានព័ត៌មាននេះ ដើម្បីជម្រាបជូនមហាជននៅពេលក្រោយ។
ដោយប៊ុនរដ្ឋា
