ក្រុងឡុងដ៍៖ កីឡាករ Rory McIlroy ម្ចាស់ជើងឯកកីឡាវាយកូនគោលពីរសម័យកាល និងអតីតកីឡាការិនីវាយកូនបាល់ចំណាត់ថ្នាក់លេខ១ក្នុងពិភពលោក Caroline Wozniacki បានប្រកាសពីការភ្ជាប់ពាក្យរបស់ពួកគេកាលពីថ្ងៃពុធតាមរយៈការបង្ហោះសារតាមបណ្តាញសង្គម Twitter។ នេះបើតាមវេបសាយបរទេសឆាយណាដេលីផ្សាយកាលពីថ្ងៃទី២ ខែមករា ឆ្នាំ២០១៤។
Rory McIlroy អតីតកីឡាករវាយកូនគោលមានចំណាត់ថ្នាក់លេខ១ក្នុងពិភពលោកមកពី ប្រទេសអៀរឡង់ខាងជើង បានបង្ហោះរូបគេ និងនាង Caroline Wozniacki រួមជាមួយចិញ្ចៀនពេជ្រមួយនៅលើម្រាមដៃឆ្វេងរបស់នាង។
Caroline Wozniacki វ័យ២៣ឆ្នាំ បានដកខ្លួនចេញពីព្រឹត្តិការណ៍ WTA ក្នុងទីក្រុង Brisbane កាលពីសប្តាហ៍មុនដោយសារតែបញ្ហារបួសស្មា ប៉ុន្តែ កីឡាការិនីសញ្ជាតិដាណឺម៉ាករូបនេះ កំពុងតែសម្លឹងឆ្ពោះទៅកាន់ការប្រកួតក្នុងទីក្រុង Sydney ក្នុងព្រឹត្តិការណ៍ Australian Open។ McIlroy បានឈ្នះពានរង្វាន់ធំជាលើកទី១របស់គេក្នុងព្រឹត្តិការណ៍ the 2011 US Open និងបានបន្ថែមពានរង្វាន់មួយទៀតក្នុងព្រឹត្តិការណ៍ the 2012 PGA Championship. ។
ស្នេហាដ៏រ៉ូមេនទិកមួយនេះ បានស៊ូទ្រាំនឹងពាក្យចចាមអារ៉ាមជាច្រើនថា ពួកគេបានភ្ជាប់ពាក្យកាលពីរយៈពេលមួយឆ្នាំកន្លងទៅ បន្ទាប់មកមានការលើកឡើងថា ពួកគេបានបែកបាក់គ្នាក្នុងឆ្នាំ២០១៣ ប៉ុន្តែពេលនេះសុបិនបានក្លាយជាការពិតខណៈពួកគេបានសម្រេចចិត្តបង្ហោះរូប និងផ្ញើសារដ៏ផ្អែមត្រជាក់ថា ឆ្នាំថ្មីពិតជាអស្ចារ្យ ពួកគេសប្បាយចិត្ត ពួកគេបាននិយាយថា យល់ព្រម។
នៅពេលកីឡាករ Rory McIlroy បានសរសេរថា "Happy New Year everyone! I have a feeling it's going to be a great year!! My first victory of 2014 she said yes!!" កីឡាការិនីបានសរសេរផងដែរថា "Happy New Year everyone! Rory and I started 2014 with a bang! … I said YES!!!!" ៕
