(កំពង់ធំ)៖ លោក គង់ សំអាត អភិបាលស្រុកប្រាសាទបល្ល័ង្ក នៅថ្ងៃទី០៤ ខែមីនា ឆ្នាំ២០២៦ បានដឹកនាំក្រុមការងារអញ្ជើញចុះពិនិត្យស្ថានភាព ការស្ថាបនាផ្លូវចំនួន ២ខ្សែ ប្រវែងជាង៨គីឡូម៉ែត្រ ស្ថិតនៅក្នុងឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។
លោក ជិន ហ៉ីន ប្រធានក្រុមប្រឹក្សាឃុំសាលាវិស័យ បានឱ្យដឹងថា ក្រសួងអភិវឌ្ឍន៍ជនបទ តាមរយៈគម្រោងប្រកួតប្រជែងខ្សែច្រវ៉ាក់តម្លៃ និងលើកកម្ពស់សុវត្ថិភាពកសិកម្ម ដែលទទួលបានថវិកាបន្ថែមពីធនាគារអភិវឌ្ឍន៍អាស៊ី(ADB) ទីភ្នាក់ងារសម្រាប់អភិវឌ្ឍន៍បារាំង(AFD) និងបដិភាគរបស់រាជរដ្ឋាភិបាលកម្ពុជា បានជ្រើសរើសខ្សែផ្លូវបន្ថែមចំនួន២ខ្សែ ក្នុងឃុំសាលាវិស័យ សម្រាប់សាងសង់ជាផ្លូវក្រាលកៅស៊ូពីរជាន់ (DBST)និងកម្រាលបេតុង ដែលនឹងកំពុងសាងសង់ និងដំណើរការស្ថាបនានេះ។
ក្នុងនោះលោកមេឃុំបានបញ្ជាក់ថា÷ការដំណើរការនៃគម្រោងសាងសង់បានចាប់ផ្ដើមមានផ្លូវ២ខ្សែ ក្នុងភូមិសាស្ត្រឃុំសាលាវិស័យ រួមមាន÷ ខ្សែទី១ ប្រវែង៣.៤៣គីឡូម៉ែត្រ តភ្ជាប់ពីភូមិចំណារ ឃុំសាលាវិស័យ ស្រុកប្រាសាទបល្ល័ង្ក ទៅភូមិអូរគ្រូកែ ឃុំសបូរណ៍ ស្រុកប្រាសាទសំបូរ ខេត្តកំពង់ធំ។ ខ្សែទី២ ប្រវែង ៤.៨១គីឡូម៉ែត្រ តភ្ជាប់ពីភូមិខ្មាក់ ទៅភូមិវាលល្ពាក់ ឃុំសាលាវិស័យ ស្រុកប្រាសាទបល្ល័ង្គ ។
លោក គង់ សំអាត អភិបាល នៃគណៈអភិបាលស្រុកប្រាសាទបល្ល័ង្ក មានប្រសាសន៍ថា ផ្លូវ និងស្ពាន គឺជា សរសៃឈាមសេដ្ឋកិច្ចជាតិ និងជាអាទិភាពគន្លឹះទី២ នៃយុទ្ធសាស្ត្របញ្ចកោណ (មនុស្ស ផ្លូវ ទឹក ភ្លើង បច្ចេកវិទ្យា) របស់រាជរដ្ឋាភិបាលកម្ពុជា។ ហេដ្ឋារចនាសម្ព័ន្ធទាំងនេះជួយសម្រួលការធ្វើដំណើរ ដឹកជញ្ជូនកសិផល ជំរុញទេសចរណ៍ និងតភ្ជាប់សេដ្ឋកិច្ចមូលដ្ឋានទៅកាន់ទីផ្សារ ពិសេសតភ្ជាប់ពីតំបន់មួយទៅតំបន់មួយ។
លោកអភិបាលនៃគណៈអភិបាលស្រុក បានឱ្យដឹងថា ផ្លូវមួយខ្សែនេះ បានសម្រួលដល់អត្ថប្រយោជន៍សេដ្ឋកិច្ចដល់បងប្អូនប្រជាពលរដ្ឋ ក្នុងការប្រាស័្រយទាក់ទងគ្នាពីភូមិមួយទៅភូមិមួយនៅក្នុងមូលដ្ឋានឃុំ ស្រុក ដោយបងប្អូននៅក្នុងភូមិសាស្ត្រ ឃុំសាលាវិស័យ ទាំងប្រាំង និងវស្សា ក្រៅពីការធ្វើស្រូវចំការ បានធ្វើការដាំបន្លែបង្កាគ្រប់មុខរួមផ្សំដើមី្បផ្គត់ផ្គង់ដល់ទីផ្សារទៀតផង។ម៉្យាងទៀតផ្លូវមួយខ្សែនេះ ជួយសម្រួលដល់ចរាចរណ៍របស់សិស្សានុសិស្ស ,ដឹកជញ្ជូនអ្នកជំងឺទៅមន្ទីរពេទ្យ ,ការដឹកជញ្ជូនកសិផលទៅកាន់ទីផ្សារជាដើម។
