ខេត្តក្រចេះ៖ ប្រធានសមាគមយុវជនស្រលាញ់ធម្មជាតិ លោក តាន់ គឹមសួរ បានរកឃើញ ពីសកម្មភាពកាប់បំផ្លាញ និងដឹកជញ្ជូនបទល្មើសព្រៃឈើ ចេញពីដែនជម្រកសត្វព្រៃ-ព្រៃឡង់ និងបានចុះទប់ស្កាត់ និងបង្ក្រាប គ្រាដែលសេចក្តីរាយការណ៍បានបង្ហាញថា អាជ្ញាធរ និងមន្ត្រីជំនាញនៅក្នុងមូលដ្ឋាននោះ ហាក់មិនសូវអើពើធ្វើកិច្ចសហការទប់ស្កាត់ និងបង្ក្រាបការដឹកជញ្ជូនផល-អនុផលព្រៃឈើល្មើសច្បាប់ របស់ក្រុមឈ្មួញទាំងនោះឡើយ។
លោក តាន់ គឹមសួរ បន្ទាប់ពីបានចុះឃ្លាំមើល និងបានរកឃើញ ពីសកម្មភាពរបស់ឈ្មួញ ១ក្រុម បាននិងកំពុងដឹកជញ្ជូនឈើតាមរថយន្តកែច្នៃយ៉ាងអនាធិបតេយ្យ កាលពីថ្ងៃទី២៥ ខែវិច្ឆិកា ឆ្នាំ២០២៥ នោះមក លោកក៏បានធ្វើការឃាត់រថយន្តកែច្នៃដឹកជញ្ជូនឈើល្មើសច្បាប់នោះ នៅចំណុច ឃុំកំពង់ចាម ស្រុកសំបូរ ខេត្តក្រចេះ ដោយបានទូរស័ព្ទសុំរកកិច្ចអន្តរាគមន៍ សហការណ៍បង្ក្រាបពីអាជ្ញាធរ និងមន្ត្រីជំនាញ នៅក្នុងមូលដ្ឋានស្រុកសំបូរនោះ ផងដែរ ។
ប្រធានសមាគមយុវជនស្រលាញ់ធម្មជាតិ លោក តាន់ គឹមសួរ ត្រូវបានប្រភពដកស្រង់សម្តី ឲ្យដឹងថា លោកបានធ្វើការកំណត់មុខសញ្ញាឈ្មួញដឹកជញ្ជូនឈើ និងកាប់បំផ្លាញព្រៃឈើ ធនធានធម្មជាតិ នៅក្នុងដែនជម្រកសត្វព្រៃ-ព្រៃឡង់ ក្នុងខេត្តក្រចេះ ជាច្រើននាក់ រួមមាន៖ ឈ្មោះ ធា ,មុន្នី ,ផល វែង ,ផល ខ្លី ,ចែ ម៉ាប់ និងប្តី ដែលជាមេឈ្មួញដ៏ធំ ប្រចាំនៅតំបន់ព្រៃឡង់ ។
លោក តាន់ គឹមសួរ បានបញ្ជាក់ថា លោកបានស្នើសុំកម្លាំងជំនាញសហការណ៍ តែមកដល់ម៉ោងនេះមានរយៈពេល ២-៣ម៉ោង ដូចសព្វមួយដង រឿងនេះមិនមែនជារឿងតូចទេ តែលោកបានសង្កេតឃើញថា ថ្នាក់ដឹកនាំស្រុកនេះដូចជាមិនសូវអើពើ មិនសូវចូលរួមប៉ុន្មានទេ ពិសេសលោក គង់ មេត្តា អភិបាលស្រុកសំបូរ ខេត្តក្រចេះ អត់សូវចូលរួមជាមួយគ្នាទេ ។ លោកថា នេះហើយគឺជា«វិនាសកម្មសម្បត្តិធនធានធម្មជាតិ ជាតិរបស់យើង» លោកមិនបន្ទោសក្រុមឈ្មួញទេ តែលោកបន្ទោសមន្ត្រីដែលមានការពាក់ព័ន្ធ អសកម្មដែលធ្វើការងារទាំងអស់នេះ។
ស្របពេលជាមួយនឹងលោក តាន់ គឹមសួរ ចុះបង្ក្រាបការដឹកជញ្ជូនឈើចេញពីដែនជម្រកសត្វព្រៃ-ព្រៃឡង់នោះ គេបានឃើញ មន្ត្រីកងរាជអាវុធហត្ថមូលដ្ឋាន ចុះទៅសួរនាំរកលិខិតបញ្ជាបេសកកម្មពីលោក តាន់ គឹមសួរ តែលោកថា លោកជាប្រជាពលរដ្ឋតែងចូលរួមជាមួយរាជរដ្ឋាភិបាល ក្នុងការទប់ស្កាត់ បង្ក្រាបបទល្មើសធនធានធម្មជាតិ អត់មានបេសកកម្មទេ។ បន្ទាប់មកលោក តាន់ គឹមសួរ ក៏បានទូរស័ព្ទរាយការណ៍ លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ដើម្បីបានជ្រាបដល់នាយឧត្តមសេនីយ៍ សៅ សុខា មេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស។
អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី បានបញ្ជាក់ នៅថ្ងៃទី២៦វិច្ឆិកា២០២៥ ថា លោកសូមជម្រាបជូនសាធារណជន និងអ្នកសារព័ត៌មានជ្រាបថា ករណីមន្ត្រីកងរាជអាវុធហត្ថខេត្តក្រចេះ បានទៅសួរនាំ លោក តាន់ គឹមសួរ ដែលបានបង្ហោះតាមបណ្តាញសង្គមនេះ ខ្ញុំបាទ ក៏បានទទួលព័ត៌មានភ្លាមៗ ពីលោក តាន់ គឹមសួរ ហើយឯកឧត្តម នាយឧត្តមសេនីយ៍ មេបញ្ជាការកងរាជអាវុធហត្ថលើផ្ទៃប្រទេស បានណែនាំដល់ លោកឧត្តមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តក្រចេះ រួចហើយ ។
ជាមួយគ្នានេះ កម្លាំងជំនាញសន្តិសុខ នៃកងរាជអាវុធហត្ថលើផ្ទៃប្រទេស បាននិងកំពុងចុះទៅសហការ ដើម្បីទប់ស្កាត់ និងបង្ក្រាបបទល្មើសព្រៃឈើ តំបន់នោះផងដែរ៕ដោយ៖ឡុង សំបូរ
