សៀមរាប: ខណៈដែលធនធានជីវៈចម្រុះ និងពូជលៀសក្នុងបឹងទន្លេសាបកំពុងរងការរងគ្រោះដោយសារការនេសាទហួសកម្រិត មហាជនបាននិងកំពុងដាក់សំណួរទៅលើប្រសិទ្ធភាពការងាររបស់ មន្ត្រីជំនាញរដ្ឋបាលជលផលខេត្តសៀមរាប ដែលហាក់បង្ហាញសកម្មភាពត្រឹមតែរូបភាពបង្កប់ន័យ «ធ្វើការតាមបង្គាប់» នៅពេលមានវត្តមានថ្នាក់ដឹកនាំខេត្តចុះមកពិនិត្យតែប៉ុណ្ណោះ។
ការចុះណែនាំដែលហាក់ដូចជាយឺតពេល
កាលពីថ្ងៃទី១៣ ខែមករា ឆ្នាំ២០២៦ ក្នុងឱកាសដែលលោក អ៉ឹង គឹមលាង អភិបាលរងខេត្តសៀមរាប ចុះផ្ទាល់ដល់ឃុំកំពង់ឃ្លាំង ស្រុកសូទ្រនិគម ដើម្បីពិនិត្យការនេសាទលៀស ទើបគេឃើញមន្ត្រីជំនាញជលផលចេញមុខមកបង្ហាញតួលេខ និងពន្យល់ពីច្បាប់។ 
លោកអភិបាលរងខេត្ត បានសង្កត់ធ្ងន់ និងជំរុញឲ្យមន្ត្រីជំនាញត្រូវបង្កើនការទប់ស្កាត់ការនេសាទយកលៀសតូចៗ ដែលមិនទាន់គ្រប់ខ្នាត ដែលចំណុចនេះឆ្លុះបញ្ចាំងថា កន្លងមកការគ្រប់គ្រងរបស់មន្ត្រីជំនាញនៅមានភាពធូររលុង ទើបបណ្តោយឲ្យបទល្មើសខុសច្បាប់នៅតែបន្តកើតមាន។
សំណួរជុំវិញតួលេខ ២០% នៃអ្នកល្មើសច្បាប់
លោកនាយខណ្ឌរដ្ឋបាលជលផលសៀមរាប បានអះអាងថា ប្រជានេសាទប្រមាណ ៨០% អនុវត្តតាមច្បាប់ ប៉ុន្តែនៅសល់ ២០% ទៀតដែលនៅតែបន្តនេសាទខុសច្បាប់ និងប្រើប្រាស់ទូកម៉ាស៊ីនខ្នាតធំអូសបំផ្លាញប្រព័ន្ធអេកូឡូស៊ីបាតទន្លេ។ 
សាធារណជនបានរិះគន់ថា៖
តើហេតុអ្វីបានជាមន្ត្រីជំនាញដឹងថាមានអ្នកល្មើសច្បាប់ ២០% ហើយ តែមិនមានវិធានការណ៍ក្តៅមុនពេលថ្នាក់ដឹកនាំខេត្តចុះមក?
ការដែលមន្ត្រីជំនាញទើបតែមកចាក់លៀសតូចៗចំនួន ១,២០០ គីឡូក្រាម ចូលទន្លេវិញនៅចំពោះមុខថ្នាក់ដឹកនាំ តើវាជាការដោះស្រាយបញ្ហាពីឫសគល់ ឬគ្រាន់តែជាការធ្វើឡើងដើម្បីបង្ហាញស្នាដៃបង្គ្រប់កិច្ច?
ផលប៉ះពាល់ និងការទទូចពីមហាជន
ការប្រើប្រាស់ឧបករណ៍នេសាទខុសច្បាប់ និងការប្រមូលយកលៀសដែលមិនទាន់គ្រប់ខ្នាត (តូចជាង ៣សង់ទីម៉ែត្រ) មិនត្រឹមតែបំផ្លាញពូជលៀសប៉ុណ្ណោះទេ ប៉ុន្តែវាកំពុងធ្វើឲ្យបាត់បង់តុល្យភាពធម្មជាតិនៅបាតទន្លេសាបយ៉ាងធ្ងន់ធ្ងរ។
មហាជនរំពឹងថា មន្ត្រីរដ្ឋបាលជលផលខេត្តសៀមរាប គួរតែចុះអនុវត្តច្បាប់ឲ្យបានជាប់ជាប្រចាំដូច «ភ្លៀងរលឹម» ជាជាងការធ្វើការបែប «ចាំអូសទាញ» ពីថ្នាក់ដឹកនាំខេត្ត។ ប្រសិនបើមន្ត្រីជំនាញនៅតែបន្តធ្វើការតាមទម្លាប់ចាស់ បទល្មើសនេសាទនឹងមិនអាចរលាយបាត់ឡើយ ហើយធនធានជលផលក្នុងខេត្តសៀមរាប នឹងត្រូវរលាយហិនហោចក្នុងពេលដ៏ខ្លីខាងមុខ។
ដោយប៊ុនរដ្ឋា
