សៀមរាប: គណៈប្រតិភូសាលាដំបូងខេត្តសៀមរាប ដឹកនាំដោយឯកឧត្តម ហុក វ៉ាន់ធីណា ប្រធានសាលាដំបូងខេត្តសៀមរាប និង ឯកឧត្តម សៀង សុខ ព្រះរាជអាជ្ញា នៃអយ្យការអមសាលាដំបូងខេត្ត រួមមន្ត្រីក្រោមឱវាទ បាននាំយកអំណោយជាគ្រឿងឧបភោគបរិភោគ មានអង្ករ ១៥តោន ថវិកា ចំនួន ៤៥លានរៀល និង សម្ភារៈប្រើប្រាស់ ប្រគល់ជូនដល់យោធ
ភូមិភាគទី៤ ,កងពលធំអន្តរាគមន៍លេខ២ និង រដ្ឋបាលខេត្ត សៀមរាប ក្រោមវត្តមានរបស់ឯកឧត្តម ឧត្តសេនីយ៍ឯក ពៅ ហេង អគ្គមេបញ្ជាការរងកងទ័ពជើងគោក និងជាមេបញ្ជា ការយោធភូមិភាគទី៤ និង ឯកឧត្តមឧត្តមសេនីយ៍ឯក កែវ ធី អគ្គមេបញ្ជាការរងកងទ័ពជើងគោក និងជាមេបញ្ជាការ កងពលធំអន្តរាគមន៍លេខ២ និង លោក ង៉ូវ សេងកាក់ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត នាព្រឹកថ្ងៃទី០៦ ខែ មករា ឆ្នាំ២០២៦នេះ។
មានប្រសាសន៍នោះដែរឯកឧត្តម ឧត្តសេនីយ៍ឯក ពៅ ហេង ក៏បានលើកផងដែរ អំពីស្ថានភាពនៅតាមខែ្ស បន្ទាត់ព្រំដែន នៅតែមានស្ថានភាពផុយស្រួយបំផុត ដោយល្បិចកលរបស់សត្រូវឈ្លានពាន មិនបានគោរពនូវការឈប់ បាញ់ ដែលបានព្រមព្រៀងគ្នាកាលពីថ្ងៃទី ២៧ ខែធ្នូ ឆ្នាំ២០២៥នោះឡើយ ។ ម៉្យាងទៀតពួកសត្រូវបានបំពានទៅនឹង ច្បាប់អន្តរជាតិ ដោយពួកខ្លាំងបានបំផ្លាញផ្ទះសម្បែង និង គាស់ផ្ទះ យកទ្រព្យសម្បត្តិរបស់ប្រជាពលរដ្ឋគ្មានសល់ ។ ឯកឧត្តមឧត្តមសេនីយ៍ឯក ក៏បានថ្លែងអំណរគុណដល់ប្រតិភូសាលាដំបូងខេត្ត ដែលបាលផ្តល់នូវគ្រឿងឧបភោគបរិភោគ និង សម្ភារៈប្រើប្រាស់ដល់ពលទាហានជួរមុខពេលនេះ ជាការលើកទឹកចិត្តដល់កងកម្លាំងទាំងអស់ ដែលបាន កំពុងប្រឈមមុខតតាំងជាមួយខ្លាំងសត្រូវឈ្លានពាន នៅតាមព្រំដែនកម្ពុជា ថៃ ។
ក្នុងឱកាសដ៏មានអត្ថន័យនេះ ឯកឧត្តមហុក វ៉ាន់ធីណា ប្រធានសាលាដំបូងខេត្ត បានសម្តែងពីវីរៈភាពមេទ័ពខ្មែរ ក៏ដូចជាកងទ័ពខ្មែរគ្រប់រូប និង ក្រុមគ្រួសារ ដែលហ៊ានលះបង់អាយុជីវិត សាច់ស្រស់ ឈាមស្រស់ និងកម្លាំងកាយចិត្ត ដើម្បីការពារអធិបតេយ្យភាពនិងបូរណភាពទឹកដីនៃមាតុភូមិកម្ពុជាពីការឈ្លានពានដ៏ព្រៃផ្សៃរបស់សត្រូវ។ឯកឧត្តម បានបន្តទៀតថា អំណោយទាំងនេះ គឺជាទឹកចិត្តរបស់មន្ត្រីក្រោមឱវាទសាលាដំបូងខេត្ត និង បងប្អូនសប្បុរសជន ក្នុងការចូលរួមសម្រាលបន្ទុករបស់រាជរដ្ឋាភិបាលកម្ពុជា ហើយការមកជួបសួរសុខទុក្ខនេះ មិនត្រឹមតែជាការសួរសុខទុក្ខធម្មតាប៉ុណ្ណោះទេ ប៉ុន្តែជាការបង្ហាញពីការកោតសរសើរ ការគាំទ្រ ការលើកទឹកចិត្តយ៉ាងជ្រាលជ្រៅ ចំពោះវីរភាពដ៏ឆ្នើម មានស្មារតីតស៊ូ អង់អាចក្លាហាន មោះមុត របស់មេទ័ព និងកងទ័ពខ្មែរ ដែលជាមូលដ្ឋានគ្រឹះក្នុងការរក្សាសុខសន្តិភាព និងសុវត្ថិភាពជូនប្រជាពលរដ្ឋទូទាំងប្រទេស នឹងទទួលបានការដឹងគុណ ការកោតសរសើរនិងការគោរពយ៉ាងខ្ពង់ខ្ពស់ពីប្រជាពលរដ្ឋខ្មែរទាំងអស់ ។ ការឧបត្ថម្ភនេះ នឹងរួមចំណែកយ៉ាងសំខាន់ ដើម្បីឲ្យមេទ័ពអាចផ្តោតតែលើភារកិច្ច ការរៀបចំយុទ្ធសាស្រ្ត និងការបញ្ជាកងទ័ព ក្នុងការតស៊ូប្រយុទ្ធ និងការពារប្រទេសជាតិ ដោយមិនមានការព្រួយបារម្ភចំពោះ បញ្ហាជីវភាពគ្រួសារនៅខាងក្រោយ ។ មេទ័ពខ្លាំង នាំឲ្យកូនទ័ពខ្លាំង មានស្មារតីរឹងមាំ សាមគ្គីភាពខ្ពស់ និងត្រៀមខ្លួនការពារជាតិជានិច្ច។ ម៉្យាងទៀត ការផ្តល់អំណោយជាគ្រឿងឧបភោគបរិភោគ និង សម្ភារៈប្រើប្រាស់ដល់ រដ្ឋបាលខេត្តសៀមរាបពេលនេះ ក្នុងការចូលរួមទ្រទ្រង់ជីវភាពរបស់បងប្អូនប្រជាពលរដ្ឋភៀសសឹក ដែលកំពុងស្នាក់នៅ បណ្តោះអាសន្ននៅតាមមណ្ឌលសុវត្ថិភាព ក្នុងភូមិសាស្ត្រខេត្តសៀមរាប ។
ក្នុងនោះដែរលោក ង៉ូវ សេងកាក់ ក៏បានបញ្ជាក់ជូនប្រតិភូផងដែរថា ចាប់ពីការឈ្លានពានរបស់ទាហានថៃមក បងប្អូនភៀសសឹក មកពីខេត្តឧត្តរមានជ័យ ,បន្ទាយមានជ័យ និង ខេត្តព្រះវិហារ មកស្នាក់នៅតាមមណ្ឌលសុវត្ថិភាព ទាំង ១៣១កន្លែង ក្នុងភូមិសាស្ត្រខេត្តសៀមរាប មានចំនួន ២០ពាន់៤៣៧គ្រួសារ មានមនុស្ស ៦៤ពាន់៤៧៣នាក់ និងបានវិលត្រឡប់ទៅកាន់លំនៅដ្ឋានវិញ ចំនួន ៥ពាន៦៣៦គ្រួសារ មានមនុស្ស ១៧ពាន់៦៣៧នាក់ ។ ចំពោះបងប្អូន ដែលកំពុងស្នាក់នៅតាមមណ្ឌលនោះ ដោយផ្ទះសម្បែងពួកគាត់ ត្រូវបានសត្រូវឈ្លានពាន បំផ្លិចបំផ្លាញ និង មួយចំនួន អាជ្ញាធរមិនទាន់អនុញ្ញាតឲ្យចូលទៅរស់នៅ ដោយបច្ចុប្បន្ននេះ ក្រុមការងារស៊ីម៉ាក់ មិនទាន់បានបោសសម្អាតយុទ្ធភ័ន្ត មិនទាន់ផ្ទុះ ដែលនៅសេសសល់ក្នុងភូមិ ។ ម៉្យាងទៀតរាល់អំណោយដែលទទួលបានពីបងប្អូនសប្បុរសជន មួយចំនួន ត្រូវបានបែងចែកជូនទៅសមរភូមិមុខ និង ផ្គត់ផ្គង់ជូនបងប្អូនភៀសសឹក ហើយមួយចំនួនត្រូវបានត្រៀមបម្រុង ទ្រទ្រង់ ជីវភាពបងប្អូន ដែលកំពុងស្នាក់នៅបន្តផងដែរ ។
អំណោយដែលប្រគល់ជូនទាំង៣អង្គភាព មួយអង្គភាពទទួលបានអង្ករ៥តោន គ្រឿងឧបភោគបរិភោគនិងសម្ភារៈប្រើប្រាស់ និង ថវិកា ១៥លានរៀលផងដែរ ៕
