កំពង់ធំ៖ ភ្លៀងបានធ្លាក់ជាបន្តបន្ទាប់ជាប់ៗគ្នាក្នុងរយៈពេល ៤ថ្ងៃ បួនយប់ កន្លងមកនេះ បណ្ដាលឱ្យផ្ទះក្រុមគ្រួសារអតីតយុទ្ធជន ដែលកំពុងរស់នៅលើដីសម្បទានសង្គមកិច្ច ស្ថិតនៅឃុំក្រយា ស្រុកសន្ទុក ខេត្តកំពង់ធំ ត្រូវបានលិចលង់រងផលប៉ះពាល់ ដោយសារជំនន់ទឹកភ្លៀង មិនអាចហូរតាមប្រព័ន្ធលូ និងប្រឡាយ ដែលមានស្រាប់
ទាន់ពេលវេលា បណ្ដាលឲ្យផ្ទះក្រុមគ្រួសារតីតយុទ្ធជនចំនួន ៣៥ខ្នង រងផលប៉ះពាល់ផលដំណាំផ្សេងៗ ដោយជំនន់ទឹកភ្លៀងនេះ។
ដោយទទួលបានព័ត៌មាននេះ នៅព្រឹកថ្ងៃទី២០ ខែកញ្ញា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជា ខេត្តកំពង់ធំ បានដឹកនាំសហការី ទៅត្រួតពិនិត្យ និងជួបសំណេះសំណាល ជាមួយក្រុមគ្រួសារអតីតយុទ្ធជនដែលរងផលប៉ះពាល់ដោយជំនន់ទឹកភ្លៀង ដើម្បីរកវិធានការរំដោះទឹកចេញឲ្យបានទាន់ពេលវេលាកុំឲ្យបន្តលិចលង់ បន្តទៅទៀត។
ឧត្តមសេនីយ៍ទោ សោម ស៊ុន បានបញ្ជាក់ថា៖ កន្លងមក ផ្ទះចំនួន ២០៦ខ្នង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ត្រូវបានសាងសង់ឡើង នៅលើដីសម្បទានសង្គមកិច្ច សម្រាប់ផ្ដល់ជូនដល់ក្រុមគ្រួសារអតីតយុទ្ធជន ដែលគ្មានដីគ្មានផ្ទះ នៅឃុំក្រយា ស្រុកសន្ទុក ខេត្តកំពង់ធំ។ ក្នុងនោះផ្ទះចំនួន ១៤១ខ្នង និងដីចំនួនមួយហិកតាកន្លះ ក្នុងមួយគ្រួសារ ត្រូវបានសាងសង់ប្រគល់ និងប្រគល់ជូនអតីតយុទ្ធជន នៅឆ្នាំ២០២១។ ដោយឡែកផ្ទះចំនួន ៦៥ខ្នងទៀត និងដីមួយហិកតា ក្នុងមួយគ្រួសារ ត្រូវបានសាងសង់ប្រគល់ជូនក្រុមគ្រួសារតីតយុទ្ធជននៅដើមឆ្នាំ ២០២៥ កន្លងទៅនេះ។
ឧត្តមសេនីយ៍ទោ សោម ស៊ុន បានបញ្ជាក់បន្ថែមទៀតថា៖ ជំនន់ទឹកភ្លៀងដែលកំពុងជន់លិចធ្វើឲ្យរងផលប៉ះពាល់ដំណាំ បន្លែបង្ការផ្សេងៗ និងការរស់នៅរបស់បងប្អូនអតីតយុទ្ធជននៅពេលនេះ មានចំនួន ៣៥ខ្នងផ្ទះ ក្នុងនោះមានចំនួន ១៨ខ្នងផ្ទះ រងផលប៉ះពាល់ខ្លាំង និងចំនួន ១៧ខ្នងផ្ទះខ្ទងផ្ទះទៀត រងផលប៉ះពាល់មធ្យម ដែលបានបណ្ដាលឲ្យខូចខាតផលដំណាំរបស់ពួកគាត់។ ដេីម្បីជួយសម្រាលដល់ការលំបាកនេះ ឧត្ដមសេនីយ៍សោម ស៊ុន ប្រធានសមាគមបតីតយុទ្ធជនកម្ពុជា ខេត្តកំពង់ធំ ក៏បាននាំយកនូវអំណោយមនុស្សធម៌របស់សម្ដេចមហាបបរិបតី ហ៊ុន ម៉ាណែត និងលោកជំទាវ ឧបត្ថម្ភជូនដល់ក្រុមគ្រួសារអតីតយុទ្ធជនមួយចំនួន ដែលកំពុងជួបការលំបាកដោយគ្រោះទឹកជំនន់នេះផងដែរ ។
ឧត្តមសេនីយ៍ទោ សោម ស៊ុន បានសន្យាថា និងរាយការណ៍ជូនឯកឧត្ដមអភិបាលខេត្ត ប្រធានកិត្តិយសសមាគមអតីតយុទ្ធជនកម្ពុជា ខេត្តកំពង់ធំ នឹងសំណូមពរដល់ស្ថាប័ន មន្ទីរ អង្គភាព ដែលមានការពាក់ព័ន្ធ ដើម្បីសម្របសម្រួលជួយកាយប្រឡាយបន្ថែម តាមស្ថានភាពជាក់ស្ដែង ដើម្បីរំដោះទឹកឱ្យហូរបានលឿន ចៀសវាងរងផលប៉ះពាល់បន្ថែមទៀត ដល់ផលដំណាំ និងការរស់នៅប្រចាំថ្ងៃរបស់បងប្អូនអតីតយុទ្ធជន។ ព្រមជាមួយនោះក៏បានសំណូមពរដល់ក្រុមគ្រួសារអតីតយុទ្ធជន ត្រូវខិតខំថែរក្សាសុខភាព ក្នុងការហូបស្អាត រស់នៅស្អាត និងប្រុងប្រយ័ត្នក្មេងតូចៗ ដែលងាយបណ្ដាលឲ្យរងគ្រោះថ្នាក់ដោយជំនន់ទឹកភ្លៀងនេះ ។
