(បន្ទាយមានជ័យ)៖ វិវាទដីធ្លីដ៏រ៉ាំរ៉ៃមួយកន្លែង ស្ថិតនៅក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ កំពុងតែយារដាល និងក្លាយជា «ជំងឺរ៉ាំរ៉ៃដែលគ្មានថ្នាំព្យាបាល» ខណៈប្រជាពលរដ្ឋជិត ៣០០ គ្រួសារ កំពុងរស់នៅក្នុងភាពអស់សង្ឃឹម និងកើតទុក្ខមិនសុខចិត្តជាខ្លាំង ចំពោះចំណាត់ការដោះស្រាយដ៏យឺតយ៉ាវ និងការអូសបន្លាយពេលពីមួយឆ្នាំទៅមួយឆ្នាំ ពីរដ្ឋបាលខេត្តបន្ទាយមានជ័យ។
តំណាងប្រជាពលរដ្ឋបានរៀបរាប់ទាំងទឹកភ្នែកថា ពួកគាត់បានមកកាប់ឆ្ការ ត្រួសត្រាយព្រៃឈើ ព្រៃឫស្សី និងប្រថុយប្រថានជីវិតរស់នៅលើទឹកដីនេះ តាំងពីសម័យក្រោយសង្គ្រាម ដែលកាលនោះពោរពេញទៅដោយគ្រាប់មីនបន្សល់ទុក។ ពួកគាត់បានរួមសុខរួមទុក្ខ បង្កើតជាសហគមន៍ និងសាងសង់លំនៅឋានរស់នៅជាច្រើនរយគ្រួសារ ដោយពុំដែលឃើញមានបុគ្គល ឬភាគីណាម្នាក់ចេញមុខមកអះអាង ឬទាមទារថាជាដីកម្មសិទ្ធិរបស់ខ្លួនឡើយ។
«ពួកយើងរស់នៅទីនេះតាំងពីដីមានមីន គ្មានអ្នកណាអើពើឡើយ តែរហូតមកដល់ឆ្នាំ ២០២៥ ស្រាប់តែលេចមុខ “ជនមិនស្គាល់មុខ” មកអះអាងថាកាន់កាប់ដីនេះទៅវិញ»នេះជាការលើកឡើងពីប្រជាពលរដ្ឋ។ប្រភពដដែលបានបន្តចោទប្រកាន់ថា មានការឃុបឃិតគ្នារវាងជនខិលខូចទាំងនោះ ជាមួយនឹងអាជ្ញាធរក្រុងប៉ោយប៉ែត ដោយបានព្យាយាមទប់ស្កាត់ និងមិនព្រមចេញប័ណ្ណកម្មសិទ្ធិ (ប្លង់ដី) ស្របច្បាប់ជូនប្រជាពលរដ្ឋ ដែលជាអ្នករស់នៅជាក់ស្តែងឡើយ។
បច្ចុប្បន្ន ប្រជាពលរដ្ឋជិត ៣០០ គ្រួសារ បាននិងកំពុងធ្លាក់ក្នុងភាពទ័លច្រក និងអស់សង្ឃឹមយ៉ាងខ្លាំង ដោយសារតែថ្នាក់ដឹកនាំខេត្ត និងថ្នាក់ដឹកនាំក្រុង ហាក់បីដូចជាមិនមានការអើពើ ឬមានឆន្ទៈពិតប្រាកដក្នុងការដោះស្រាយទំនាស់ដីធ្លីនេះជូនពួកគាត់នោះទេ ដោយទុកឱ្យពួកគាត់រង់ចាំពីមួយឆ្នាំទៅមួយឆ្នាំ គ្មានពន្លឺយុត្តិធម៌។ដោយសារតែអស់ជំនឿលើការដោះស្រាយពីអាជ្ញាធរថ្នាក់ក្រោមជាតិ ប្រជាពលរដ្ឋជិត ៣០០ គ្រួសារ នៅក្នុងសង្កាត់ផ្សារកណ្តាល ក្រុងប៉ោយប៉ែត បានសម្រេចចិត្តលើកដៃម្រាមដប់ គោរពស្នើសុំសេចក្តីសណ្តោសប្រណី និងអន្តរាគមន៍ពីថ្នាក់ដឹកនាំកំពូល៖សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា
ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ប្រជាពលរដ្ឋសង្ឃឹមយ៉ាងមុតមាំថា សម្តេចធិបតី និងឯកឧត្តមឧបនាយករដ្ឋមន្ត្រី នឹងមេត្តាជួយពិនិត្យ ភាពទុក្ខលំបាករបស់រាស្ត្រសាមញ្ញ និងជួយជម្រុញការដោះស្រាយ បញ្ចប់ទំនាស់ដ៏រ៉ាំរ៉ៃនេះ ព្រមទាំងផ្តល់ប័ណ្ណកម្មសិទ្ធិស្របច្បាប់ជូនពួកគាត់ ដើម្បីអាចរស់នៅ និងប្រកបរបរចិញ្ចឹមជីវិតដោយសេចក្តីសុខសាន្តតទៅ៕
ដោយប៊ុន រដ្ឋា