សៀមរាប៖ វេទិកាអេកូទេសចរណ៍ជាតិឆ្នាំ២០២៥ បានបើកសម្ពោធជាផ្លូវការហើយនាព្រឹកថ្ងៃចន្ទ ទី២៤ ខែវិច្ឆិកា ឆ្នាំ២០២៥ នៅសណ្ឋាគារសុខាសៀមរាប ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហូត ហាក់ រដ្ឋមន្រ្តីក្រសួងទេសចរណ៍ និងជាប្រធាន គ.ជ.អ.អ. និង ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ និងឯកឧត្តម ប្រាក់ សោភ័ណ អភិបាលខេត្តសៀមរាប ព្រមទាំងប្រតិភូអមដំណើរ ។
ព្រឹត្តិការណ៍ដ៏សំខាន់នេះត្រូវបានរៀបចំឡើងក្នុងគោលបំណងជំរុញការអភិវឌ្ឍវិស័យអេកូទេសចរណ៍ និងទេសចរណ៍សហគមន៍នៅទូទាំងប្រទេសកម្ពុជា វេទិកាជាតិនេះមានការអញ្ជើញចូលរួមយ៉ាងច្រើនកុះករពីសំណាក់តំណាងសហគមន៍ទេសចរណ៍មកពីគ្រប់ខេត្ត-ក្រុង ថ្នាក់ដឹកនាំក្រសួង-ស្ថាប័នពាក់ព័ន្ធ អាជ្ញាធរដែនដី វិស័យឯកជន ដៃគូអភិវឌ្ឍន៍ និងអង្គការជាតិ-អន្តរជាតិ សរុបប្រមាណជាង៦០០នាក់។
ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ក៏បានមានប្រសាសន៍ផ្តាំផ្ញើសំខាន់ៗដល់សហគមន៍ទេសចរណ៍ទូទាំងប្រទេស ដោយបានលើកឡើងអំពីទស្សនៈ «ការនាំចេញនៅនឹងកន្លែង» ដែលសំដៅដល់ការផលិតដើម្បីផ្គត់ផ្គង់ដល់ភ្ញៀវទេសចរណ៍ដោយផ្ទាល់ និងបានសង្កត់ធ្ងន់ថា៖ «សហគមន៍ទេសចរណ៍គឺជាទីផ្សារដ៏ងាយស្រួលនិងឆាប់រហ័សបំផុតសម្រាប់ការលក់ផលិតផលកសិកម្មរបស់បងប្អូនប្រជាពលរដ្ឋ យើងត្រូវធ្វើការរួមគ្នាដើម្បីធានាថា គុណភាពនិងបរិមាណកសិផលដែលផលិតបានត្រូវបានផ្សារភ្ជាប់យ៉ាងជិតស្និទ្ធទៅនឹងតម្រូវការជាក់ស្តែងរបស់ភ្ញៀវទេសចរណ៍ជាតិនិងអន្តរជាតិ។ នេះគឺជាយន្តការដ៏មានប្រសិទ្ធភាពក្នុងការបង្កើតចំណូលបន្ថែមនិងលើកកម្ពស់ជីវភាពរបស់សមាជិកសហគមន៍ឲ្យកាន់តែប្រសើរឡើង»។
ឯកឧត្តម ហូត ហាក់ បានគូសបញ្ជាក់ពីសារៈសំខាន់នៃអេកូទេសចរណ៍ជា «មាសបៃតង» ដែលចូលរួមចំណែកយ៉ាងសំខាន់ក្នុងការលើកកម្ពស់កំណើនសេដ្ឋកិច្ចជាតិ ការបង្កើតឱកាសការងារ និងការអភិរក្សធនធានធម្មជាតិប្រកបដោយចីរភាព ឯកឧត្ដមបានលើកទឹកចិត្តឲ្យគ្រប់ភាគីពាក់ព័ន្ធបន្តពង្រឹងកិច្ចសហការគ្នាតាមយន្តការ ភាពជាដៃគូ រដ្ឋ-ឯកជន-ប្រជាជន ដើម្បីធានាថា វិស័យទេសចរណ៍សហគមន៍និងអេកូទេសចរណ៍នៅតែជាប្រភពចំណូលដ៏សំខាន់សម្រាប់ការអភិវឌ្ឍសេដ្ឋកិច្ចគ្រួសារប្រជាពលរដ្ឋ។
ឯកឧត្តមរដ្ឋមន្រ្តីក៏បានអបអរសាទរចំពោះការដឹកនាំរបស់ក្រសួងទេសចរណ៍ដែលបានជំរុញការរៀបចំវេទិកានេះឡើង ក្នុងបំណងលើកស្ទួយសក្តានុពលធម្មជាតិ និងវប្បធម៌របស់កម្ពុជាទៅកាន់ពិភពលោក គោលបំណងសំខាន់នៃវេទិកា៖ បង្ហាញលទ្ធផលការងារពាក់ព័ន្ធនឹងអេកូទេសចរណ៍ និងទេសចរណ៍សហគមន៍ លើកឡើងពីបញ្ហាប្រឈមនានាដែលសហគមន៍កំពុងជួបប្រទះ ពិភាក្សានិងដាក់ចេញនូវជម្រើសដំណោះស្រាយ និងយុទ្ធសាស្ត្រថ្មីៗ ជំរុញការផ្សព្វផ្សាយទេសចរណ៍ និងមានការរៀបចំពិព័រណ៍សហគមន៍ទេសចរណ៍ អេកូទេសចរណ៍ ភ្ជាប់ជាមួយគ្នាផងដែរ ដើម្បីដាក់តាំងបង្ហាញនូវផលិតផល និងសេវាកម្មចម្រុះរបស់សហគមន៍មកពីទូទាំងប្រទេស ហើយរំពឹងថានឹងរួមចំណែកយ៉ាងសកម្មក្នុងការពង្រឹងគុណភាព និងជំរុញការអភិវឌ្ឍតំបន់អេកូទេសចរណ៍អាទិភាពរបស់កម្ពុជាឲ្យកាន់តែមានភាពរីកចម្រើនប្រកបដោយនិរន្តរភាព។
ដោយ ប៊ុន រដ្ឋា
