(ខេត្តកំពង់ធំ)៖ នៅព្រឹកថ្ងៃទី១៣ ខែមករា ឆ្នាំ២០២៦ គណៈបញ្ជាការឯកភាពរដ្ឋបាលខេត្តកំពង់ធំ បានបេីកកិច្ចប្រជុំបូកសរុបលទ្ធផលការងារប្រចាំខែធ្នូ ឆ្នាំ២០២៥ និងដាក់ចេញនូវទិសដៅអនុវត្តបន្ត ដែលដែលកិច្ចប្រជុំនេះប្រព្រឹត្ដទៅស្ថិតក្រោមអធិបតីភាពឯកឧត្ដម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ។
បន្ទាប់ពីការប្រកាសបេីកអង្គប្រជុំរបស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ឧត្ដមសេនីយ៍ត្រី ពេជ ថាល់ ប្រធានក្រុមការងារលេខាធិការដ្ឋានគណៈបញ្ជាការឯកភាពរដ្ឋបាលខេត្ត បានឡើងរាយការណ៍អំពីសភាពការណ៍ទូទៅប្រចាំខែធ្នូ ឆ្នាំ២០២៥ ក្នុងនោះបានលើកឡេីងអំពីការងារសន្តិសុខ សណ្តាប់ធ្នាប់សង្គម ដែលបានបម្រើជូនប្រជាជនតាមគោលនយោបាយភូមិ ឃុំ មានសុវត្ថិភាព ពិសេសបានសង្កត់ធ្ងន់ក្នុងលទ្ធផល និងសកម្មភាពការងារការពារ ទប់ស្កាត់ និងបង្ក្រាបបទល្មើសធនធានធម្មជាតិ យ៉ាងសកម្មរបស់កងកម្លាំងចម្រុះផងដែរ ។
ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានគណ:បញ្ជាការឯកភាពរដ្ឋបាលខេត្ត បានឡើងរាយការណ៍អំពីលទ្ធផលសំខាន់ៗ នៃការការពារ ទប់ស្កាត់ និងបង្ក្រាបបទល្មើសធនធានធម្មជាតិ នាពេលកន្លងទៅ ដោយបានគូសបញ្ជាក់អំពីសកម្មភាពជនល្មើសមួយចំនួន នៅតែបំពានដោយគ្មានកោតខ្លាចក្នុងការលួចកាប់ទន្ទ្រានព្រៃឈើយកដីរបស់រដ្ឋធ្វើជាកម្មសិទ្ធិ នៅចំណុចមួយចំនួន នៅក្នុងភូមិសាស្ត្រស្រុកសណ្តាន់។ រីឯបទល្មើសនេសាទដែលមានលក្ខណៈទ្រង់ទ្រាយធំមានការថយចុះ គួរឲ្យកត់សម្គាល់ តែបទល្មើសនេសាទខុសច្បាប់នៅតែមានការកេីតឡេីងលួចលាក់ដាក់របាំងសាច់អួនក្រឡាញឹក និងរបាំងស្បៃមុង នៅក្នុងតំបន់ព្រៃរនាម និងនៅក្នុងតំបន់ជ្រៅ ។
ឧត្ដមសេនីយ៍ទោ សោម ស៊ុន បានប្តេជ្ញាចិត្តអនុវត្តយ៉ាងមុឺងម៉ាត់ តាមបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងបទបញ្ជារបស់ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ក្នុងការបន្តសហការជាមួយអាជ្ញាធរដែនដី និងស្ថាប័នជំនាញពាក់ព័ន្ធ ដេីម្បីអនុវត្តឲ្យមានប្រសិទ្ធភាពក្នុងការ ការពារ ទប់ស្កាត់ និងបង្ក្រាបបទល្មើសធនធានធម្មជាតិឲ្យមានប្រសិទ្ធភាព ។
ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ បានថ្លែងអំណរគុណចំពោះកងកម្លំាងប្រដាប់អាវុធទាំងបី អាចជ្ញាធរដែនដី គ្រប់ថ្នាក់ និងមន្ត្រីសមត្ថកិច្ចជំនាញដែលបានខិតខំប្រឹងប្រែងបំពេញភារកិច្ចការពារសន្តិសុខ សុវត្ថិភាព និងសណ្ដាប់ធ្នាប់សង្គម ជូនប្រជាពលរដ្ឋនៅក្នុងខេត្តកំពង់ធំ បានយ៉ាងល្អប្រសើរ ។ ជាមួយនេះដែរ ឯកឧត្ដមប្រធានគណៈបញ្ជាការឯកភាពរដ្ឋបាលខេត្ត ក៍បានប្រគល់ភារកិច្ចដល់កងកម្លំាងចម្រុះទាំងអស់ ត្រូវរួមគ្នាជាមួយអាជ្ញាធរដែនដី និងមន្ត្រីជំនាញសមត្ថកិច្ច ត្រូវរួមគ្នាបន្តជួយគាំទ្រដល់សមរភូមិមុខ ការបង្ក្រាបបទល្មើសឆបោកតាមប្រព័ន្ធបច្ចេកវិទ្យាស្គែមអនឡាញ ។ ការងារកសិកម្ម និងឧហ្សាហកម្ម និងត្រូវយកចិត្តទុកដាក់រួមគ្នាទទួលខុសត្រូវក្នុងការ ការពារ ទប់ស្កាត់ និងបង្ក្រាបបទល្មើសធនធានធម្មជាតិឲ្យមានប្រសិទ្ធភាព ។ ដោយលោក ធូ កែវមុន្នី
