ខេត្តព្រះវិហារ៖ ប្រជាពលរដ្ឋ (ជនភៀសសឹក) ១ម៉ឺន ៧ពាន់ ៥៨២នាក់ ត្រូវបានភៀសខ្លួនគេចចេញពីតំបន់សង្គ្រាម នៃការបាញ់ប្រហារដ៏អាក្រក់ពីសំណាក់ទាហានសៀម បានបើកការឈ្លាបពានដែនអធិបតេយ្យភាពកម្ពុជាជាថ្មី ធ្វើឲ្យប្រជាពលរដ្ឋកម្ពុជា បានចាកចេញពីទីជម្រក លំនៅដ្ឋានគួរឲ្យសង្វេគ។
យោងតាមរដ្ឋបាលខេត្តព្រះវិហារ បានបង្ហាញឲ្យដឹងថា គិតត្រឹមម៉ោង ៦:០០ល្ងាច ថ្ងៃទី០៩ធ្នូ២០២៥នេះ ស្ថិតិប្រជាពលរដ្ឋភៀសសឹក ដែលបង្ខំចិត្តជម្លៀសខ្លួន បានកើនឡើងដល់ ៥,០៦៩គ្រួសារ ស្មើនឹង ១៧,៥៨២នាក់ ស្រី ១០,២១៣ នាក់ ពួកគាត់ទាំងអស់កំពុងស្នាក់នៅបណ្ដោះអាសន្ន នៅតាមមណ្ឌលសុវត្ថិភាពនានាក្នុងភូមិសាស្ដ្រខេត្ត ក្រោមការសម្របសម្រួល និងយកចិត្តទុកដាក់ខ្ពស់ពីអាជ្ញាធរខេត្តព្រះវិហារ។
ក្រោមការគិតគូ និងយកចិត្តទុកដាក់ពីសុខទុក្ខរបស់ពលរដ្ឋភៀសសឹក ក្នុងគ្រាដែលជួបគ្រោះអាសន្ន រងការវាយប្រហារដោយទាហានសៀម លោក គីម រិទ្ធី អភិបាលនៃគណៈអភិបាលខេត្តព្រះវិហារ អញ្ជើញចុះពិនិត្យទីតាំងភៀសសឹក និងសួរសុខទុក្ខប្រជាពលរដ្ឋដោយផ្ទាល់ នៅមណ្ឌលសុវត្ថិភាពនានាក្នុងភូមិសាស្ត្រខេត្តព្រះវិហារ។
ខេត្តព្រះវិហារ មានមណ្ឌលសុវត្ថិភាពចំនួន ៧ គឺ មណ្ឌលសុវត្ថិភាពវត្តពោធិ៍ ៥ ០០០ ,មណ្ឌលសុវត្ថិភាពវត្តឧត្តមគិរីទួលអណ្ដែត ,មណ្ឌលសុវត្ថិភាពវត្តត្រាវកៀត ,មណ្ឌលសុវត្ថិភាពវត្តពើងអង្គកាម ,មណ្ឌលសុវត្ថិភាពវត្តពើងព្រះគោ ,មណ្ឌលសុវត្ថិភាពវត្តគីឡូលេខ៨ និងមណ្ឌលសុវត្ថិភាពវត្តកំពង់សង្កែ។
ទាហានសៀមបានបើកការបាញ់ប្រហារជាថ្មី មកលើកងកម្លាំងកម្ពុជា ដោយបានចាប់ផ្តើមពីម៉ោងប្រមាណ ០៥:០៤នាទីព្រឹកថ្ងៃទី៨ ខែធ្នូ ឆ្នាំ២០២៥ ការបើកការវាយប្រហារនេះ បានធ្វើឡើងនៅក្នុងតំបន់អានសេះ ,តំបន់ប្រាសាទព្រះវិហារ ,៥មករា ,ចំការចេក ,មុំបី ,ភ្នំខ្មោច និងនៅគោល៨ ។
ស្របពេលជាមួយគ្នានោះ ទាហានសៀមបានពង្រីកការឈ្លានពានទឹកដីកម្ពុជា នៅក្នុងភូមិសាស្ត្រខេត្តព្រះវិហារ ឧត្តរមានជ័យ បន្ទាយមានជ័យ និងខេត្តពោធិ៍សាត់។ សកម្មភាពឈ្លានពានដោយប្រដាប់អាវុធរបស់ភាគីថៃ មកលើកម្ពុជាជាលើកទី២នេះ គឺបានបង្ហាញឲ្យឃើញយ៉ាងច្បាស់ នូវចេតនារបស់ភាគីថៃ ក្នុងការឈ្លានពានវាតយកទឹកដីប្រទេសជិតខាង៕ដោយ៖ឡុង សំបូរ
