ឧកញ៉ា ជិន ស៊ី និងអ្នកពាក់ព័ន្ឋពីរនាក់ទៀត ត្រូវបានសមត្ថកិច្ចកម្ពុជាចាប់បញ្ជូនទៅប្រទេសចិន ក្រោមបទចោទប្រកាន់លើករណីឆបោកតាមអនឡាញទ្រង់ទ្រាយធំ របស់តុលាការសហរដ្ឋអាមេរិក។
យោងតាមសេចក្តីប្រកាសព័ត៌មានរបស់ក្រសួងមហាផ្ទៃកាលពីយប់ថ្ងៃទី ០៧ ខែមករា ឆ្នាំ២០២៦ បានបញ្ជាក់ពីការចាប់ខ្លួន Chen Zhi និងឈ្មោះ Xu Ji Liang ជាមួយនឹងឈ្មោះ Shao Ji Hui ផងដែរ។ ដោយជនជាប់ចោទទាំង៣នាក់ត្រូវចាប់បញ្ជូនខ្លួនទៅសាធារណរដ្ឋប្រជាមានិតចិន។
នៅក្នុងសំណុំរឿងនេះ តុលាការអាមេរិកបានធ្វើការចោទប្រកាន់បុគ្គលទាំង៣ ជាប់ពាក់ព័ន្ធនឹងការឆបោកតាមអនឡាញ ទ្រង់ទ្រាយធំ ដែលតុលាការអាមេរិកបានចោទប្រកាន់។
នៅក្នុងសេចក្ដីប្រកាសព័ត៌មាននៅយប់ថ្ងៃទី៧ ខែមករា នេះ ក្រសួងមហាផ្ទៃបញ្ជាក់ថា ក្នុងក្របខ័ណ្ឌនៃកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន និងផ្អែកតាមសំណើរបស់អាជ្ញាធរ មានសមត្ថកិច្ចនៃសាធារណរដ្ឋប្រជាមានិតចិន សមត្ថកិច្ចនៃព្រះរាជាណាចក្រកម្ពុជា បានចាប់ខ្លួនពលរដ្ឋ ចិនចំនួន៣នាក់ រួមមាន ឈ្មោះ Chen Zhi ឈ្មោះ Xu Ji Liang និងឈ្មោះ Shao Ji Hui បញ្ជូនទៅ សាធារណរដ្ឋប្រជាមានិតចិន។
ក្រសួងបញ្ជាក់ថា៖ «ប្រតិបត្តិការនេះ បានធ្វើឡើងកាលពីថ្ងៃទី៦ ខែមករា ឆ្នាំ២០២៦ បន្ទាប់ពីសមត្ថកិច្ចនៃព្រះរាជាណាចក្រកម្ពុជា និងសមត្ថកិច្ចនៃសាធារណរដ្ឋប្រជាមានិតចិន បានសហការស៊ើបអង្កេតរួមគ្នា អស់រយៈពេលជាច្រើនខែ»។
ក្រសួងបន្តថា៖ «ក្រសួងមហាផ្ទៃ នៃរាជរដ្ឋាភិបាលកម្ពុជា សូមបញ្ជាក់ជូនថា ឈ្មោះ Chen Zhi ត្រូវបានព្រះមហាក្សត្រ ចេញព្រះរាជក្រឹត្យដកសញ្ជាតិខ្មែរ ដោយផ្អែកតាមច្បាប់សញ្ជាតិនៃ ព្រះរាជាណាចក្រកម្ពុជា កាលពីខែធ្នូ ឆ្នាំ២០២៥»៕