លោកបបានសំណូមពរនិងជំរុញលើកទឹកចិត្តដល់ម្ចាស់ក្រុមហ៊ុនម៉ៅការសាងសង់ដែលកំពុងស្ថាបនាផ្លូវមួយខ្សែនេះត្រូវធ្វើយ៉ាងណាធ្វើតាមបច្ចេកទេសស្តង់ដារធានាឱ្យបាននៅគុណភាពនិងស្តង់ដាដែលបានចុះកិច្ចសន្យានិងកិច្ចព្រមព្រៀង ក្នុងការស្ថាបនាផ្លូវ សំណង់សិល្បៈការ្យ ដើមី្បធានានូវគុណភាព និងការប្រើប្រាស់ឱ្យបានយូរអង្វែង ព្រមទាំងបានគូសបញ្ជាក់ថា ស្ថិតនៅក្រោមម្លប់សុខសន្តិភាព ប្រទេសជាតិ យើងក៏មានការអភិវឌ្ឍលើគ្រប់វិស័យតាំងពីទីប្រជុំជនមកដល់ជនបទ។ កត្តាសំខាន់នោះ គឺហេដ្ឋារចនាសម្ព័ន្ធផ្លូវថ្នល់ ដែលជាសរសៃឈាមសេដ្ឋកិច្ចជាតិ ពិសេសសេដ្ឋកិច្ចរបស់បងប្អូនប្រជាពលរដ្ឋយើង (មានផ្លូវគឺមានក្តីសង្ឃឹម)។ ដូច្នេះ យើងគ្រប់រូប ត្រូវអរគុណសន្តិភាព អរគុណនយោបាយឈ្នះ-ឈ្នះ, ដឹងគុណជានិច្ចមគ្គទេសក៍ឯក សម្តេចតេជោ ហ៊ុន សែន និងប្រតិបត្តិករ នៃនយោបាយឈ្នះ-ឈ្នះ ដែលបានបញ្ចប់សង្រ្គាមស៊ីវិលនៅកម្ពុជា ព្រមទាំងបង្កើតបានសន្តិភាព និងការបង្រួបបង្រួមទឹកដីពេញលេញនៅកម្ពុជា នាំមកនូវការអភិវឌ្ឍន៍ ។
លោកអភិបាលស្រុក ថ្លែងអំណរគុណដល់មន្ទីរអភិវឌ្ឍន៍ជនបទខេត្តកំពង់ធំ ពិសេសក្រសួងអភិវឌ្ឍន៍ជនបទ ដែលជាសេនាធិការរាជរដ្ឋាភិបាល បាននឹងកំពុងផ្ដោតការយកចិត្តទុកដាក់យ៉ាងខ្លាំងលើការងារស្ថាបនាផ្លូវ ដោយបានគិតគូរពីភាពធន់ នឹងការប្រែប្រួលអាកាសធាតុ ដើម្បីការប្រើប្រាស់បានយូរអង្វែង ព្រោះផ្លូវពិតជាមានសារសំខាន់បំផុត ក្នុងការជំរុញដំណើរអន្តរកម្មផ្នែកសេដ្ឋកិច្ច និងសង្គមកិច្ចនៅតំបន់ជនបទ និងកាត់បន្ថយគម្លាតរវាងតំបន់ជនបទ ទីប្រជុំជន និងដើម្បីផ្តល់ភាពងាយស្រួលក្នុងការធ្វើចរាចរណ៍ទៅមក ការដឹកជញ្ជូនកសិផល និងដំណាំបន្ទាប់បន្សំរបស់ប្រជាពលរដ្ឋក្នុងមូលដ្ឋាន។
ក្នុងនោះលោកក៏បានធ្វើការផ្តាំផ្ញើដល់អាជ្ញាធរមូលដ្ឋាន និងបងប្អូនប្រជាពលរដ្ឋដែលបានរស់នៅតាមដងផ្លូវនេះ ត្រូវចូលរួមសហការជាមួយក្រុមហ៊ុនសាងសង់ ក្នុងការសម្រួល លើការស្ថាបនាផ្លូវមួយខ្សែនេះឱ្យមានភាពល្អប្រសើរ និងជួយពន្លឿននៅក្នុងការសាងសង់ផ្លូវឱ្យបានលឿនតាមផែនការដែលបានគ្រោងទុក ពិសេសផលប៉ះពាល់ អាជ្ញាធរមូលដ្ឋាននិងបងប្អូនប្រជាពលរដ្ឋត្រូវចូលរួមដោះស្រាយនិ ងលះបង់ជាសាធារណៈ ដើម្បីឱ្យផ្លូវយើងមានភាពធន់ មានគុណភាព និងមានសោភ័ណភាព ដែលពោលគឺហេដ្ឋារចនាសម្ព័ន្ធជនបទមានភាពល្អ ស្អាត ប្រកបដោយភាពស្រស់បំព្រង ។
