កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្ដម អ៊ុន ចាន់ដា បានថ្លែងថា សម្រាប់ឆ្នាំ២០២៦ ប្រាក់ឈ្នួលអប្បរមាសម្រាប់កម្មករនិយោជិតក្នុង វិស័យកាត់ដេរកើនឡើងដល់២១០ដុល្លារ ហើយប្រសិនបូក នឹងប្រាក់អត្ថប្រយោជន៍ផ្សេងៗ កម្មករនិយោជិតម្នាក់ៗទទួលបានប្រាក់ឈ្នួលទាបបំផុតចាប់ពី ២២៩,៥ ដល់ 
២៤០,៥ ដុល្លារអាមេរិកក្នុងមួយខែ។ ថ្លែងបែបនេះក្នុងឱកាសអបអរសាទរខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ឧសភា ក្រោមប្រធានបទ «រួមគ្នាកសាងភាពធន់ ដើម្បីការងារសមរម្យ» ដែលបានធ្វើឡើង នាព្រឹកថ្ងៃទី១ ឧសភា ២០២៦ នៅក្រុមហ៊ុន សាន់ស៊ូ ហ្គាម៉ិន ខូអិលធីឌី ស្រុកព្រៃឈរ ក្រោមវត្តមានឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ។
ក្នុងឱកាសនោះដែរ ឯកឧត្ដម អ៊ុន ចាន់ដា បានថ្លែងថា ក្នុងខេត្តកំពង់ចាម មានរោងចក្រ-សិប្បកម្មចំនួន ១.៦៨៣មូលដ្ឋាន និងកម្លាំងពលកម្មសរុប ៥៥.៦៥៨នាក់ ក្នុងនោះរោងចក្រកាត់ដេរសម្លៀកបំពាក់ និងផលិតស្បែកជើង សរុបចំនួន ៣៣កន្លែង មានកម្មករចំនួន៣៦.១៣៦នាក់ ។ ខណៈពលករខ្មែរត្រឡប់ពីថៃ ៦.២០១នាក់ ឱកាសការងារក្នុងខេត្ត ចំនួន ១.២៥៦នាក់ និងការងារក្រៅខេត្ត ចំនួន ៧៣២០នាក់ ។
ជាមួយគ្នានោះ ឯកឧត្ដម អ៊ុន ចាន់ដា អភិបាលខេត្តកំពង់ចាម ក៏បានលេីកឡេីងផងដែរថា បន្ទាប់ពីរាជរដ្ឋាភិបាលកម្ពុជានីតិកាលទី៧ បានប្រកាសដាក់ឱ្យអនុវត្ត «កម្មវិធីបណ្តុះបណ្តាល ជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ» វិទ្យាស្ថានពហុបច្ចេកទេសខេត្តកំពង់ចាម បានបណ្តុះបណ្តាលលើជំនាញ សិស្សានុសិស្ស មកពីគ្រួសារក្រីក្រ និងគ្រួសារងាយរងហានិភ័យ សរុបចំនួន ៣ ៣៦៩នាក់ មានបណ្ណសមធម៌ ២ ៤២៦នាក់ ប្រាក់ឧបត្ថមសរុបជិត២ពាន់លានរៀល ៕
