ខេត្តព្រះវិហារ៖ ក្រុមមន្ត្រីឧទ្យានុរក្ស នៃមន្ទីរបរិស្ថានខេត្តព្រះវិហារ ដែលដឹកនាំដោយលោក ឈុន ឆេន និងមានការចូលរួមពីមន្ត្រីរាជការ និងសមាជិកក្រុមស្នូលបណ្តាញព្រៃព្រះរការ នៅរយៈពេល ២ថ្ងៃកន្លងមកនេះ (ថ្ងៃ២-៣មីនា២០២៦) បានផ្តួចផ្តើមរៀបចំពិធីរំលឹកឧទ្ទិសដល់សត្វដំរី (មេនិងកូន)ចំនួន ២ក្បាល ដែលបានស្លាប់កាលពីអំឡុងខែធ្នូ ឆ្នាំ២០២៥ និងពិធីបុណ្យខួបបំបួសព្រៃព្រះរការ ដោយមានការនិមន្តព្រះសង្ឃ ចាស់ព្រឹទ្ធាចារ្យ ប្រជាពលរដ្ឋនៅតាមសហគមន៍មូលដ្ឋាន ក្រុមអង្គការសង្គមស៊ីវិលសរុប ប្រមាណ២០០អង្គ/នាក់ ។
ពិធីបុណ្យរំលឹក និងបុណ្យបំបួសដើមឈើ គឺជាប្រពៃណីរបស់ជនជាតិដើមភាគតិច រស់នៅក្នុងព្រៃតំបន់ការពារធម្មជាតិ តាំងពីយូរលង់ណាស់មកហើយ។ ដោយឡែក នៅក្នុងឆ្នាំ២០២៦នេះ គឺជាខួបលើកទី៩ នៃការរៀបចំពិធីបុណ្យ ក្នុងគោលបំណងរំលឹកដល់គុណព្រៃឈើ និងជីវចម្រុះ លើកកម្ពស់ការយល់ដឹង ការចូលរួមថែរក្សាការពារ និងអភិរក្សធនធានធម្មជាតិ ដែលជាសម្បត្តិដ៏មានតំម្លៃរបស់ជាតិ និងប្រជាជនកម្ពុជា ទុកសម្រាប់កូនចៅជំនាន់ក្រោយ។
ការរៀបចំពិធីបុណ្យខួបឆ្នាំ២០២៦នេះ ត្រូវបានរួមបញ្ចូលជាមួយការប្រារព្ធពិធីបុណ្យរំលឹកឧទ្ទិសដល់សត្វដំរី (មេនិងកូន) ចំនួន២ក្បាល ដែលបានស្លាប់ (រលូតស្លាប់) បន្ទាប់ពីរងរបួសធ្ងន់ធ្ងរ នៃការបាញ់ផ្លោងរបស់ក្រុមទាហានសៀម ចូលមកក្នុងទឹកដីប្រទេសកម្ពុជា កាលពីអំឡុងខែធ្នូ ឆ្នាំ២០២៥ នៅក្នុងដែនជម្រកសត្វព្រៃព្រះរការ ត្រង់ចំណុចអូរស្កាច ស្ថិតក្នុងស្រុកឆែប ខេត្តព្រះវិហារ ។
យោងតាមការសិក្សាស្រាវជ្រាវ ដំរីព្រៃក្នុងដែនជម្រកសត្វព្រៃព្រះរការ-ឆែប ខេត្តព្រះវិហារ មានចំនួនចន្លោះពី១៥-២០ក្បាល។ ពួកវាធ្វើដំណើររកស៊ីជាក្រុម ឆ្លងកាត់ពីប្រទេសកម្ពុជាទៅឡាវ និងថៃ (ទៅមក)។ ទន្ទឹមនេះ មន្ត្រីជំនាញក្រសួងបរិស្ថាន មានគម្រោងរក្សាទុកគ្រោងឆ្អឹងដំរី ធ្វើជាសំណាក និងរៀបចំទុកដាក់រឿងរ៉ាវសម្រាប់ការសិក្សាស្រាវជ្រាវបន្ត ៕ដោយ៖ឡុង សំបូរ
