ខេត្តកំពង់ធំ៖ នៅព្រឹកថ្ងៃទី ២៥ ខែមករា ឆ្នាំ ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ ខេត្តកំពង់ធំ បានជួបសំណេះសំណាលពង្រឹងភារកិច្ច និងដាក់ចេញនូវបទបញ្ជាយ៉ាងម៉ឺងម៉ាត់ ដល់កងកម្លាំងនៃបញ្ជាការដ្ឋានតំបន់ប្រតិបត្តិ
ការសឹករងកំពង់ធំ ដែលកំពុងប្រចាំការនៅទីបញ្ជាការស្រាល ចំនួន ៦គោលដៅ ក្នុងភូមិសាស្ត្រស្រុកសណ្ដាន់ និងស្រុកសន្ទុក ក្នុងការបង្ក្រាបបទល្មើសធនធានធម្មជាតិ តាមបទបញ្ជារបស់ប្រមុខរាជរដ្ឋាភិបាលនៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ឲ្យទទួលបានជោគជ័យ ។ ដែលកិច្ចប្រជុំនេះប្រព្រឹត្តទៅនៅតំបន់ព្រៃសហគមន៍ជាំស្មាច់ ជាប់ព្រំប្រទល់ស្រុកសន្ទុក និងស្រុកសណ្ដាន់ ខេត្តកំពង់ធំ ។
ឧត្តមសេនីយ៍ទោ សោម ស៊ុន បានបញ្ជាក់ថា៖ ដោយអនុវត្តតាមបទបញ្ជារបស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ កងកម្លាំងទាំងអស់ដែលមានភារកិច្ចប្រចាំការនៅទីបញ្ជាការស្រាលបង្ក្រាបបទល្មើសធនធានធម្មជាតិ ត្រូវបន្តសហការជាមួយអាជ្ញាធរដែនដី និងសមត្ថកិច្ចជំនាញ ឬដោយម្ចាស់ការក្នុងស្មារតីទទួលខុសត្រូវខ្ពស់ ដោយមិនត្រូវឲ្យកើតមានឡើងជាដាច់ខាត នូវការកាប់ទន្ទ្រានព្រៃឈើយកដីរបស់រដ្ឋធ្វើជាកម្មសិទ្ធិ, ការកាប់និងដឹកជញ្ជូនឈើដោយខុសច្បាប់ ។ កងកម្លាំងនៅទីបញ្ជាការស្រាលណាមួយដែលធ្វេសប្រហែស ក្នុងការបំពេញភារកិច្ច ឬមានការគប់គិត ធ្វើឲ្យបទល្មើសនេះកើតឡើងដោយមិនបានទប់ស្កាត់ និងបង្ក្រាប ត្រូវទទួលវិន័យរបស់កងយោធពលខេមរភូមិន្ទ ឬនឹងត្រូវស្នើសុំលុបឈ្មោះចេញពីបញ្ជីកងយោធពលខេមរភូមិន្ទ ក្នុងករណីធ្ងន់ធ្ងរត្រូវផ្ដន្ទាទោសតាមផ្លូវច្បាប់ ដោយគ្មានការយោគយល់ឡើយ។
នៅក្នុងឱកាសនេះ ឧត្តមសេនីយ៍ទោ សោម ស៊ុន ក៏បាននាំយកនូវប្រេងឥន្ធនៈ ស្បៀងអាហារ គ្រឿងឧបភោគបរិភោគ ភេសជ្ជៈ ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តម វង្សី វិស្សុត ឧបនាយករដ្ឋមន្ត្រី រដ្ឋមន្ត្រីប្រចាំការទីស្ដីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ប្រគល់ជូនកងកម្លាំងដែលកំពុងប្រចាំការនៅទីបញ្ជាការស្រាលទាំង៦ ដើម្បីបន្តសកម្មភាព ឲ្យដូចភ្លៀងរលឹម ដោយគ្មានការដកថយឡើយ។
