ប៉ៃលិន៖ នៅសាលប្រជុំពន្ធនាគារខេត្ត នាថ្ងៃទី១០ ខែកុម្ភៈ ឆ្នាំ២០២៦ លោកឧត្តមអគ្គានុរក្សថ្នាក់លេខ៣ កូវ កឿត ប្រធានពន្ធនាគារខេត្តប៉ៃលិន បានរៀបចំកិច្ចប្រជុំរួម ស្ដីពីការត្រួតពិនិត្យការងារប្រចាំខែ កុម្ភៈ ឆ្នាំ២០២៦ និងផ្សព្វផ្សាយសេចក្ដីណែនាំក្នុងស្មារតីអង្គសន្និបាត ត្រួតពិនិត្យលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងមហាផ្ទៃ កាលពីថ្ងៃទី ៤-៥ ខែកុម្ភៈ ឆ្នាំ២០២៦។
លោកឧត្តមអគ្គានុរក្សថ្នាក់លេខ៣ កូវ កឿត ប្រធានពន្ធនាគារខេត្តប៉ៃលិន បានធ្វើការវាយតម្លៃខ្ពស់ ចំពោះកិច្ចខិតខំប្រឹងប្រែង របស់មន្ត្រីគ្រប់លំដាប់ថ្នាក់ ក្នុងការថែរក្សាសន្តិសុខ សុវត្ថិភាព និងសណ្ដាប់ធ្នាប់ ក្នុងពន្ធនាគារ។ ចំណុចសំខាន់ៗដែលបានលើកយកមកពិភាក្សារួមមាន៖ ទី១. ការគ្រប់គ្រងជនជាប់ឃុំ ជំរុញឲ្តមានការធានាបាន នូវការហូបចុក អនាម័យ និងសុខភាព។ ទី២. បង្កើនការប្រុងប្រយ័ត្នខ្ពស់ ដើម្បីទប់ស្កាត់រាល់បទល្មើសផ្សេងៗ ដែលមានកើតជាយថាហេតុ។ជាមួយគ្នានេះ លោកឧត្តមអគ្គានុរក្សថ្នាក់លេខ៣ កូវ កឿត ប្រធានពន្ធនាគារខេត្តប៉ៃលិន ក៍បានធ្វើការផ្សព្វផ្សាយស្មារតីអង្គសន្និបាត របស់ក្រសួងមហាផ្ទៃ ដោយលោកឧត្តមអគ្គានុរក្សថ្នាក់លេខ៣ កូវ កឿត បានសង្កត់ធ្ងន់ លើសេចក្ដីណែនាំថ្មីៗ ដើម្បីតម្រង់ទិសដៅការងារឆ្នាំ២០២៦ ដូចជា ៖ បង្កើនប្រសិទ្ធភាពការងារ និងក្រមសីលធម៌វិជ្ជាជីវៈ ជាមន្ត្រីពន្ធនាគារ។ ជំរុញការអនុវត្តគោលនយោបាយ កំណែទម្រង់ វិស័យពន្ធនាគារ ឲ្យកាន់តែមានភាពល្អប្រសើរ, បន្តយកចិត្តទុកដាក់ លើការបណ្ដុះបណ្ដាលវិជ្ជាជីវៈ ដល់ជនជាប់ឃុំ ដើម្បីត្រៀមខ្លួនសមាហរណកម្មចូលក្នុងសង្គមវិញ។
កិច្ចប្រជុំនេះ បានបង្ហាញពីការប្ដេជ្ញាចិត្តខ្ពស់ របស់ថ្នាក់ដឹកនាំពន្ធនាគារខេត្តប៉ៃលិន ក្នុងការអនុវត្ត តាមបទបញ្ជា របស់អគ្គនាយកដ្ឋានពន្ធនាគារ ក៏ដូចជាក្រសួងមហាផ្ទៃ ដើម្បីធានាបាន នូវសន្តិសុខ និងយុត្តិធម៌សង្គមផងដែរ៕
អត្ថបទ ភ្នំខៀវ ប៉ៃលិន (រិទ្ធ)
