ខេត្តស្ទឹងត្រែង៖ ថ្នាក់ដឹកនាំខេត្តស្ទឹងត្រែង បានបង្ហាញនូវមោទនភាព ចំពោះលទ្ធផលនៃកិច្ចសហការអភិរក្សសត្វផ្សោតទន្លេមេគង្គ ដោយអះអាងថា ទោះបីជាចំនួនសត្វផ្សោតក្នុងឆ្នាំ២០២៦នេះ មិនមានការកើនឡើងគួរឱ្យកត់សម្គាល់ ប៉ុន្តែការទប់ស្កាត់ការបាត់បង់ គឺជាជោគជ័យដ៏ធំធេងមួយ ក្រោមការយកចិត្តទុកដាក់ខ្ពស់ពីមន្ត្រីជំនាញ និងក្រុមឆ្មាំទន្លេ។
ក្នុងកិច្ចសម្ភាសន៍ពិសេសស្តីពី «សក្ដានុពល និងការអភិវឌ្ឍខេត្តស្ទឹងត្រែង» ជាមួយក្លឹបអ្នកកាសែតកម្ពុជា នៅដើមសប្តាហ៍នេះ លោក សរ សុពុត្រា អភិបាលនៃគណៈអភិបាលខេត្តស្ទឹងត្រែង បានសង្កត់ធ្ងន់ពីទំនាក់ទំនងរវាងសត្វផ្សោត និងគុណភាពទឹកទន្លេ។ លោកបានលើកឡើងថា «ទីតាំងណាដែលមានវត្តមានសត្វផ្សោតរស់នៅ វាគឺជាសញ្ញាបញ្ជាក់ថា ទឹកទន្លេនៅទីនោះមានសុខភាពល្អ។ ដូច្នេះសត្វផ្សោតមិនអាចរស់នៅក្រៅទឹកបានឡើយ ហើយពួកគេក៏មិនអាចរស់ក្នុងមជ្ឈដ្ឋានដែលមានមេរោគ ឬការបំពុលបានដែរ»។
លោកអភិបាលខេត្តបានបញ្ជាក់ថា ទោះបីជាស្ថានភាពប្រឈមមានច្រើន ប៉ុន្តែក្រោមការតាមដានយ៉ាងស្អិតរមួតពីក្រុមឆ្មាំទន្លេ ខេត្តស្ទឹងត្រែងអាចរក្សាបាននូវស្ថិរភាពចំនួនសត្វផ្សោត ដោយមិនមានការបាត់បង់ក្នុងឆ្នាំនេះនោះទេ។ លោកអភិបាលខេត្ត បានបង្ហាញក្តីសង្ឃឹមយ៉ាងមុតមាំថា តាមរយៈយុទ្ធសាស្ត្រការពារបច្ចុប្បន្ន ចំនួនសត្វផ្សោតនឹងមានការកើនឡើងជាបន្តបន្ទាប់នៅឆ្នាំក្រោយៗទៀត។
ទន្ទឹមនេះ ដើម្បីលើកកម្ពស់ការយល់ដឹងដល់សាធារណជន រដ្ឋបាលខេត្តស្ទឹងត្រែងក៏បានសាងសង់ «រូបសំណាកគ្រួសារផ្សោត» នៅលើសួនបវរធិបតី ដែលតំណាងឱ្យសុភមង្គល សិរីសួស្ដី និងភាពសុខដុមរមនារបស់ប្រជាជនក្នុងខេត្ត។
គិតត្រឹមឆ្នាំ២០២៦ ចំនួនសត្វផ្សោតសរុបក្នុងប្រទេសកម្ពុជា មានចំនួន ១១៣ ក្បាល ,ក្រុមឆ្មាំទន្លេមានចំនួន ៧២ រូប ធ្វើការយាមល្បាត ២៤/៧ នៅតំបន់អភិរក្ស ក្រោមកិច្ចសហការរបស់អន្តរស្ថាប័ន រវាងក្រសួងកសិកម្ម រុក្ខាប្រមាញ់ និងនេសាទ, រដ្ឋបាលខេត្តក្រចេះ-ស្ទឹងត្រែង រដ្ឋបាលជលផលក្រចេះ-ស្ទឹងត្រែង និងអង្គការ WWF។ កិច្ចខិតខំប្រឹងប្រែងនេះ មិនត្រឹមតែជាការការពារប្រភេទសត្វ ដែលជិតផុតពូជប៉ុណ្ណោះទេ ប៉ុន្តែ វាគឺជាការការពារនិរន្តរភាពនៃធនធានធម្មជាតិ និងវិស័យទេសចរណ៍ផ្សារភ្ជាប់នឹងធម្មជាតិ ។
ដូច្នេះ សូមចូលរួមទាំងអស់គ្នា ដើម្បីការពារ “រតនសម្បត្តិរស់” នៃទន្លេមេគង្គឱ្យនៅគង់វង្ស សម្រាប់កូនចៅជំនាន់ក្រោយៗទៀត៕ដោយ៖ឡុង សំបូរ
