ខេត្តកំពង់ធំ៖ ដោយទទួលបានព័ត៌មានពីប្រជាពលរដ្ឋ អំពីការកាប់ទន្ទ្រានព្រៃឈើនៅក្នុងព្រៃសហគមន៍អូរក្រញូង ស្ថិតនៅក្នុងភូមិជាំស្វាយ ឃុំមានរិទ្ធ ស្រុកសណ្ដាន់ ខេត្តកំពង់ធំ ។ នៅព្រឹកថ្ងៃទី២៤ ខែមេសា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធាន
អចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានដឹកនាំសហការីរួមជាមួយមន្ត្រីស្ថាប័នជំនាញរដ្ឋបាលព្រៃឈើ និងប្រធានសហគមន៍ព្រៃឈើអូរក្រញូង បានទៅត្រួតពិនិត្យវាយតម្លៃ អំពីស្ថានភាពខូចខាតដោយកាប់ទន្ទ្រានព្រៃឈេីយកដីរបស់រដ្ឋធ្វើជាកម្មសិទ្ធិ និងចាត់វិធានការគ្រប់គ្រងការពារ ព្រមទាំងរៀបចំកសាងសំណុំរឿងដើម្បីអនុវត្តវិធានការច្បាប់ ។
លោក ម៉ៅ ធា ប្រធានសហគមន៍ព្រៃឈើអូរក្រញូង បានរាយការណ៍ថា ផ្ទៃដីសហគមន៍ព្រៃឈើអូរក្រញូង មានទំហំសរុបជាង ១,៦០០ហិកតា បច្ចុប្បន្ននៅសល់ប្រមាណជាង ១,២០០ហិកតា ដែលកំពុងធ្វើការគ្រប់គ្រងការពារ ហើយផ្ទៃដីព្រៃឈើជាង ៤០០ហិកតាទៀត ត្រូវបានរងការកាប់ទន្រ្ទានយកដីធ្វើជាកម្មសិទ្ធពីសំណាក់ជនល្មើសមួយចំនួននាបណ្តាឆ្នាំកន្លងទៅ ។
លោក ហេង លីហួ នាយសង្កាត់រដ្ឋបាលព្រៃឈើសណ្តាន់ បានបញ្ជាក់ថា ផ្ទៃដីព្រៃឈើសហគមន៍អូរក្រញូងដែលបានរងការកាប់ទន្ទ្រានក្នុងពេលត្រួតពិនិត្យនេះ មាន ទំហំ ៩ហិកតា ១៥អា ក្នុងនោះ តាមការវាយតម្លៃ ផ្ទៃដីប្រមាណជាង ៣ហិកតា ត្រូវបានរងការកាប់ទន្ទ្រាននៅឱកាសបុណ្យចូលឆ្នាំថ្មីប្រពៃណីជាតិខ្មែរនេះ ។ ដោយឡែកផ្ទៃដីជាង ៦ហិកតាទៀត អាចក្រុមជនល្មើសលួចកាប់ទន្ទ្រាន នាបណ្តាឆ្នាំកន្លងទៅ ហេីយទេីបធ្វើការដុតនិងសំអាត ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ដ្រៃយ៍នៃគណៈកម្មការ ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានថ្លែងនូវការសោកស្ដាយចំពោះការបាត់បង់ព្រៃឈើ ដែលយេីងកំពុងធ្វើការការពារ និងអភិរក្ស សម្រាប់បម្រើសេចក្តីត្រូវការរបស់សង្គមជាតិ និងកូនចៅយើងនៅជំនាន់ក្រោយៗទៀត ។ ហេីយនៅក្នុងឱកាសនេះ ឧត្តមសេនីយ៍ទោ សោម ស៊ុន បានណែនាំឲ្យសមត្ថកិច្ចជំនាញ សហការជាមួយ ប្រធានសមាគមព្រៃឈើអូរក្រញូង ត្រូវស្រាវជ្រាវវែករកមុខសញ្ញាកាប់ទន្ទ្រានព្រៃឈើសហគមន៍អូរក្រញូងនេះឲ្យឃេីញ ដេីម្បីចាត់វិធានការតាមផ្លូវច្បាប់ ដោយគ្មានការលើកលែងឡេីយ ។
ឧត្តមសេនីយ៍ទោ សោម ស៊ុន ក៍បានប្រគល់ ស្បៀងអាហារ គ្រឿងឧបភោគបរិភោគ ប្រេងឥន្ធនៈ ភេសជ្ជៈ និងបានប្រគល់ភារកិច្ចដល់កងកម្លំាងដែលត្រូវបង្កើនបន្ថែម ក្នុងការការពារ នៅក្នុងតំបន់ព្រៃសហគមន៍អូរក្រញូងនេះ ត្រូវការពារឲ្យបានដាច់ខាត មិនឲ្យមានការកាប់ទន្ទ្រានព្រៃឈើជាថ្មី និងត្រូវគ្រប់គ្រងឲ្យបានមុឺងម៉ាត់នូវផ្ទៃដី ដែលបានលួចកាប់ទន្ទ្រានរួចហើយនេះ មិនត្រូវឲ្យបាត់បង់ ឬមានការដាំដុះដំណាំអ្វីឡើយ ដេីម្បីទុកឲ្យព្រៃឈើធម្មជាតិ ដុះលូតលាស់ឡើងវិញ ជាសម្បត្តិរបស់រដ្ឋ ។
